މޯލްޑިވްސް ބްރޯޑްކާސްޓިންގ ކޮމިޝަނުގެ (ބްރޯޑްކޮމް) މެމްބަރުކަމަށް އިހަވަންދޫ ދާއިރާގެ ކުރީގެ މެމްބަރު މުހައްމަދު އަބްދުﷲ (މުހައްމާ) އަދި ބްރޯޑްކޮމްގެ ކުރީގެ މެމްބަރު އަލްއުސްތާޛާ އާމިނަތު ސަރާހަތު އިއްޒަތު އައްޔަނު ކުރުމަށް ރައްޔިތުންގެ މަޖިލީހުން ފާސްކޮށްފިއެވެ.
މިނިވަން މުއައްސަސާތަކާ ބެހޭ ކޮމިޓީގެ ރިޕޯޓުގައިވާ ނަންތަކަށް މި ޖަލްސާގައި ވޯޓަށް އެހުމުން، ސަރާހަތު އެ މަޤާމަށް އައްޔަނު ކުރުމަށް ފެންނަކަމަށް 68 މެމްބަރުން ވޯޓު ދެއްވިއެވެ. އަދި މުޙައްމަދު އަބްދުﷲ އެ މަޤާމަށް އައްޔަނު ކުރުމަށް ފެންނަކަމަށް 58 މެމްބަރުން ވޯޓު ދެއްވިއެވެ.
ބްރޯޑްކޮމްގެ ހުސްވެފައިވާ މަޤާމުތަކަށް ބޭފުޅުން އައްޔަނުކުރުމަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަޖިލީހަށް ފޮނުވި ލިސްޓަށް ބޮޑެތި ބަދަލުތަކެއް އައިސްފައިވާކަން ފާހަގަކުރެވެއެވެ. ރައީސް މަޖިލީހަށް ފޮނުއްވި ސިޓީގައި ވަނީ ބްރޯޑްކޮމްގެ މެންބަރުކަމަށް ކުރިމަތިލުމަށް އާންމުކޮށް އިޢުލާނުކުރުމުން އެކަމަށް އިޖާބަ ދެއްވި ބޭފުޅުންގެ ތެރެއިން އެ މަޤާމަށް ޝަރުތު ހަމަވާ ބޭފުޅުންގެ ނަންފުޅާއި މަޢުލޫމާތު، އެ މަޤާމުތަކަށް އައްޔަންކުރުމަށް އިސްކަންދޭ ތަރުތީބުން ހުށަހަޅުއްވާފައެވެ.
އެހެންނަމަވެސް، މިނިވަން މުއައްސަސާތަކާ ބެހޭ ކޮމިޓީގެ ރިޕޯޓު އެކުލެވިގެން އައިއިރު، މުހައްމަދު އަބްދުﷲ (މުހައްމާ) ގެ ނަން އޮތީ ލިސްޓުގެ 3 ވަނައިގައެވެ. 89 އިންސައްތައާއެކު އެންމެ މަތިން މާކްސް ލިބިވަޑައިގެން ލިސްޓުގެ ކުރީގައި އޮތީ އެ ކޮމިޝަންގެ މެމްބަރުކަންވެސް ކުރައްވާފައިވާ އުސްތާޛާ އާމިނަތު ސަރާހަތު އިއްޒަތެވެ. 84 އިންސައްތައާއެކު ލިސްޓުގެ ދެވަނައިގައި އޮތީ ތަޖުރިބާކާރު ނޫސްވެރިޔާ ޝިފްޒާ މުސްތަފާއެވެ.