ދިވެހިރާއްޖޭގައި ޤާއިމުކުރާ ސްޕެޝަލް އިކޮނޮމިކް ޒޯން (އެސް.އީ.ޒެޑް) ތަކުގައި ހިންގިދާނެ އިޤްތިޞާދީ މަސައްކަތްތަކާއި، އެއިން ޒޯނެއްގައި ހިމެނޭ ޖުމުލަ އިންވެސްޓްމަންޓުގެ އެންމެ ކުޑަ މިންގަނޑު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ކަނޑައަޅުއްވައިފިއެވެ.
މިކަން އިޢުލާނުކުރެއްވީ މިއަދު ދިވެހި ސަރުކާރުގެ ގެޒެޓުގައި ޝާއިޢުކުރެއްވި ނަންބަރު 1/2025 ޤަރާރުންނެވެ. މި ޤަރާރުގެ ދަށުން، އެސް.އީ.ޒެޑްގައި ހިންގިދާނޭ އިޤްތިޞާދީ މަސައްކަތްތައް ދެ ބަޔަކަށް ބަހާލައްވާފައިވެއެވެ.
ފުރަތަމަ ބައިގައި ހިމެނެނީ ޖުމުލަ 100 މިލިޔަން އެމެރިކާ ޑޮލަރަށްވުރެ ކުޑަނޫން އަދަދުގެ އިންވެސްޓްމަންޓްތަކެވެ. މީގެ ތެރޭގައި
- އެކްސްޕޯޓަށް އަމާޒުކޮށްފައިވާ މެނުފެކްޗަރިންގ،
- ޓްރާންސްޝިޕްމަންޓް ޕޯޓް،
- ޔުނިވަރސިޓީ އަދި ހޮސްޕިޓަލްތައް،
- އައި.ސީ.ޓީ ޕާކް،
- އިންޓަރނޭޝަނަލް ފައިނޭންޝަލް ސަރވިސަސް،
- އިޢާދަ ކުރަނިވި ހަކަތަ،
- ގޭސް އެކްސްޕްލޮރޭޝަންގެ މަސައްކަތްތައް
ދެވަނަ ބައިގައި ހިމެނެނީ ޖުމުލަ 500 މިލިޔަން އެމެރިކާ ޑޮލަރަށްވުރެ ކުޑަނޫން އަދަދެއްގެ އިންވެސްޓްމަންޓް ހިމެނޭގޮތަށް ތަރައްޤީ ކުރުމަށް ހުށަހަޅާ ސަސްޓެއިނަބަލް ޓައުންޝިޕް ޑިވެލޮޕްމަންޓް މަޝްރޫޢުތަކެވެ. މި މަޝްރޫޢުތަކުގައި މިނިމަމް އިންވެސްޓްމަންޓުގެ ގޮތުގައި ކަނޑައަޅައިފައިވާ 500 މިލިޔަން އެމެރިކާ ޑޮލަރު ޚާއްޞަ ކުރަންވާނީ ސަސްޓެއިނަބަލް ޓައުންޝިޕް ޑިވެލޮޕްމަންޓުގެ ކޮމްޕޯނަންޓްތަކަށެވެ.
މި ޤަރާރު ނެރުއްވުމުގެ މަޤްޞަދަކީ ރާއްޖޭގެ އިޤްތިޞާދީ ކުރިއެރުމަށް މަގުފަހިކޮށް، ބޭރުގެ އިންވެސްޓަރުންނަށް ރާއްޖޭގައި އިންވެސްޓްކުރުމަށް ހިތްވަރުދިނުމެވެ.