ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުވަދުއަތޮޅު ކަނޑުހުޅުދޫއަށް ކުރެއްވި ދަތުރުފުޅުގައި އެމަނިކުފާނުގެ ވަގުތުން އެޅުއްވި ފިޔަވަޅުން އިޖްތިމާޢީ އަދި ޢާއިލީ ކަންކަމަށް ދެއްވާ ހާއްސައިސްކަމެއް ދެއްވާ ކަން ހާމަވެގެން ދިޔައެވެ. ރަށުގެ ރައްޔިތުންނާ ބައްދަލުކުރައްވަމުން ގެންދަވަނިކޮށް، މަންމައެއްގެ ގާތުގައި ހުރި ކުޑަކުޑަ ފިރިހެންކުއްޖަކު ރައީސް ޑރ މުއިއްޒުގެ އަތްޕުޅަށް ނޯޓެއް ދިންތަން ފެނިގެންދިޔައެވެ. އެކުޑަކުޑަ ނޯޓުގައި އޮތީ މައުސޫމު ކުޑަހިތެއްގެ އާދޭހުގެ އަޑެވެ. ތެދުވެރި ހަގީގީ އިހުސާސެއްގެ ބަސްތަކެވެ. ދަރިފުޅަކު ބައްޕަ ނެތުމުން ބުނެފައިވާ މިމަދު ބަސްތަކުން ކޮންމެ ހިތަކަށްވެސް އަސަރު ކުރާނެއެވެ. "ބައްޕަ މަތިން ވަރަށް މިސްވޭ" މި އިބާރާތުގައިވާ އިހުސާސް ރައީސްގެ ހިތްޕުޅުގެ އެންމެފުންމިނަށް އަސަަރުފޯރުވިކަން ޔަގީނެވެ. ހަމައެހެންމެ މި ކުރު ޖުމުލައިގައި ފޮރުވިފައި އޮތީ ރާއްޖޭގެ އަތޮޅުތަކުގައި ދިމާވެފައިވާ އިޖްތިމާޢީ މައްސަލައެއްގެ ހަގީގަތްވެސްމެއެވެ،
ދިވެހިރާއްޖޭގެ އަތޮޅުތަކުގައި ވަޒީފާގެ ފުރުސަތުތައް މަދުވުމުގެ ސަބަބުން، ގިނަ ޢާއިލާތަކުގެ ބައްޕައިން ވަނީ ރަށުން ބޭރުގައި ވަޒީފާ އަދާކުރަން މަޖުބޫރުވެފައެވެ. މިކަމުގެ ސަބަބުން ކުދިންނަށް އެކުދިންގެ ބައްޕައިންނާ ބައްދަލުވަނީ އަހަރުތެރޭ މަދު ދުވަސްތަކެއްގައެވެ. މިއީ ކުޑަކުދިންގެ ނަފްސާނީ ދުޅަހެޔޮކަމަށް ނޭދެވޭ އަސަރުކުރާ ކަމެކެވެ.
ރައީސަށް ނޯޓު އެރުވި މަންޒަރު/ ފޮޓޯ: ހުވަދޫމީޑިއާ
ކޮންމެ ކުއްޖެއްގެވެސް ހަޔާތުގައި އެންމެ މުހިންމު ދެ ފަރާތަކީ މަންމައާއި ބައްޕައެވެ. ބައްޕަގެ އޯގާތެރިކަމާއި ލޯބި އެކުދިންނަށް ލިބެން ބޭނުންވާ ވަރަށް ނުލިބި ބޮޑުވާ ކުދިންނަށް ނަފްސާނީ ގޮތުން ތަފާތު ގޮންޖެހުންތަކާ ކުރިމަތިލާން ޖެހެއެވެ. ބައްޕަ ގޭގައި ނެތުމުން ކުދިން އިހުސާސްކުރާ ހިތްދަތިކަމާއި ލޯބީގެ މަދުކަން އެކުދިންގެ ކިޔެވުމަށާއި އުޅުމަށް ނޭދެވޭ އަސަރުކުރެއެވެ.
ރައީސް ޑރ މުޢިއްޒު މި ކުޑަކުއްޖާގެ ނޯޓު ވިދާޅުވުމާއެކު، ވަގުތުން އެކަމާމެދު ވަނީ ފިޔަވަޅު އަޅުއްވާފައެވެ. ރައީސް އަވަސްވެވަޑައިގެންނެވީ އެ ކުއްޖާ ބޭނުންވާ ފަދައިން، ކުއްޖާގެ ބައްޕަ އަވަހަށް ކުއްޖާގެ ގާތަށް ގެނެސްދެއްވުމަށެވެ، މިކުޑަކުއްޖާގެ ބައްޕަ ވަޒީފާ އަދާކުރަނީ ކައިރި އެހެން ރަށެއްގައި ކަމަށްވުމުން، އެކަން އޮތް ގޮތް ބައްލަވައި، އެ ކުއްޖާގެ ބައްޕަގެ ވަޒީފާ ކަނޑުހުޅުދޫ ޕޮލިސް ސްޓޭޝަނަށް ބަދަލު ކުރެއްވުމަށް ރައީސް ވަނީ އަމުރު ކުރައްވާފައެވެ.
ރައީސްގެ އަމުރުފުޅަށް ކުއްޖާގެ ބައްޕަ ވަގުތުން ރަށަށް ގެނައުން/ ފޮޓޯ: ހުވަދޫމީޑިއާ
މި ޚަބަރު ލިބުމާއެކު، އެ ޢާއިލާއަށް ވަނީ އާ ދިރުމެއް ލިބިފައެވެ. ކުއްޖާގެ ބައްޕަ ރަށަށް އައުމުން، ކުއްޖާ ވަނީ ގޮސް ބައްޕަ ގައިގައި ބައްދާލާފައެވެ. އުފާވެރިކަމުގެ ކަރުނައާއެކު ކުއްޖާއާއި ކުއްޖާގެ ބައްޕަ ވަނީ ރައީސް ކޮށްދެއްވި މި މަސައްކަތްޕުޅަށް ފަށްފަށުން ޝުކުރު ދަންނަވާފައެވެ.
ރައީސް، ކުއްޖާއަދި ކުއްޖާގެ ބައްޕައާއެކު/ފޮޓޯ:ހުވަދޫމީޑިއާ
ރައީސް މުޢިއްޒަކީ ރައްޔިތުންގެ އިޙްސާސްތަކަށް އަޑުއަހައި، އެކަންކަމަށް އަވަސް ޙައްލު ހޯއްދަވައިދެއްވުމަށް މަސައްކަތްކުރައްވާ ލީޑަރެއްކަން މިހާދިސާއިންވެސް ވަނީ ހާމަވެގެން ގޮސްފައެވެ. އެމަނިކުފާނު މިއަދު ކަންތައް ކުރެއްވި ގޮތުން، ޢާއިލާތަކުގެ އެއްބައިވަންތަކަމާއި ކުޑަކުދިންގެ ނަފްސާނީ ދުޅަހެޔޮކަމަށް އެމަނިކުފާނު ދެއްވާ އަހައްމިއްޔަތުކަން ވަނީ ހާމަވެގެން ގޮސްފައެވެ.
ރައީސް، ކުއްޖާއަދި ކުއްޖާގެ ބައްޕައާއެކު/ފޮޓޯ:ހުވަދޫމީޑިއާ
ނަމަވެސް، މި ހާދިސާއިން އަލިއަޅުވާލެވެނީ ރާއްޖޭގެ އަތޮޅުތަކުގައި ދިމާވެފައިވާ މުހިންމު އިޖްތިމާޢީ މައްސަލައަކަށެވެ. އަތޮޅުތަކުގައި ވަޒީފާގެ ފުރުސަތުތައް މަދުވުމުގެ ސަބަބުން، ގިނަ ބެލެނިވެރިން ވަޒީފާ އަދާކުރުމަށް ދަރިންނާ ދުރަށް ދާންޖެހުމަކީ ޙައްލުކުރަންޖެހިފައިވާ ބޮޑު މައްސަލައެކެވެ. މިކަމުގެ ސަބަބުން ކުދިންގެ ނަފްސާނީ އަދި ޖިސްމާނީ ދުޅަހެޔޮކަމަށް ނޭދެވޭ އަސަރުތަކެއް ކުރަމުންދާކަން ފާހަގަކުރެވެއެވެ.
ރައީސް، ކުއްޖާއަދި ކުއްޖާގެ ބައްޕައާއެކު/ފޮޓޯ:ހުވަދޫމީޑިއާ
ކުޑަކުދިންގެ ހަޔާތުގައި ބައްޕައިންގެ ދައުރު ވަރަށް މުހިންމެވެ. ބޮޑުވަމުން އަންނަ ކޮންމެ ތުއްތު ކުއްޖެއްގެވެސް އުންމީދަކަށް ވާނީ ޢާއިލާއާއެކު ބޮޑުވުމެވެ. މާނައަކީ، ބައްޕައާއި މަންމަ އެ ކުއްޖާ ބޮޑުވަމުން އަންނަ އިރު ގާތުގައި ހުރުމަކީ ކޮންމެ ކުއްޖަކުވެސް ބޭނުންވާނެ ކަމެކެވެ. މިކަމުގައި ކުއްޖާގެ އުފަލާ އެއްވަރަށް އޭގެ ސަބަބުން ކުއްޖާގެ ސިއްޙަތަށާއި، ޚާއްސަކޮށް ނަފްސާނީ ދުޅަހެޔޮކަމަށް ވަރަށް ހެޔޮ އަސަރެއް ކުރާނެއެވެ.
ރައީސް، ކުއްޖާއަދި ކުއްޖާގެ ބައްޕައާއެކު/ފޮޓޯ:ހުވަދޫމީޑިއާ
މި ހާދިސާއިން ދައްކުވައިދެނީ ރާއްޖޭގެ އަތޮޅުތަކުގައި ވަޒީފާގެ ފުރުސަތުތައް އިތުރުކޮށް، ޢާއިލާތައް އެކުގައި ދިރިއުޅެވޭނެ މާޙައުލެއް ޤާއިމުކުރުމުގެ މުހިންމުކަމެވެ. މިކަމަށް ސަރުކާރުން ޚާއްސަ ސަމާލުކަމެއް ދީ، އަތޮޅުތަކުގައި ވަޒީފާގެ ފުރުސަތުތައް އިތުރުކުރުމަށް މަސައްކަތްކުރުމަކީ މުހިންމު ކަމެކެވެ.
ރައީސް ޑރ މުޢިއްޒުގެ މި ޢަމަލަކީ ކުޑަކުއްޖެއްގެ ހިތުގެ އާދޭހަށް އިޖާބަދެއްވައި، އެ ކުއްޖާގެ ޢާއިލާއަށް އުފާވެރިކަން ގެނެސްދެއްވި ރީތި މިސާލެކެވެ. މިފަދަ ކަންކަމުން ރައްޔިތުންގެ ހިތްތަކުގައި ސަރުކާރާ މެދު އޮންނަ އިތުބާރު އިތުރުވެ، ޤައުމުގެ ލީޑަރޝިޕްގެ މައްޗަށް ރައްޔިތުންގެ ލޯބި އިތުރުވެގެންދާނެއެވެ. އަދި މިފަދަ ކަންކަމަކީ މުޅި މުޖުތަމަޢުއަށް ހެޔޮ ނަމޫނާއެއް ކަމުގައިވެސް ދަންނަވަމެވެ.