ސްޓެލްކޯގެ މުވައްޒަފަކަށް ނުރައްކާތެރި ޙަމަލާއެއް ދިން ހާދިސާއާ ގުޅިގެން، ވައްކަމުގެ މައްސަލަތައް އިތުރުވަމުންދާކަމަށް ވިދާޅުވެ، ސްޓެލްކޯގެ އެމްޑީ ހުސައިން ފަހުމީ ކަންބޮޑުވުން ފާޅުކޮށްފި އެވެ.
ހުޅުމާލޭގައި ހުރި ސްޓެލްކޯގެ ޓްރާންސްފޯމަރަކަށް ގެއްލުންދީ ވައްކަންކުރަން އުޅުނު މީހަކު ވަނީ އެތަނަށް ދިޔަ ކުންފުނީގެ މުވައްޒަފަކަށް ނުރައްކާތެރި ޙަމަލާއެއް ދީފައެވެ. ރޭގައި މީހަކު ދިން މި ޙަމަލާގައި މުވައްޒަފުގެ ބޮލުގައި ބޮޑު ރެންޗަކުން ޖަހާފައިވާކަމަށް އެމްޑީ ފަހުމީ ވަނީ ވިދާޅުވެފައެވެ.
"ރޭ އަޅުގަނޑުމެންގެ މުވައްޒަފަށް ދިން އަނިޔާވެރި ޙަމަލާގައި ބޮޑު ރެންޗަކުން އޭނާގެ ބޮލުގައި ޖަހާފައިވޭ. މިއީ އޭނާއަށް ދާއިމީ ނުކުޅެދުންތެރިކަމެއް ކުރިމަތިވެދާނެ ފަދަ، އަދި ފުރާނައަށްވެސް ނުރައްކާވެދާނެ ފަދަ ޙަމަލާއެއް. އޭނާގެ ފުރާނަ ސަލާމަތްވެފައި މިވަނީ ވަރަށް ހަނި ގޮތަކަށް،" ފަހުމީ ވިދާޅުވިއެވެ.
މި ޙާދިސާ ހިނގާފައިވަނީ ހުޅުމާލޭ ދެވަނަ ފިޔަވަހީގެ އެމްޕީއެލް ޓަވަރުތަކުގެ ސަރަޙައްދުގައެވެ. ޓްރާންސްފޯމަރަށް ގެއްލުން ދިނުމާ ގުޅިގެން އެ ސަރަޙައްދުގެ ކަރަންޓު ވަނީ ކެނޑިފައެވެ. ސްޓެލްކޯއިން ބުނީ ވީ އެންމެ އަވަހަކަށް ކަރަންޓުގެ ޚިދުމަތް އަލުން ފޯރުކޮށްދިނުމަށް މަސައްކަތްކުރަމުންދާ ކަމަށެވެ.
ފަހުމީ ވިދާޅުވީ މިފަދަ ޙާދިސާތަކަކީ ހަމައެކަނި ސްޓެލްކޯއަށް ލިބޭ ގެއްލުމެއް ނޫން ކަމަށެވެ. "މީގައި އޮތް އެންމެ ބޮޑު އެއް ނުރައްކަލަކީ ވައްކަންކުރަން އުޅުމުގެ ތެރޭގައި ނުބައި ސްވިޗަކަށް ޖެއްސިއްޖެނަމަ ބާރުގަދަ ކަރަންޓް ޑިސްޓްރިބިއުޓްވެ ގޭބިސީތަކަށް ފޯރުމުން އެތައް ސަތޭކަ ބައެއްގެ ފުރާނައަށްވެސް ނުރައްކާވެދާނެ،" އެމަނިކުފާނު ވިދާޅުވިއެވެ.
ދާދި ފަހުން ސްޓެލްކޯގެ ތަންތަނަށް ދީފައިވާ ތިން ގެއްލުމުގެ ސަބަބުން ލިބުނު މާލީ ގެއްލުމުގެ އަގު 3 މިލިއަން ރުފިޔާއަށްވުރެ މަތިވާނެ ކަމަށް އަންދާޒާކުރެވޭ ކަމަށް ފަހުމީ ވިދާޅުވިއެވެ. އަދި މިއީ ޙަޤީޤަތުގައި ރައްޔިތުންނަށް ލިބޭ ގެއްލުމެއްކަންވެސް ފާހަގަކުރެއްވިއެވެ.
މި ޙާދިސާގައި ޙަމަލާދިން މީހާ ވަނީ ފުލުހުންނާ ޙަވާލުކުރެވިފައެވެ. އަދި އަނިޔާ ލިބުނު މުވައްޒަފު ދެއްކި ހިތްވަރު ދެނެގަނެވޭނެ ކަމަށާއި، ކުންފުނީގެ މުވައްޒަފުންނަށް ކުރިމަތިވާ ކޮންމެ ނުރައްކަލަކަށް އެންމެ ސީރިއަސްކަމާއެކު ޙައްލު ހޯދައިދެއްވާނެ ކަމުގެ ޔަޤީންކަން ފަހުމީ ވަނީ ދެއްވާފައެވެ.