ޗައިނާގެ ޚާރިޖީ ވަޒީރު އެކްސެލެންސީ ވަންގ ޔީ މިއަދު ހަވީރު ރައީސް އޮފީހުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާ ބައްދަލު ކުރައްވައިފިއެވެ.
މި ބައްދަލުކުރެއްވުމުގައި ރައީސް ޑރ. މުޢިއްޒު ވަޒީރު ވަންގ ޔީއަށް ހޫނު މަރުޙަބާއެއް ދަންނަވައި، ރާއްޖެއަށް ޒިޔާރަތްކުރެއްވި ކަމަށްޓަކައި ޝުކުރު އަދާކުރެއްވިއެވެ. އަދި ދިވެހިރާއްޖެއާއި ޗައިނާއާ ދެމެދު އޮތް ގާތް ރަޙްމަތްތެރިކަމާއި، ރާއްޖޭގެ ތަރައްޤީގެ ލަނޑުދަނޑިތަކަށް ޗައިނާއިން ދެއްވަމުން ގެންދަވާ އެހީތެރިކަމަށް ޝުކުރުވެރިވެ ވަޑައިގަތެވެ. މީގެއިތުރުން، ފާއިތުވި އަހަރުގެ ޖަނަވަރީ މަހު ޗައިނާއަށް ކުރެއްވި ދައުލަތުގެ ޒިޔާރަތަކީ ދެ ޤައުމުގެ ގުޅުން އިތުރަށް ބަދަހިކުރުމަށް މަގުފަހިވި ޒިޔާރަތެއްކަމުގައި ފާހަގަކުރެއްވިއެވެ.
ރައީސް ޑރ. މުޢިއްޒު ވަނީ ދެ ޤައުމުގެ ދެމެދުގައި ވެފައިވާ އެއްބަސްވުންތަކާއި މެމޮރެންޑަމް އޮފް އަންޑަސްޓޭންޑިންގތަކުގެ ދަށުން ކުރިއަށްދާ މުހިންމު އުމްރާނީ ތަރައްޤީގެ މަޝްރޫޢުތައް އަވަސްކުރުމުގެ މުހިންމުކަން ފާހަގަ ކުރައްވާފައެވެ. ޚާއްޞަކޮށް ދިވެހި ރައްޔިތުންނަށް އެންމެ ބޭނުންވެފައިވާ ބޯހިޔާވަހިކަމާއި މަގުތައް ތަރައްޤީ ކުރުމުގެ މަޝްރޫޢުތަކަށް އިސްކަން ދިނުމުގެ މުހިންމުކަން ފާހަގަ ކުރެއްވިއެވެ. މީގެއިތުރުން، އިޤްތިޞާދު ފުޅާކުރުމަށް، ޚާއްޞަކޮށް ދަނޑުވެރިކަމާއި މަސްވެރިކަމުގެ ދާއިރާ ކުރިއެރުވުމަށް ސަރުކާރުން ދެއްވާ އިސްކަމާއި، މި ދާއިރާތައް ކުރިއެރުވުމަށް ޗައިނާގެ އެހީތެރިކަން ބޭނުންވާކަން ފާހަގަ ކުރެއްވިއެވެ.
ރައީސް ޑރ މުއިއްޒުގެ މިވާހަކަފުޅަށް ޖަވާބުދެއްވަމުން، ވަޒީރު ވަންގ ޔީ ވިދާޅުވީ ރައީސް ޑރ. މުޢިއްޒަކީ ޗައިނާގެ ރަނގަޅު ރަޙްމަތްތެރިއެއް އަދި އިތުބާރު ހުރި ބައިވެރިއެއް ކަމަށެވެ. އަދި ރާއްޖޭގެ ތަރައްޤީއަށް ރައީސް ގެންގުޅުއްވާ ވިސްނުންފުޅަށް ތަޢުރީފުކުރައްވައި، ރާއްޖޭގެ ދެމެހެއްޓެނިވި ތަރައްޤީއަށް ޗައިނާގެ އެހީތެރިކަން ދެމިއޮންނާނެ ކަމުގެ ޔަގީންކަން ދެއްވިއެވެ. އަދި ކުރިއަށް ރޭވިފައިވާ ތަރައްޤީގެ މަޝްރޫޢުތައް އަވަސް ކުރުމަށް ޗައިނާ ސަރުކާރުގެ އެހީތެރިކަން ލިބިދެވޭނެކަން ޔަޤީންކޮށްދެއްވިއެވެ.
މި ބައްދަލުކުރެއްވުން ނިމުނީ ރައީސް ޑރ. މުޢިއްޒުގެ ޗައިނާ ދަތުރުފުޅުގައި އެއްބަސްވެވުނު ދިވެހިރާއްޖެ-ޗައިނާ ޖާމިޢު އިސްތިރާތީޖީ އެއްބާރުލުމުގެ ގުޅުން އިތުރަށް ކުރިއަރުވައި، ބައިނަލްއަޤްވާމީ މައިދާނުގައި ދެ ޤައުމުގެ އެއްބާރުލުން އިތުރަށް ވަރުގަދަކުރުމަށް ދެ ފަރާތުން އެއްބަސްވެވަޑައިގަތުމާއެކުގައެވެ.
މި ބައްދަލުކުރެއްވުމުގައި ވަޒީރު ވަންގ ޔީ ވަނީ ދިވެހިރާއްޖެއިން “ވަން-ޗައިނާ” ސިޔާސަތަށް ދެއްވާ އެއްބާރުލުމަށް ޝުކުރު އަދާކުރައްވާފައެވެ. އަދި ދެ ޤައުމުގެ މެދުގައި އޮތް އެއްބާރުލުމަކީ، ޤައުމުގެ ބޮޑުކުޑަމިނަކަށް ބެލުމެއްނެތި، ޤައުމުތަކަށް އެކުގައި މަސައްކަތްކޮށް ކުރިއެރުމާއި ފާގަތިކަން ހޯދިދާނެކަމުގެ ރަނގަޅު މިސާލެއްކަމުގައި ފާހަގަކުރެއްވިއެވެ.
ޗައިނާގެ ޚާރިޖީ ވަޒީރު ވަންގ ޔީއަކީ ޗައިނާގެ ކޮމިއުނިސްޓް ޕާޓީގެ ސެންޓްރަލް ކޮމިޓީގެ ޕޮލިޓިކަލް ބިއުރޯގެ މެންބަރެއް އަދި ސެންޓްރަލް ކޮމިޝަން ފޮރ ފޮރިން އެފެއާޒްގެ އޮފީހުގެ ޑައިރެކްޓަރުވެސް މެއެވެ. މި ބައްދަލުކުރެއްވުން ބޭއްވުނީ ރައީސް އޮފީހުގައި މިއަދު ހަވީރުއެވެ.