ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އަށް މިއަދު ލިބުނު އައު ކާމިޔާބީގެ ސިއްރަކީ ރައީސް ޑރ. މުހައްމަދު މުއިއްޒުގެ ދުރު ވިސްނުންތެރިކަމާއި އެމަނިކުފާނުގެ ލީޑަރޝިޕްގެ ހަރުދަނާކަން ކަމަށް ސްޓެލްކޯގެ މެނޭޖިންގ ޑިރެކްޓަރު ހުސައިން ފަހުމީ ވިދާޅުވެއްޖެއެވެ.
ސްޓެލްކޯއިން ހުޅުމާލޭގެ ދެވަނަ ފިޔަވަހީގައި ގާއިމުކޮށްފައިވާ 132 ކިލޯވޯލްޓްގެ ހައިވޯލްޓޭޖް ސަބްސްޓޭޝަން ގްރޭޓަރ މާލެ އިންޓަކަނެކްޝަން ގްރިޑާ ގުޅާލުމުގެ މަސައްކަތް ވަނީ މިއަދު ކާމިޔާބު ކަމާއެކު ނިންމާލާފައެވެ. މި ކަމާ ގުޅިގެން ފަހުމީ ކުރެއްވި އެކްސްޕޯސްޓެއްގައި ވިދާޅުވެފައިވަނީ މި މަސައްކަތް ނިންމާލާފައިވަނީ ކަރަންޓު މެދުކެނޑުން ވަރަށް މަދުކޮށްގެން ކަމަށެވެ.
"މި ކާމިޔާބީ ޙާޞިލުކުރުމުގައި އަޅުގަނޑުމެންގެ އިންޖިނިއަރުންނާއި މުވައްޒަފުންގެ ފަރާތުން ފާހަގަކޮށްލެވޭ ހިތްވަރާއި ޕްރޮފެޝަނަލިޒަމަށް އަޅުގަނޑު ވަރަށް އިޚްލާޞްތެރިކަމާއެކު ތަޢުރީފު ކުރަން. މުވައްޒަފުންގެ ކެތްތެރިކަމާއި އެއްބާރުލުން ފާހަގަކޮށް ވަރަށް އިޚްލާޞްތެރިކަމާއެކު ޝުކުރު ދަންނަވަން،" ފަހުމީ ވިދާޅުވިއެވެ.
ފަހުމީ އިތުރަށް ވިދާޅުވި ގޮތުގައި މިފަދަ ބޮޑު ކާމިޔާބީއެއް ސްޓެލްކޯއަށް މިއަދު ހާސިލް ކުރެވުނީ ރައީސް ޑރ. މުހައްމަދު މުއިއްޒުގެ ދުރު ވިސްނުންތެރިކަމާއި އެމަނިކުފާނުގެ ލީޑަރޝިޕްގެ ސަބަބުންނެވެ. އެހެންކަމުން ފަހުމީ ވަނީ ރައީސް މުއިއްޒަށް ޚާއްޞަ ޝުކުރެއް އަދާކުރައްވާފައެވެ.
ސްޓެލްކޯގެ ޓްރާންސްމިޝަން އެންޑް ޑިސްޓްރިބިއުޝަންގެ ޖެނެރަލް މެނޭޖަރު އިބްރާހިމް ނާޝިދު ވިދާޅުވި ގޮތުގައި، މި މަސައްކަތް ކުރިއަށް ގެންދިއުމަށް ކުރިން އަންދާޒާ ކޮށްފައިވަނީ މާލޭގެ 10 ސަރަހައްދަކުން ކަރަންޓު މެދުކަނޑާލަން ޖެހޭނެ ކަމަށެވެ. ނަމަވެސް މޫސުން ތަންދިނުމާއެކު، މާލޭގެ ދެ ސަރަހައްދަކުން އެއް ގަޑިއިރަށްވުރެ މަދު ވަގުތުކޮޅަކަށް ކަރަންޓު މެދުކަނޑާލައިގެން މި މަސައްކަތް ނިންމާލެވިފައިވާ ކަމަށް އޭނާ ވިދާޅުވިއެވެ.
މި މަސައްކަތް ނިމުމާއެކު، ހުޅުމާލޭގެ ދެވަނަ ފިޔަވަހީގެ ކަރަންޓުގެ ޚިދުމަތް އިތުރަށް ހަރުދަނާވެ އިތުބާރު ބޮޑުވެގެންދާނެ ކަމަށް ސްޓެލްކޯއިން ބުނެއެވެ. އަދި މުޅި ގްރޭޓަރ މާލެ ސަރަހައްދުގެ ކަރަންޓުގެ ވިއުގަ އިތުރަށް ވަރުގަދަވެގެންދާނެ ކަމަށް ވެސް ސްޓެލްކޯއިން ވަނީ ފާހަގަކޮށްފައެވެ.