ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، އެސްޓޯނިޔާ އަށް ކުރައްވާ ރަސްމީ ދަތުރުފުޅުގައި ޑިޖިޓަލް އަދި ސައިބަރ އީ-ގަވަނެންސްގެ ދާއިރާއިން ދެ ޤައުމު ގުޅިގެން ކުރެވިދާނެ މަސައްކަތްތަކާ ބެހޭގޮތުން މަޝްވަރާކުރެއްވުމަށް ހަމަޖެހިފައިވާކަމަށް ހާމަކޮށްފިއެވެ.
ރާއްޖޭގެ ރައީސަކު އެސްޓޯނިއާއަށް ކުރައްވާ ފުރަތަމަ ރަސްމީ ދަތުރުފުޅު ކަމުގައިވާ މި ދަތުރުފުޅު ކުރިއަށްދާނީ މި މަހުގެ 13 ވަނަ ދުވަހުން 16 ވަނަ ދުވަހުގެ ނިޔަލަށެވެ.
އެސްޓޯނިޔާގެ ސަރުކާރުން ހާމަކުރައްވާފައިވާ ގޮތުގައި މި ދަތުރުފުޅުގެ ސަބަބުން ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިވެގެންދާނެއެވެ. އަދި ދެ ޤައުމުން ގުޅިގެން ސިޔާސީ، ޑިޖިޓަލް، ސައިބަރ އަދި އީ-ގަވަނަންސްގެ އިތުރުން މޫސުމީ ބަދަލުތަކާއި ތިމާވެށި އަދި ސައިންސާއި ތައުލީމާ ގުޅުންހުރި ރޮނގުތަކުން މަސައްކަތްކުރުމަށް މަގުފަހިވެގެންދާނެއެވެ.
ދަތުރުފުޅުގެ ފުރަތަމަ ދުވަހު، ރައީސް މުއިއްޒު އާއި އެސްޓޯނިޔާގެ ރައީސް އަލަރު ކަރިސް އާ ދެމެދު ރަސްމީ ބައްދަލުކުރެއްވުމެއް އޮންނާނެއެވެ. މި ބައްދަލުވުމުގައި ބައިނަލްއަޤުވާމީ މަޝްރަހުގައި ހިނގަމުންދާ މުހިއްމު ކަންކަމާއި، ބައިނަލްއަޤުވާމީ ޖަމިއްޔާތަކުގައި ގުޅިގެން މަސައްކަތްކުރުމާއި ދެ ގައުމުގެ ގުޅުން އިތުރަށް ބަދަހިކުރެވޭނެ ގޮތްތަކާ ބެހޭގޮތުން މަޝްވަރާކުރައްވާނެއެވެ.
ދަތުރުފުޅުގެ ދެވަނަ ދުވަހު، ރައީސް މުއިއްޒު “އީ-އެސްޓޯނިޔާ” އިމާރާތަށް ޒިޔާރަތްކުރައްވާ، އެސްޓޯނިޔާގެ އީޖާދީ އުފެއްދުންތަކާއި ޑިޖިޓަލް ކާމިޔާބީތައް ބައްލަވާލައްވާނެއެވެ. އަދި އެސްޓޯނިޔާގެ އެކި ވުޒާރާތަކުގެ ވަޒީރުންނާއި ބައްދަލުކުރައްވާ، ދެ ޤައުމުގެ ގުޅުން އިތުރަށް ބަދަހިކުރެވޭނެ ގޮތްތަކާ ބެހޭގޮތުން މަޝްވަރާކުރައްވާނެއެވެ.
މި ދަތުރުފުޅުގައި ދިވެހި ސަރުކާރުގެ ފަރާތުން ހާރިޖީ ވަޒީރު އަބްދުﷲ ޚަލީލާއި، ދާހިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން ބައިވެރިވެވަޑައިގަންނަވާނެއެވެ. އަދި ޕްރައިވެޓް ސެކްޓަރުން ވިމެން އިން ޓެކް އާއި ޖަވާބު ޕްރައިވެޓް ލިމިޓެޑުގެ އިސް ފަރާތްތަކުންވެސް ބައިވެރިވެވަޑައިގަންނަވާނެއެވެ.