މާލޭގެ އާޓީފިޝަލް ބީޗުގައި ބިދޭސީންތަކެއްގެ މެދުގައި މިރޭ އަނެއްކާވެސް މާރާމާރީއެއް ހިންގައިފިއެވެ. މި ހާދިސާއާ ގުޅިގެން އިންޑިއާއަށް ނިސްބަތްވާ ތިން ފިރިހެނަކު ވަނީ ހައްޔަރުކޮށްފައެވެ.
ފުލުހުން ބުނީ، މި މައްސަލަ ފުލުހުންނަށް ރިޕޯޓުކޮށްފައިވަނީ މިރޭ 8:30 އެހާކަންހާއިރު ކަމަށެވެ. މާރާމާރީ ހިންގި މީހުންގެ މަންޒަރު ރިކޯޑުކުރަން އުޅުނު ދިވެހި ރައްޔިތަކަށްވެސް ބިދޭސީން ހަމަލާދީ މާރާމާރީ ހިންގާފައިވާ ކަމަށް ފުލުހުން ވަނީ ބުނެފައެވެ.
މިއީ އާޓީފިޝަލް ބީޗުގައި ބިދޭސީން ހިންގި ފުރަތަމަ މާރާމާރީއެއް ނޫނެވެ. މީގެ ކުރިން، 2022 ވަނަ އަހަރުގެ ޑިސެމްބަރު މަހުގެ 6 ވަނަ ދުވަހުވެސް ބިދޭސީންތަކެއް ވަނީ އެތަނުގައި މާރާމާރީއެއް ހިންގާފައެވެ. އެ މާރާމާރީގައި އިސްކޮށް އުޅުނު ކަމަށް ބުނެވުނު މީހާ ހައްޔަރުކޮށް، އޭނާ ޑިޕޯޓުކުރުމުގެ މަސައްކަތް ކުރަމުންދާ ކަމަށް މޯލްޑިވްސް އިމިގްރޭޝަނުން އޭރު ބުނެފައިވެއެވެ. ނަމަވެސް، މިއަދާ ހަމައަށްވެސް އެ ފަރާތް ޑިޕޯޓުކުރި ކަމުގެ މަޢުލޫމާތެއް އިމިގްރޭޝަނުން ހާމަކޮށްފައެއް ނުވެއެވެ.
މީގެއިތުރުންވެސް ކޮންމެ ހުކުރުދުވަހެއްގައި އެސަރަހައްދުގައި ބިދޭސީން ގިނަވުން އާންމުވެފައިވާއިރު މިފަހަކަށް އައިސް ކޮންމެ ހުކުރެއްގައި ކަހަލަ ގޮތަކަށް ބިދޭސީންގެ ކޮންމެވެސް ޒުވާބުކުރުމެއް ނޫނީ ތަޅާފޮޅުމެއް އެސަރަހައްދުން ފެނެއެވެ.
މި ރޭގެ ހާދިސާއާ ގުޅިގެން، ފުލުހުން ވަނީ އިންޑިއާގެ 3 މީހަކު މިރޭ ހައްޔަރު ކޮށްފައެވެ.