ހުވަދުއަތޮޅަށް ކުރައްވަމުންދާ ރަސްމީ ދަތުރުފުޅުގެ ތެރެއިން، ރައީސުލްޖުމްހޫރިއްޔާ ޑރ. މުޢިއްޒު އަށް އެ އަތޮޅުގެ ރަށްތަކުން ދެއްވީ ހަނދާނުން ފިލައިނުދާނެ، ފުރިހަމަ އިޚްތިރާމަކާއި މެހެމާންދާރީއެކެވެ. ވަޑައިގެންނެވި ކޮންމެ ރަށަކުންމެ އެ މަނިކުފާނާ ބައްދަލުވަނީ ހޫނު މަރުޙަބާއާއި ތަހުނިޔާގެ ފުރިހަމަކަމެވެ.
ސޯޝަލް މީޑިއާގެ އެކި މަންސަތަކުގައި އެއް އިބާރާތަކަށްމެ ފެތުރިގެންދަނީ ރައިސް ޑރ.މުޢިއްޒު ރައްޔިތުންނާމެދު ބާއްވާ ހިތްހެޔޮކަމާއި އޯގާތެރިކަމުގެ ވާހަކަތަކެވެ. އެގޮތުން މިއަދު ރައިސް ގއ. ކަނޑުހުޅުދޫ އަށް ކުރެއްވި ދަތުރުފުޅުގައި ރަށުގެ ރައްޔިތުންނާ ބައްދަލުކުރައްވަމުން ގެންދަވަނިކޮށް، ކުޑަކުއްޖަކު ރައީސަށް އަރުވާފައިވާ ނޯޓެއްގައި ލިޔެފައި އޮތީ "ބައްޕަ މަތިން ވަރަށް މިސްވޭ" މި ޢިބާރާތެވެ. ރައީސް މުޢިއްޒު މި ކުޑަކުއްޖާގެ ނޯޓު ބައްލަވައިގަތުމާއެކު، އެމަނިކުފާނު ވަނީ ވަރަށް އަވަހަށް އެކަމާމެދު ފިޔަވަޅު އަޅުއްވާފައެވެ. ރައީސް އަވަސްވެވަޑައިގެންނެވީ އެ ކުއްޖާ ބޭނުންވާ ފަދައިން، ކުއްޖާގެ ބައްޕަ އަވަހަށް ކުއްޖާގެ ގާތަށް ގެނައުމަށެވެ. އެގޮތުން، އެ ކުއްޖާގެ ބައްޕަގެ ވަޒީފާ ކަނޑުހުޅުދޫ ޕޮލިސް ސްޓޭޝަނަށް ބަދަލުކުރެއްވުމަށް ރައީސް ވަނީ އަމުރު ކުރައްވާފައެވެ. މިއިންވެސް ރަމްޒުކޮށްދެނީ އެމަނިކުފާނުގެ ނަޒާހަތްތެރިކަމުގެ ފުރިހަމަކަމެވެ.
ރައީސް އަށް ނޯޓުކޮޅެއް ދެއްވި ކުއްޖާ އެކުއްޖާގެ ބައްޕާއާއެކު:ފޮޓޯ/ހުވަދޫ މީޑިއާ
ރައީސް މުޢިއްޒަކީ ރައްޔިތުންގެ އިޙްސާސްތަކަށް އަޑުއަހައި، އެކަންކަމަށް އަވަސް ޙައްލު ހޯއްދަވައިދެއްވުމަށް މަސައްކަތްކުރައްވާ ލީޑަރެއްކަން މިހާދިސާއިންވެސް ވަނީ ހާމަވެގެން ގޮސްފައެވެ. އެމަނިކުފާނު މިއަދު ކަންތައް ކުރެއްވި ގޮތުން، ޢާއިލާތަކުގެ އެއްބައިވަންތަކަމާއި ކުޑަކުދިންގެ ނަފްސާނީ ދުޅަހެޔޮކަމަށް އެމަނިކުފާނު ދެއްވާ އަހައްމިއްޔަތުކަން ވަނީ ހާމަވެގެން ގޮސްފައެވެ.
ރައިސް ވަޑައިގެންނެވި ކޮންމެ ރަށަކުން ވެސް އެމަނިކުފާނު އެ ރަށަކުން ފައިބައިވަޑައިގަންނަވަނީ ރައްޔިތުންގެ އުއްމީދުތަކަށް އައު ފުރުސަތުތަކެއް ހުޅުވާލައްވާފައެވެ. އެގޮތުން ރަށްރަށުގައި އައު ބަނދަރު އެޅުމުގެ މަޝްރޫޢުތައް ކުރިއަށް ގެންދިއުމާއި، ހުރިހާ ރަށެއްގައި ވެސް އޭޓީއެމް ޤާއިމްކުރުމުގެ މަސައްކަތް ކުރިއަށް ގެންދިއުމާއި، ސްކޫލަށް މަލްޓިޕާޕަސް ހޯލެއް އިތުރުކުުރުމާއި މަސްފެކްޓްރީ އެއް ޤާއިމްކުރުން މީ ރައިސް ޑރ.މުޢިއްޒު ރައްޔިތުންނާ ބައްދަލުކުރައްވާ ވިދާޅުވި ބައެއް ކަންކަމެވެ.
ފާހަގަކޮށްލަންޖެހޭ ކަމަކީ ރައީސްގެ މި ދަތުރުފުޅަކީ އިދިކޮޅު އެއްވެސް ބައެއްގެ ނުރުހުންތެރިކަމެއް ނުވަތަ ހަމަލާއެއް ކުރިމަތިލާން ޖެހުނު ދަތުރެއް ނޫންކަމެވެ. އިދިކޮޅު ރައްޔިތުންގެ ފަރާތުން ވެސް ފެނިގެން ދިޔައީ ރައީސް އަށްޓަކައި އެމީހުންގެ ހިތުގައި އޮތް އިޚްތިރާމާއި ޤަދަރެވެ. ކޮންމެ ރަށަކުންމެ ފެނުނީ ނިމުމުގެ ކޮޅުނެތް ދިގު ސަފުތަކެވެ. ރައިސް އަށް މަރުޚަބާ ކިއުމުގައި ރަށުގެ ކުދިބޮޑު އެންމެނާއި ޒުވާނުންނާއި އަދި މުސްކުޅިން ވެސް ބައިވެރިވިއެވެ.
ރައީސްގެ ދަތުރުފުޅުގެ ތެރެއިން: ފޮޓޯ/ޚުލާސާނިއުސް
ރައިސް ޑރ. މުއިޢްޒަކީ ރައްޔިތެއްގެ ކުރިމަތީގައި، ފުއްދެވުމުގެ ނިޔަތުގައި، ފުއްދަވައިދެއްވޭނޭކަމުގެ ޔަޤީންކަން އޮވެގެން މެނުވީ ވަޢުދެއް ވެވަޑައިނުގަންނަވާނެ ރައީސެކެެވެ. ރައްޔިތުންނާ އެންމެ ގާތުން ޚިދުމަތްދޭ ރައީސެވެ. އެއީ އެންމެންގެ ރައީސެވެ.