މަސްތުވާތަކެތީގެ ވަބާގައި ޖެހިފައިވާ މީހުން މުޖްތަމަޢުގައި ބައިތިއްބައިގެން ދޭ ކޮމިއުނިޓީ ރީހެބިލިޓޭޝަން ފަރުވާ ދޭނީ ޑިޓޮކްސިފިކޭޝަން ސެންޓަރުތައް ބަންދުނުކޮށް ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާގެ ސްޓޭޓް މިނިސްޓަރ އަލްއުސްތާޛާ ލުބްނާ މުޙައްމަދު ޒާހިރު ޙުސައިން ވިދާޅުވެއްޖެއެވެ.
ލުބްނާ މިހެން ވިދާޅުވީ އިއްޔެ ޕީއެސްއެމްގެ ރާއްޖެ މިއަދު ޕްރޮގްރާމުގައި ވާހަކަ ދައްކަވަމުންނެވެ. މަސްތުވާތަކެތީގެ މައްސަލައަކީ ރާއްޖެއަށް ކުރިމަތިވެފައިވާ އިޖްތިމާޢީ އެންމެ ބޮޑު އެއް މައްސަލަ ކަމަށާއި، މިމައްސަލައަށް އެކަށީގެންވާ ހައްލެއް ގެންނެވުމަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ވަޢުދުފުޅެއް ކަމަށް އޭނާ ފާހަގަކުރެއްވިއެވެ.
ނޭޝަނަލް ޑްރަގް އެޖެންސީ (އެންޑީއޭ)ގެ ޗެއަރޕާސަންވެސް ކަމުގައިވާ ލުބްނާ ވިދާޅުވީ، މުޖްތަމަޢުގައި ބައިތިއްބައިގެން ދޭ ފްބައިގެން ދޭ ފަރުވާގެ އެންމެ ފުރަތަމަ ފިޔަވަޅަކީ ޑިޓޮކްސިފިކޭޝަން ކަމަށެވެ. އެގޮތުން މި ފަރުވާ ހޮސްޕިޓަލްތައް މެދުވެރިކޮށް ފަށާނީ ޑޮކްޓަރުންގެ އެހީގައި ބޭސް ދީގެން ކަމަށް އޭނާ ވިދާޅުވިއެވެ.
"އަޅުގަނޑުމެން މި މެޑިކަލީ އެސިސްޓެޑް ޓްރީޓްމެންޓް މި ފަށަނީ ޑޮކްޓަރުންނާއި ގުޅިގެން ބޭހުގެ ޒަރީއްޔާއިން. އޭގެ މާނައަކީ ބެލެނިވެރިންނަށް ގޭގައި ނުބެލެހެއްޓޭ ކުދިން، ގޭގައި ބަހައްޓައިގެން ފަރުވާއެއް ނުދޭނެއޭ،" ލުބްނާ ވިދާޅުވިއެވެ.
މިގޮތަށް ފަރުވާ ދޭން ފެށިނަމަވެސް މިހާރު ހިންގަމުންދާ ޑިޓޮކްސިފިކޭޝަން ސެންޓަރުތައް ބަންދު ނުކުރާނެ ކަމަށް އެންޑީއޭއިން ވިދާޅުވެއެވެ. ޑިޓޮކްސިފިކޭޝަން ސެންޓަރުތަކުގައި މިހާރު ދެމުންދަނީ މެތަޑޯން ފަރުވާއެވެ. ނަމަވެސް މުޖްތަމަޢުގައި ބައިތިއްބައިގެން ދޭ ފަރުވާ ދޭނީ ޑޮކްޓަރުންގެ އެހީގައި ބިއުޕްރިނޯފިން ދީގެން ކަމަށް އެންޑީއޭއިން ވިދާޅުވެއެވެ.
ލުބްނާ އިތުރަށް ވިދާޅުވީ މުޖްތަމަޢުގައި ބަހައްޓައިގެން ފަރުވާ ދިނުމަށް މަޖުބޫރު ނުކުރާނެ ކަމަށާއި، ފަރުވާގެ ނިޒާމަށް މީހުން ނަގާނީ އެކަމުގެ އެސެސްމެންޓު ހެދުމަށް ފަހު ކަމަށެވެ. އަދި ފަރުވާގެ ނިޒާމުގެ ތެރޭގައި ރިކަވަރީ ސަޕޯޓު ދޭނެ ޖަމްޢިއްޔާތައް ވަރަށް ބޮޑަށްބޭނުންވެފައިވާ ކަމަށް އޭނާ ފާހަގަކުރެއްވިއެވެ.
"މިއާއެކު އަޅުގަނޑުމެންނާއެކު މަސްތުވާތަކެއްޗާއި ދެކޮޅަށް މަސައްކަތް ކުރާނެ މަސްތުވާތަކެތީގެ ފަރުވާގެ ނިޒާމުގެ ތެރޭގައި ރިކަވަރީ ސަޕޯޓް ކުރާނެ އެންޖީއޯތައް އަޅުގަނޑުމެން ވަރަށް ބޮޑަށް ބޭނުން. ޚާއްސަގޮތެއްގައި. މިއަހަރު ތެރޭ މިފަދަ އެންޖީއޯތަކަށް ފައިނޭންޝަލް ސަޕޯޓް ދެވޭނެ ގޮތަކަށް އަޅުގަނޑުމެން މަސައްކަތްތައް ބައްޓަން ކުރަމުން އެމަސައްކަތްވެސް އަޅުގަނޑުމެން، މިހާރު ބޯޑުން އެބަކުރިއަށް ގެންދަން،" ލުބްނާ ވިދާޅުވިއެވެ.
މީގެ އިތުރުން، މުޖްތަމަޢުގައި ބައިތިއްބައިގެން ފަރުވާ ދިނުމުގެ ނިޒާމު ޤާއިމް ކުރެވޭއިރު ސައިކޯ ސޯޝަލް ސަޕޯޓް ދިނުމުގެ ނިޒާމު ވަރުގަދަ ކުރަންޖެހޭކަމަށް ލުބްނާ ވިދާޅުވިއެވެ. އެހެންކަމުން އެކަމަށް މީހުން ބިނާކުރުމުގެ މަސައްކަތް ކުރަމުންދާކަން އޭނާ ފާހަގަކުރެއްވިއެވެ.
ސަރުކާރުން މި ނިޒާމު ޤާއިމް ކުރަމުންދާއިރު، ޑިޓޮކްސިފިކޭޝަން ފަރުވާ ދިނުމަށް ސެންޓަރުތަކުގައި ޖާގައިގެ ދަތިކަން ހުރިކަން ލުބްނާ ފާހަގަކުރެއްވިއެވެ. އެހެންވުމުން ފަރުވާއަށް އެދި ތިބޭ ފަރާތްތަކުގެ ކިއު ދިގުވެ އެކަށީގެންވާ ގޮތެއްގައި ނިޒާމު ނުހިނގުމަކީ ސަރުކާރުގެ ކަންބޮޑުވުމެއް ކަމަށް އޭނާ ވިދާޅުވިއެވެ.
މި ކަންބޮޑުވުމަށް ހައްލެއް ހޯދުމުގެ ގޮތުން، ސަރުކާރުން ސެންޓަރުތަކުގެ ސްޓްރަކްޗަރއަށް ބަދަލު ގެނެސް މި ނިޒާމު ހަރުދަނާ ކުރުމުގެ މަސައްކަތް ދަނީ ކުރަމުންނެވެ. މިކަމުގެ ސަބަބުން ފަރުވާގެ ނިޒާމު ހަރުދަނާވެ މަސްތުވާތަކެތީގެ ސެންޓަރުގައި ބައިތިއްބައިގެން ފަރުވާދޭންޖެހޭ ފަރާތްތަކަށް ފަރުވާ ނިޒާމުގެ ތެރެއިން އަވަހަށް ފަރުވާ ލިބުމުގެ ފުރުސަތު ފަހިވެގެންދާނެ ކަމަށް އެންޑީއޭއިން ވަނީ ބުނެފައެވެ.