ހުކުމް ތަންފީޒު ކުރަމުންދާ މަސްތުވާތަކެއްޗަށް ދެވިހިފާފައިވާ ފަރާތްތަކަށް ޖަލުގައި ފަރުވާ ދިނުމަށްޓަކައި ނޭޝަނަލް ޑްރަގް އޭޖެންސީ (އެންޑީއޭ) އާއި މޯލްޑިވްސް ކަރެކްޝަނަލް ސަރވިސް ގުޅިގެން މަސައްކަތް ފަށައިފިއެވެ.
މިއަދު ބޭއްވުނު ބައްދަލުވުމެއްގައި، ޤާނޫނު ނަންބަރު 17/2011 (މަސްތުވާތަކެއްޗާ ބެހޭ) ޤާނޫނުގެ 102 ވަނަ މާއްދާގައިވާ ގޮތުގެމަތީން، ޖަލުގައި މަސްތުވާތަކެތީގެ ފަރުވާގެ ޕްރޮގްރާމް ގާއިމްކުރުމަށް ދެ އިދާރާގެ ފަންނީ ޕެނަލްއެއް އެކުލަވާލައި، މަސައްކަތް ކުރާނެ ގޮތުގެ ތާވަލެއް އެކުލަވާލުމަށް ނިންމިއެވެ. މި ބައްދަލުވުމުގައި އެންޑީއޭގެ ޓެކްނިކަލް ޓީމާއި ކަރެކްޝަނަލް ސަރވިސްގެ އިސްވެރިން ބައިވެރިވިއެވެ.
އެންޑީއޭގެ ފަރާތުން މަޢުލޫމާތު ދިން ގޮތުގައި، މި ޚިދުމަތް ރަސްމީކޮށް އިފްތިތާޙްކުރުމަށްޓަކައި ކުރެވޭ ކަންތައްތަކުގެ ތަފްޞީލު މީޑިޔާއާ ޙިއްޞާކުރަމުން ދާނެއެވެ. މީގެ އިތުރުން، މި ބައްދަލުވުމުގައި އެޖެންސީގެ ރީއިންޓެގްރޭޝަން މަސައްކަތްތައް ހަރުދަނާކުރުމާއި، ފަރުވާގެ ނިޒާމުގެ ތެރޭގައި އުޅެމުންދާ ކްލައިންޓުން މޮނިޓަރކޮށް ބެލެހެއްޓުން ހަރުދަނާކުރުމަށް އިތުރު ފިޔަވަޅުތަކެއް އެޅުމަށްވެސް ނިންމާފައިވެއެވެ.
މި މަސައްކަތަކީ މަސްތުވާތަކެތީގެ ވަބާއިން މުޖުތަމަޢު ސަލާމަތްކުރުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން އެއް މަސައްކަތެވެ.