ކޮރަޕްޝަން ނައްތާލެވޭނީ ހިޔާނާތުގައި ބައިވެރިވާ އެންމެނަށް ޤާނޫނާ އެއްގޮތްވާ ގޮތުގެމަތިން ހަމަހަމަކަމާއެކު އަމަލުކުރެވިގެންކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
މިއަދު ޕްރޮސެކިއުޓަރ ޖެނެރަލްގެ އޮފީހުން އެމްއެމްޕީއާރުސީގެ ހިޔާނާތުގެ މައްސަލާގައި ކުށް ސާބިތުވި ފަރާތްތަކާއެކު ދައުލަތުން ހަދާފައިއޮތް ހުރިހާ އިމިއުނިޓީ އެއްބަސްވުންތަކެއް ބާތިލްކުރުމާ ގުޅިގެން، ރައީސް މުއިއްޒު އެކްސްގައި ކުރެއްވި ޕޯސްޓެއްގައި މިކަމަށް މަރުހަބާ ވިދާޅުވެފައިވެއެވެ.
ރައީސް ވިދާޅުވީ، “ޒަމާނުއްސުރެން މިޤައުމަށް ކުރިމަތިވެފައިވާ ކޮރަޕްޝަންގެ ވަބާ މިޤައުމުން ނައްތާލެވޭނީ އެފަދަ މައްސަލަތަކުގައި ހިމެނޭކަމަށް ތުހުމަތުކުރެވޭ ހުރިހާ ފަރާތަކާމެދުވެސް ޤާނޫނާ އެއްގޮތްވާ ގޮތުގެމަތިން ހަމަހަމަކަމާއެކު ޢަމަލުކުރެވިގެން” ކަމަށެވެ.
މިދިޔަ ސަރުކާރުގެ ދުވަސްވަރު ޤާއިމް ކުރެވުނު މި އެއްބަސްވުންތަކުގެ ދަށުން، ކުރީގެ ނައިބު ރައީސް އަހުމަދު އަދީބުގެ އިތުރުން އެސްއޯއެފްގެ ވެރިންނަށް ލުއިދީފައިވެއެވެ. މީގެ ތެރޭގައި މުހައްމަދު އައްލާމް ލަތީފް، މުހައްމަދު ހުސައިން (އޮއިއްޓޭ) އަދި އިޝްފާޙް ޢަލީ ހިމެނެއެވެ.
ޕްރޮސެކިއުޓަރ ޖެނެރަލްގެ އޮފީހުން މި އެއްބަސްވުންތައް ބާތިލްކުރި ސަބަބަކީ، އެފަރާތްތަކުން ދައުލަތަށް ލިބެންޖެހޭ އެއްބާރުލުން ނުލިބުން ކަމަށް ބުނެފައިވެއެވެ. އަދި މި މައްސަލަ އަލުން ތަޙުޤީޤުކުރުމަށް މޯލްޑިވްސް ޕޮލިސް ސާވިސް އަދި އެންޓި-ކޮރަޕްޝަން ކޮމިޝަނަށް ހުށަހަޅާފައިވާ ކަމަށްވެސް އެ އޮފީހުން ބުނެފައިވެއެވެ.
މިދިޔަ އަހަރު ބޭއްވުނު ޖަލްސާއެއްގައި ރައީސް ޑރ މުއިއްޒު ވަނީ، އެމްއެމްޕީއާރުސީގެ ތެރެއިން ވައްކަން ކުރި ފަރާތްތައް ދެނެގަނެ، އެއީ ކޮންމެ މީހެއް ކަމުގައިވިޔަސް ޙައްގު އަދަބުދީ، އެ ފައިސާ އަނބުރާ ހޯދުމަށް ކުރަންޖެހޭ ހުރިހާ ކަމެއް ކުރައްވާނެކަމަށް ވިދާޅުވެފައެވެ.