ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ކަނޑުހުޅުދޫ ދަތުރުފުޅުގައި އާޔަލްކިޔާ ކުޑަކުއްޖަކުގެ އެދުމަކަށް އެކުއްޖާގެ ބައްޕަ ރަށަށް ގެނައުމާބެހޭ ގޮތުން، ކަންހިނގި ގޮތް، ފުލުހުން ވަނީ މިއަދު ސާފުކޮށްދީފައެވެ.
ފުލުހުން ހާމަކުރި ގޮތުގައި، ރައީސް މުޢިއްޒު ކަނޑުހުޅުދޫގައި ހުންނެވިއިރު ކުޑަކުއްޖަކު ދިން ނޯޓެއްގައި އޭނާގެ ބައްޕަ މިސްވާ ވާހަކަ ލިޔެފައިވުމުން، ރައީސް ވަނީ ވަގުތުން އެކަން އޮތްގޮތް ބައްލަވާފައެވެ. މީޑިއާތަކަށް ފޮނުވި މެސެޖެއްގައި ފުލުހުން ބުނީ އެ ކުއްޖާގެ ބައްޕަ އުޅެނީ ރަށުން ބޭރުގައި ކަމަށްވުމާއެކު، ރައީސް ބޭނުންފުޅުވީ އެ ރަށުން ފުރާވަޑައިގަތުމުގެ ކުރިން، ބައްޕައާއި ކުއްޖާއާ ބައްދަލުވާނެ ފުރުސަތު އޮތްތޯ ބެއްލެވުމަށެވެ.
ފުލުހުން އިތުރަށް ބުނީ، ކުއްޖާގެ ބައްޕަ ހުރީ ކައިރި ރަށެއްގެ ޕޮލިސް ސްޓޭޝަނެއްގައި ކަމަށްވުމުން، އެ ވަގުތަށް އެކަން ހަމަޖައްސައިދިނުމަށް ފުލުހުންގެ މުއައްސަސާއިން ވަނީ މަސައްކަތް ކޮށްފައި ކަމަށެވެ. އަދި މި ކަމުގައި ފުލުހުންގެ މުވައްޒަފުންނާމެދު ޢަމަލުކުރަމުންދާ އުސޫލުތަކާ ތަފާތު ގޮތަކަށް ޢަމަލުކޮށްފައި ނުވާނެ ކަމަށްވެސް ފުލުހުން ވަނީ ބުނެފައެވެ.
މި ހާދިސާއާ ގުޅިގެން ސޯޝަލް މީޑިއާގައި ފުލުހުންގެ މުވައްޒަފުންނާމެދު ތަފާތުކުރުން ގެންގުޅެނީކަަމށް ބުނެ ބަޔަކު ވާހަކަ ދެއްކި ކަމުގައިވި ނަމަވެސް މިކަމަކީ ރައީސް ޑރ މުޢިއްޒުގެ އިންސާނީ އޯގާތެރިކަމުން ކުރެއްވި ކަމަކަށްވެފައި އެކަން ކުރައްވާފައިވަނީ ފުލުހުންގެ އުސޫލުތަކާ އެއްގޮތަށްކަމަށްވުމަކީ އުފާވެރިކަމެކެވެ.