ކުދި ގޭބިސީތަކަށް ޚާއްޞަކޮށްގެން މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން 140 ގްރާމްގެ މަސްދަޅު ބާޒާރަށް ނެރެފިއެވެ. މި އައު ބާވަތުގެ މަސްދަޅު ވިއްކަން ފަށާފައިވަނީ މިދިޔަ ހަފުތާގެ ތެރޭގައެވެ.
މިފްކޯއިން މީގެ ކުރިން ނެރެމުން އައީ 180 ގްރާމްގެ މަސްދަޅެވެ. މި ސައިޒުގެ މަސްދަޅު ތެލުގައި ބަންދުކޮށްފައި (ޗަންކްސް އިން އޮއިލް) އަދި ފެނުގައި ބަންދުކޮށްފައި (ޗަންކްސް އިން ބްރައިން) ވެސް އުފައްދައެވެ. 180 ގްރާމްގެ މަސްދަޅެއް މިފްކޯއިން ވިއްކަމުން އަންނަނީ 17.5 ރުފިޔާއަށެވެ.
އަލަށް ނެރުނު 140 ގްރާމްގެ މަސްދަޅު ވިއްކަނީ 15 ރުފިޔާއަށެވެ. މި މަސްދަޅު ވަނީ ތެލުގައި ބަންދުކޮށްފައެވެ.
މިފްކޯ އިން ބުނީ މި ސައިޒުގެ މަސްދަޅު ބާޒާރަށް ނެރެން ނިންމީ ކުދި ގޭބިސީތަކަށް ޚާއްޞަކޮށްގެން، އެއްފަހަރާ ހުސްކޮށްލެވޭނެ ބާވަތެއްގެ ގޮތުގައި ކަމަށާއި ދަޅުމަސް ކަނޑާފައި ބާކީ ބައި ފްރިޖުގައި ބެހެއްޓުމަކީ އެހާ ރަނގަޅު ކަމަކަށް ނުވާތީ، މި ކުޑަ ސައިޒުގެ މަސްދަޅު އުފެއްދުމަށް ނިންމި ކަމަށެވެ.