ހުއްޓިފައި ހުރި މަޝްރޫޢުތައް އަވަހަށް ކުރިއަށް ގެންދިޔުމަށް ހުރިހާ ރަށަކަށް ބޭނުންވާ ބޮޑު ހިލަ ބަލްކުކޮށް ރާއްޖެގެނައުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފި
ރާއްޖޭގެ އެކި ކަންކޮޅުތަކުގައި ހުއްޓިފައިވާ ތަރައްޤީގެ މަޝްރޫޢުތައް އަވަހަށް ކުރިއަށް ގެންދިޔުމަށްޓަކައި، ހުރިހާ ރަށަކަށް ބޭނުންވާ ބޮޑު ހިލަ ބަލްކުކޮށް ރާއްޖެ ގެނައުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ. މި ނިންމެވުން ރައީސް ހާމަކުރެއްވީ ގދ. ރަތަފަންދޫއަށް ކުރެއްވި ދަތުރުފުޅުގައި، އެރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސް މުޢިއްޒު ވިދާޅުވި ގޮތުގައި، ރަށްރަށުގެ ބިންހިއްކުމާއި ބަނދަރު ހެދުމުގެ މަސައްކަތްތައް ހުއްޓިފައިވާ އެންމެ ބޮޑު އެއް ސަބަބަކީ ބޮޑު ހިލަ ނުލިބުމެވެ. މި މައްސަލަ ހައްލުކުރުމަށްޓަކައި، ބަލްކުކޮށް ބޮޑު ހިލަ ގެނައުމަށް ނިންމަވާފައިވާ ކަމަށް ރައީސް ހާމަކުރެއްވިއެވެ. އަދި މިކަމާ ގުޅޭގޮތުން ޭގޮތުން ކުންފުނިތަކާއި، މާލީ ވަޒީރާއި އިމާރާތްކުރުމާ ބެހޭ ވަޒީރާއެކު މަޝްވަރާކުރައްވާފައިވާ ކަމަށްވެސް ވިދާޅުވިއެވެ.
“ބަނދަރުތަކާއި ރަށްގިރުމުގެ މައްސަލައާއި ބިންހިކުމާއި ތޮށިލުމާއި މިހެން ހުރި ކަންކަމަށް ބޭނުންވާ ހިލަ ނުލިބުމުން މަސައްކަތް ހުއްޓިފައި ހުރޭ. އެހެންކަމުން ބޮޑު ހިލަ ގެނައުމަށް އެކަން ކުރާނެ ގޮތްތަކެއް ވަނީ ރާވާފައި. ފައިސާވެސް ވަނީ ހަމަޖައްސާދީފައި.” ރައީސް މުޢިއްޒު ވިދާޅުވިއެވެ.
ރާއްޖޭގެ އެކި ސަރަހައްދުތަކުގައި ތަރައްޤީގެ ގިނަ މަޝްރޫޢުތަކެއް ފަށާފައިވާއިރު، މީގެ ތެރޭގައި ބަނދަރު ހެދުމާއި، ހިއްކި ސަރަހައްދު ހިމާޔަތްކުރުމާއި، ގޮނޑުދޮށް ހިމާޔަތްކުރުމުގެ މަސައްކަތްތައް ހިމެނެއެވެ. ނަމަވެސް މީގެ ތެރެއިން ބައެއް މަޝްރޫޢުތައް ހުއްޓިފައިވަނީ ރާއްޖެއިން ބޭރުން ގެންނަންޖެހޭ ސާމާނު ލިބުން ލަސްވުމާއި ނުލިބުމުގެ ސަބަބުންނެވެ.
ރައީސް މުޢިއްޒުގެ މި ނިންމެވުމާއެކު، ރާއްޖޭގެ އެކި ކަންކޮޅުތަކުގައި ހުއްޓިފައިވާ ތަރައްޤީގެ މަޝްރޫޢުތައް އަވަހަށް ކުރިއަށް ގެންދެވޭނެކަމަށް އުންމީދު ކުރެވެއެވެ. މިކަމުގެ ސަބަބުން ރަށްރަށުގެ ބިންހިއްކުމާއި، ބަނދަރު ހެދުމާއި، ރަށްގިރުން ހުއްޓުވުމުގެ މަސައްކަތްތައް އަވަސްވެ، ރައްޔިތުންނަށް ލުއިފަސޭހަކަން ލިބިގެންދާނެ ކަމަށް ބެލެވެއެވެ.