ވެލާނާ އިންޓަރނޭޝަނަލް އެއަރޕޯޓުގެ ޕޭ ޕާކިންގ ސަރަޙައްދުން ނުކުމެ ސައިކަލެއް އެއަރޕޯޓުން ނުކުންނަން ދިޔަ ކާރެއްގައި ޖެހި އެކްސިޑެންޓެއް ހިނގައިފިއެވެ. ފުލުހުން މީޑިއާތަކަށް ފޮނުވި މެސެޖެއްގައި ބުނީ ވީއައިއޭގެ ޕޭޕާކިންގ ސަރަހައްދުގައި ހިނގި އެކްސިޑެންޓެއްގެ މައްސަލަ މިއަދު ހަވީރު 4:20 އެހައިކަށްހާއިރު ފުލުހުންނަށް ރިޕޯޓްކޮށްފައިވާ ކަމަށެވެ.
މި އެކްސިޑެންޓްގައި ސައިކަލު ދުއްވި އަންހެން މީހާއަށް އަނިޔާވެގެން ފަރުވާ ދިނުމަށް ހޮސްޕިޓަލަށް ގެންގޮސްފައިވާ ކަމަށް ފުލުހުން ވަނީ ބުނެފައެވެ. އަނިޔާވި މީހާގެ ޙާލަތާ ބެހޭ އިތުރު މަޢުލޫމާތެއް މި ވަގުތު ލިބިފައެއް ނުވެއެވެ.
މި އެކްސިޑެންޓުގެ ތަސްވީތުތަކާއި ވީޑިއޯތަކުން ފެންނަ ގޮތުގައި އެކްސިޑެންޓު ހިނގި ސަރަހައްދުގައި ސައިކަލަކާއި އަންހެނަކު ވެއްޓިފައި އޮތެވެ. ކެބިންކްރޫއެއްގެ ހެދުމުގައި އޮތް އެއަންހެން މީހާ ވެއްޓިފައި ހަރަކާތެއް ނެތި އޮތް މަންޒަރު ފޮޓޯއާއި ވީޑިއޯއިން ސާފުކޮށް ފެނެއެވެ.
މި މައްސަލައިގެ އިތުރު ތަފްސީލެއް ފުލުހުން ހާމަކޮށްފައެއް ނުވެއެވެ.
ނަމަވެސް، ފުލުހުން ބުނީ މިމައްސަލަ އިތުރަށް ތަހުގީގު ކުރަމުން ގެންދާ ކަމަށެވެ.