ރާއްޖޭގެ ގައުމީ އެއާލައިން، މޯލްޑިވިއަންގެ ފުރަތަމަ ވައިޑް-ބޮޑީ އެއާކްރާފްޓް، އޭ330 މަތިންދާބޯޓުން ޗައިނާއަށް ކުރާ ދަތުރުތަކަށް ޓިކެޓް ވިއްކަން ފަށައިފިއެވެ. މި ބޯޓުގެ ފުރަތަމަ މަންޒިލަކީ ޗައިނާގެ ޗެންގްޑޫ ކަމަށްވާއިރު، އެ ސިޓީއަށް ދެކޮޅު ޓިކެޓެއްގެ އަގަކީ 688 ޑޮލަރު (10،610 ރުފިޔާ) އެވެ.
މޯލްޑިވިއަން އިން މަޢުލޫމާތު ދީފައިވާ ގޮތުގައި، ޗެންގްޑޫއަށް ފުރަތަމަ ދަތުރު އޮންނާނީ މި މަހުގެ 22 ވަނަ ދުވަހުއެވެ. މީގެ އިތުރުން، ޗައިނާގެ ބެއިޖިންގ އަށް ދެކޮޅު ޓިކެޓެއްގެ އަގު 788 ޑޮލަރު (12،151 ރުފިޔާ) އަދި ޝެންހާއީއަށް 777 ޑޮލަރު (11،981 ރުފިޔާ) އަށް ހަމަޖައްސާފައިވެއެވެ. ބެއިޖިންގއަށް ދަތުރުތައް ފަށާނީ މި މަހުގެ 24 ވަނަ ދުވަހު ކަމަށާއި، ޝެންހާއީއަށް ދަތުރުތައް ފަށާނީ 27 ވަނަ ދުވަހު ކަމަށް އެއާލައިނުން ބުނެފައިވެއެވެ.
މޯލްޑިވިއަންގެ މި އާ މަތިންދާބޯޓު ރާއްޖެއަށް ގެނެސްފައިވަނީ މިދިޔަ ހަފުތާގެ ހޯމަ ދުވަހުއެވެ. އެއާބަސް އޭ330 ބޯޓުގައި 260 މީހުން އުފުލޭނެ ކަމަށާއި، ބިޒްނަސް، ޕްރިމިއަމް އިކޮނޮމީ އަދި އިކޮނޮމީ ކްލާސްތައް ހިމެނޭ ގޮތަށް ފަރުމާކޮށްފައިވާ މި ބޯޓުން ދުރު ރާސްތާގެ ދަތުރުތައް ކުރެވޭނެއެވެ. މީގެ އިތުރުން، މި ބޯޓުގައި 10 ޓަނުގެ ކާގޯ އުފުލޭނެ ކަމަށް އެއާލައިނުން ހާމަކޮށްފައިވެއެވެ.
ދަތުރުކުރާ ކޮންމެ ފަސިންޖަރަކަށް 40 ކިލޯގެ ބެގޭޖު އުފުލޭނެ ކަމަށް މޯލްޑިވިއަން އިން ބުނެފައިވެއެވެ. މި އާ އޭ330 ބޯޓާއެކު، މޯލްޑިވިއަން އެއާލައިންގެ ފްލީޓުގެ އަދަދު 25 އަށް އިތުރުވެގެންދާނެއެވެ. މިހާރު އެއާލައ. މިހާރު އެއާލައިނުން 29 މަންޒިލަކަށް ދަތުރުތައް ކުރަމުންދާ ކަމަށް އެ ކުންފުނިން މަޢުލޫމާތު ދީފައިވެއެވެ.