ދައުލަތުގެ އޮފީސްތަކުންނާއި ޓޫރިޒަމް މިނިސްޓްރީން އެއްވެސް ފަރާތަކަށް ދައްކަންޖެހޭ ފައިސާއެއް މާފުކޮށްދިނުމާއި ލުއިދިނުމުގައި އަމަލުކުރާނެ އުސޫލެއް މިއަދު ފިނޭންސް މިނިސްޓްރީން އާންމުކޮށްފިއެވެ. މި އުސޫލުގެ ދަށުން، އެފަދަ ލުއިތަކާއި މާފުތައް ދެވޭނީ ރައީސުލްޖުމްހޫރިއްޔާގެ ހުއްދަ ހޯދުމަށްފަހުގައެވެ.
މި އުސޫލުގެ ދަށުން، ކައުންސިލްތައް ފިޔަވައި ދައުލަތުގެ އެހެން އޮފީސްތަކުން މުއާމަލާތެއްގައި މީހަކަށް ލުޔެއް، މަންފާއެއް ނުވަތަ މާފު ދިނުމަށް ހުށަހަޅާ ހާލަތްތަކުގައި، އެންމެ ފުރަތަމަ ބަންޑާރަ ނައިބުގެ އޮފީހުން ދެކޭގޮތް ހޯދަންޖެހެއެވެ. އަދި އޭގެފަހުން، ބަންޑާރަ ނައިބުގެ ލަފާއާއެކު ފިނޭންސް މިނިސްޓްރީއަށް ހުށަހަޅަންޖެހެއެވެ.
ފިނޭންސް މިނިސްޓަރަށް ލުއިދިނުމަށް ނުވަތަ މާފުކޮށްދިނުމަށް ފެނިވަޑައިގަންނަވާ ހާލަތްތަކުގައި، ރައީސުލްޖުމްހޫރިއްޔާގެ ހުއްދަ ހޯދަންޖެހޭނެއެވެ. ރައީސް ހުއްދަ ނުދެއްވާ ހާލަތުގައި، ކުރިއަށް ގެންދާނެ ގޮތެއް ކަނޑައަޅާނީ ރައީސްގެ އިރުޝާދުގެ ދަށުން ފިނޭންސް މިނިސްޓަރެވެ.
ޓޫރިޒަމް ގާނޫނުގެ ދަށުން ސަރުކާރަށް ދައްކަންޖެހޭ ކުއްޔާއި ޖޫރިމަނާ އަދި އިންޓްރެސްޓް ފަދަ ފައިސާ ބަހާލައިގެން ދެއްކުމަށް ލުއިދިނުމާއި މާފުކޮށްދިނުމަށް ނިންމާ ހާލަތްތަކުގައިވެސް ރައީސްގެ ހުއްދަ ހޯދަންޖެހޭނެކަމަށް އުސޫލުގައި ބަޔާންކޮށްފައިވެއެވެ. މިފަދަ ލުއިތައް ދެވޭނީ ފުރަތަމަ ދައްކަންޖެހޭ އަޕްފްރަންޓް ފައިސާ އެއްކޮށް ދައްކައި ހަލާސްކުރުމުންނެވެ.
އެހެންނަމަވެސް، ލޯކަލް ކައުންސިލްތަކަށް މިފަދަ ލުއިތަކާއި މާފުތައް ދިނުމުގައި ރައީސްގެ ހުއްދަ ހޯދާކަށް ނުޖެހެއެވެ. ކައުންސިެއެވެ. ކައުންސިލްތަކަށް އެމީހުންގެ ޖަލްސާއަކުން ފާސްކޮށްގެން މިފަދަ ނިންމުންތައް ނިންމިދާނެއެވެ. ނަމަވެސް، މިފަދަ ނިންމުމެއް ނިންމައިފިނަމަ، 7 ދުވަހުގެ ތެރޭގައި ފިނޭންސް މިނިސްޓްރީއާއި ލޯކަލް ގަވަރމަންޓް އޮތޯރިޓީއަށް އަންގަންޖެހޭނެއެވެ.