އާރްޑީސީގެ އަވަސް މަސައްކަތުން، މާފަންނު ސަހަރާގައި ބެހެއްޓިފައިވާ ސްޓޯމް ވޯޓަރ ޕަމްޕް ސްޓޭޝަނަށް ލިބިފައިވާ ގެއްލުން މަރާމާތުކޮށް، އަލުން ބޭނުންކުރެވޭ ހާލަތަށް ގެނެވިއްޖެއެވެ.
މި މަސައްކަތް ކުރިއަށް ގެންގޮސްފައިވަނީ ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)، މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ، އަދި ސްޓޭޓް އިލެކްޓްރިކް ކޮމްޕެނީ (ސްޓެލްކޯ) ގުޅިގެންނެވެ.
މާފަންނުސަހަރާގެ ސްޓޯމްވޯޓާ ޕަމްޕްސްޓޭޝަން ރަނގަޅުކުރަނީ / ފޮޓޯ:އާރްޑީސީ
މި ޕަމްޕް ސްޓޭޝަނަށް ގެއްލުން ލިބިފައިވަނީ މާލެ ސިޓީ ކައުންސިލުން މާފަންނު ސަހަރާގައި ކުރަމުންދިޔަ މަސައްކަތެއްގެ ތެރޭގައެވެ. ކައުންސިލުން ވަނީ ޕަމްޕް ސްޓޭޝަނަށް ލިބިދާނެ ގެއްލުމަކަށް އެއްވެސް ސަމާލުކަމެއް ނުދީ އެ ސަރަހައްދު ކޮނެފައެވެ. މީގެ ސަބަބުން މާލޭގެ ހުޅަނގު އުތުރު ފަރާތަށް ޚިދުމަތްދޭ ސްޓޯމް ވޯޓަރ ޕަމްޕް ސްޓޭޝަން ވަނީ ބޭނުން ނުކުރެވޭ ހާލަތަށް ގޮސްފައެވެ.
މާފަންނުސަހަރާގެ ސްޓޯމްވޯޓާޕަމްޕްސްޓޭޝަން ރަނގަޅުކުރަނީ / ފޮޓޯ:އާރްޑީސީ
މާލެއަށް ވާރޭ ވެހޭއިރު އެންމެ ބޮޑަށް ފެންބޮޑުވާ ސަރަހައްދުތަކުގެ ތެރޭގައި މާފަންނު ހިމެނޭތީ، މި މައްސަލަ ހައްލުކުރުމަކީ ވަރަށް މުހިންމު ކަމެއް ކަމުގައި ބެލެވެއެވެ.
މާފަންނު ސަހަރާގެ ސްޓޯމް ވޯޓާ ޕަމްޕް ސްޓޭޝަން ރަނގަޅު ކުރަނީ / ފޮޓޯ: އާރްޑީސީ
އާރްޑީސީގެ ޒިންމާދާރު މުވައްޒަފުންނާއި ސްޓެލްކޯގެ ހުނަރުވެރި މުވައްޒަފުން ގުޅިގެން، ޕަމްޕް ސްޓޭޝަނާއި އެތަނާ ގުޅިފައިވާ ނެޓްވޯކް ވަނީ ޗެކްކޮށް، ވަގުތީގޮތުން މަސައްކަތްކުރާ ހާލަތަށް ގެނެސްފައެވެ.