މަސްތުވާތަކެތީގެ ވަބާގައި ޖެހިފައިވާ މީހުންނަށް ފަރުވާދޭ ކައުންސިލަރުން ތަމްރީނުކުރުމުގެ މަސައްކަތްތަކާ ގުޅޭގޮތުން ނެޝަނަލް ޑްރަގް އެޖެންސީ (އެންޑީއޭ) އިން މަޝްވަރާކޮށްފިއެވެ. މި މަޝްވަރާތައް ކުރިއަށް ގެންގޮސްފައިވަނީ އެންޑީއޭއާއި، ސިއްޙަތާބެހޭ ވުޒާރާ އަދި އެލައިޑް އިންޝުއަރެންސާ ދެމެދުގައެވެ.
އެންޑީއޭގެ ޗެއަރޕާސަން ލުބްނާ ޒާހިރު ވިދާޅުވި ގޮތުގައި، މި ޕްރޮގްރާމުގެ މައިގަނޑު މަޤްޞަދަކީ ރާއްޖޭގެ ހުރިހާ ރަށެއްގައިވެސް މަސްތުވާތަކެތީގެ ވަބާގައި ޖެހިފައިވާ މީހުންނަށް ފަރުވާދޭ ކައުންސިލަރުން އިތުރުކުރުމެވެ. މި ތަމްރީނު ޕްރޮގްރާމު ގިނަ ބައިތައް އޮންލައިންކޮށް ކުރިއަށް ގެންދިޔުމަށް ނިންމާފައިވާއިރު، ބައެއް ބައިތައް ކްލާސްތަކަށް ހާޒިރުވެގެންވެސް ކުރިއަށް ގެންދިޔުމަށް ވަނީ ނިންމާފައެވެ.
ލުބްނާ އިތުރަށް ފާހަގަކުރެއްވި ގޮތުގައި، ނެޝަނަލް އިންސްޓިޓިއުޓް ފޯ ރިސާޗް އެންޑް އެޑިކްޝަންސް ސްޓަޑީޒްއިން ވޭތުވެދިޔަ 12 އަހަރެއްހާ ދުވަހުގެ ތެރޭގައި އެއްވެސް މަސައްކަތެއް ހިންގާފައި ނުވާކަން ފާހަގަކުރެވިފައިވާތީ، މި އިންސްޓިޓިއުޓްގެ މަސައްކަތްތައް ފުޅާކުރުމަށް މަސައްކަތް ފަށާފައިވެއެވެ. މީގެ ތެރޭގައި މަސްތުވާތަކެތީގެ މައްސަލައިގެ ހާލަތު ދެނެގަތުމަށް ހަދަންޖެހޭ ދިރާސާގެ މަސައްކަތްވެސް ހިމެނެއެވެ.
މީގެ އިތުރުން، ޑްރަގް ފަރުވާއަށް އެއްބާރުލުން ނުދޭ މީހުންނާ މެދު ޤާނޫނީ ފިޔަވަޅު އެޅުމާއި، ފަރުވާގެ ނިޒާމު ހަރުދަނާ ކުރުމަށް އެންޑީއޭގެ ބޯޑާއި ޑްރަގް ކޯޓާ ދެމެދު މަޝްވަރާތަކެއް ވަނީ ކުރިއަށް ގެންގޮސްފައެވެ. މި މަޝްވަރާތަކުގައި، ޑްރަގް ކޯޓުގެ ދަށުން ފަރުވާއަށް ޙުކުމް ކުރެވި ފަރުވާ ތަންފީޛު ކުރަން ފެށުމަށްފަހު އެއްބާރުލުން ނުދޭ ފަރާތްތަކަށް ޤާނޫނީ ފިޔަވަޅު އެޅުމަށާއި، ފަރުވާގެ ނިޒާމު އިތުރަށް ހަރުދަނާކުރުމަށް ވަނީ ނިންމާފައެވެ.
ދިވެހިރާއްޖޭގައި މަސްތުވާތަކެތި ބޭނުންކުރާ 7500 ވަރަކަށް މީހުން އުޅޭ ކަމަށް ދިރާސާތަކުން ދައްކާއިރު، މި އައު މަސައްކަތްތަކުން މަސްތުވާތަކެތީގެ ވަބާއާ ދެކޮޅަށް ކުރެވޭ މަސައްކަތްތައް އިތުރަށް ހަރުދަނާވެގެންދާނެ ކަމަށް އުއްމީދު ކުރެވެއެވެ.