ރައީސް ޑރ.މުޢިއްޒުގެ އިރުޝާދާ އެއްގޮތަށް، ވިއްސާރައިގައި ލިބޭ ގެއްލުންތައް ކުޑަ ކުރުމަށް ޓާސްކު ފޯހެއް އެކުލަވާލަައިފިއެވެ. މިއީ ކުރިއަށް އޮތް 5 ދުވަހު ރާއްޖޭގެ މޫސުން ގޯސްވެ ބޯ ވިއްސާރައިގައި ލިބިދާނެ އެކިކަހަލަ ގެއްލުންތައް ކުޑަކުރުމަށް އެކުލަވައިލެވުނު ޓާސްކު ފޯހެކެވެ.
ކޮމިޝަނާ އޮފް ޕޮލިސް އަލީ ޝުޖާއު ވިދާޅުވީ، ވިއްސާރައިގައި ލިބިދާނެ ގެއްލުންތަކުން ރައްކާތެރިވުމަށް ރައީސް ޑރ. މުޢިއްޒުގެ އިރުޝާދުފުޅުގެ މަތިން ޓާސްކު ފޯހެއް އެކުލަވައިލައިފައިވާ ކަމަށެވެ. ޝުޖާއު މިހެން ވިދާޅުވެފައިވަނީ މިއަދު ފުލުހުންނާއި އެމްއެންޑީއެފްއާއި އެންޑީއެމްއޭ ގުޅިގެން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުންނެވެ.
“ރައީސް ދެއްވާފައިވާ އިރުޝާދުތަކުގެ ތެރޭގައި ފުލުހުންނާއި ސިފައިން އެންމެ ބޮޑަށް ގެއްލުން ލިބޭނެ ކަމަށް ލަފާކުރެވޭ ރަށްރަށުގައި ފެން ހިންދުމުގެ އިތުރުން ރައްޔިތުންނަށް ފޯރުކޮށްދޭން ޖެހޭ އެހީތެރިކަން ފޯރުކޮށްދިނުމުގައި އެހީތެރިކަން ފޯރުކޮށްދިނުމަށް. ފުލުހުންނާއި ސިފައިން ވާރޭވެހެން ފެށޭ ހިސާބަށް ފެން ހިންދުމުގެ މަސައްކަތް ކުރަމުންދާއިރު ފެންބޮޑުވާ ސަރަހައްދުގައި ދިރިއުޅޭ ރައްޔިތުންނަށާއި ވިޔަފާރިކުރާ ތަންތަނަށް ލިބޭ ގެއްލުންތައް ކުޑަކުރުމަށް 24 ގަޑިއިރު ހަރަކާތްތެރިވެ އެހީތެރިކަން ފޯރުކޮށްދެވޭ މިންވަރަށް ސިފައިންނާއި ފުލުހުން ގާއިމް ކުރެވިގެންދާނެ.” ޝުޖާއު ވިދާޅުވިއެވެ.
އެން.ޑީ.އެމް.އޭ އިން ވަނީ ޖެނުއަރީ 13 އިން 18 އަށް ރާއްޖޭގެ ބޮޑު ބަޔަކަށް މޫސުން ވަރަށް ގޯސްވާނެ ކަމަށް ލަފާކުރެވޭތީ، ލިބިދާނެ ގެއްލުންތަކުން ދުރާލާ ރައްކާތެރިވުމަށް އިލްތިމާސްކޮށްފައެވެ. އަދި އެން.ޑީ.އެމް.އޭގެ ހޮޓްލައިން 115 އަށް ގުޅައިގެން މޫސުމުގެ ސަބަބުން ލިބޭ ގެއްލުން ރިޕޯޓްކުރުމަށާއި އެހީ ހޯދުމުގެ އިންތިޒާމް ހަމަޖައްސާފައިވެއެވެ.
އަދި ބޯކޮށް ވާރޭވެހި މާލޭގައި ފެން ބޮޑުވެއްޖެނަމަ އޭގެ އަސަރު ކުރާނެ ކަމަށް ލަފާކުރެވޭ 56 ގޭބިސީއެއްގައި ވެލި ބަސްތާ މިހާރު ވަނީ ޖަހާފައެވެ.