ކަންފަތުގެ ރިހުމަކީ ހަށިގަނޑުގެ އެހެން ގުނަވަންތަކުގައި ރިއްސާ ރިއްސުމަށްވުރެ ތަދު ވަރުގަދަ އަދި ވޭންހުރި ރިހުމެކެވެ. މި ރިހުން މެދުވެރިވަނީ ގިނަފަހަރު ކަންފަތުގެ ތެރޭގައި ނުވަތަ ބޭރު ކައިރީގައި ޖަރާސީމު އުފެދުމުގެ ސަބަބުންނެވެ. މީގެ އިތުރުން ހަންގަނޑުގެ މައްސަލަތަކާއި، ކަންފަތަށް ފެން އެޅުމާއި، އެލަރޖީގެ ސަބަބުންވެސް ކަންފަތުގައި ރިއްސުން އާދެއެވެ.
ލޮނުމެދުގެ ފަރުވާ
ލޮނުމެދުގައި އެކުލެވޭ އެންޓި ބެކްޓީރިއަލް މާއްދާތަކުގެ ސަބަބުން، ޖަރާސީމުގެ ސަބަބުން ދިމާވާ ކަންފަތުގެ ރިހުމަށް ވަރަށް ރަނގަޅު ފަރުވާއެކެވެ. ލޮނުމެދު ބޭނުންކުރެވިދާނެ ދެގޮތެއް އެބައޮތެވެ. އެއްގޮތަކީ ރޯ ލޮނުމެދެއް ފަޅިކޮށްލާފައި އޭގެ އެއްބައި ހަފައިލުމެވެ. އަނެއްގޮތަކީ މަސްޓަޑް އޮއިލްއާއެކު ލޮނުމެދު ކައްކާލުމަށްފަހު، އެ ތެޔޮކޮޅުން ކަންފަތަށް ދެތިން ތިކި ޖެހުމެވެ.
އިނގުރުގެ ފަރުވާ
އިނގުރަކީ އެންޓި ބެކްޓީރިއަލް އަދި އެންޓި އިންފްލެމެޓްރީ ބާރު ވަރަށް ގަދަ އެއްޗެކެވެ. އިނގުރު ދިޔަ ފެލުމަށްފަހު ކަންފަތުގެ ބޭރުކައިރީގައި ހޭކުމުން ރިހުމަށް ލުޔެއް ލިބެއެވެ. އަދި މަސްޓަޑް ތެޔޮ ތެރެއަށް އިނގުރު ކުދިކޮށް ކޮށާލައިގެން ކައްކާލުމަށްފަހު، އެ ތެޔޮކޮޅުން ކަންފަތަށް ދެތިން ތިކި ޖެހުމުންވެސް ރިހުން މަޑުވެގެންދާނެއެވެ.
އޮލިވް އޮއިލްއަކީ ވަރަށް ފައިދާހުރި ތެލެކެވެ
އޮލިވް އޮއިލްގެ ފަރުވާ
އޮލިވް އޮއިލްއަކީ ހަށިގަނޑުގެ އެކި ތަންތަނުގައި ރިއްސުމަށް ބޭނުންކުރެވޭ ވަރަށް ފައިދާހުރި ތެލެކެވެ. ކަންފަތުގެ ރިހުމަށް އޮލިވް އޮއިލް ކުޑަކޮށް ހޫނުކޮށްލުމަށްފަހު ކަންފަތަށް ދެތިން ތިކި ޖެހިދާނެއެވެ. ނަމަވެސް މާގިނައިން ތިކި ނުޖެހުމަށް ސަމާލުވާންވާނެއެވެ.
ނަމަވެސް މިފަދަ ގޭތެރޭގެ ފަރުވާތަކަކީ އެންޓިބަޔޮޓިކްގެ ބަދަލުގައި ބޭނުންކުރެވޭނެ ފަރުވާތަކެއް ނޫނެވެ.
ކަންފަތުގެ ރިހުން ގަދަވެ، ދިގުލައިގެން ދާނަމަ، ޑޮކްޓަރެއްގެ ލަފާ ހޯދުން މުހިންމެވެ. މި ފަރުވާތަކަކީ ވަގުތީ ލުޔެއް ހޯދުމަށް ބޭނުންކުރެވިދާނެ ފަރުވާތަކެވެ.