ރާއްޖޭގެ އެކިކަންކޮޅުތަކުގައި ހުއްޓިފައިވާ ފެނާއި ނަރުދަމާގެ ހުރިހާ މަޝްރޫޢެއްގައި ދިމާވެފައިވާ މައްސަލަތައް ޙައްލުކޮށް ސަރުކާރުގެ ފުރިހަމަ ބާރު އޮންނަގޮތަށް އެ މަޝްރޫއުތައް މިމަހުން ފެށިގެން ކުރިއަށްގެންގޮސް ނިންމަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ރ. އަނގޮޅިތީމު ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސް ވިދާޅުވީ، މިދިޔަ އަހަރަކީ އިޤްތިޞާދީ ދަތިކަމާއި، ދަރަނި އިތުރުވުމުގެ ސަބަބުން ޤައުމު ބަނގުރޫޓުވުމުން ސަލާމަތްކުރުމަށާއި، އިޤްތިޞާދު ހަމަ މަގަށް އެޅުވުމަށް ގިނަ މަސައްކަތްތަކެއް ކުރަންޖެހުނު އަހަރެއްކަމަށެވެ. ނަމަވެސް މިހާރު އިޤްތިޞާދީ މައްސަލަތައް ޙައްލުކޮށް، މިއަހަރަށް ފާސްކޮށްފައިވާ ބަޖެޓާއެކު އައު މަޝްރޫއުތައް ފަށައި، ރަށްރަށުގައި ހުއްޓިފައިވާ މަޝްރޫޢުތައް އަލުން ފަށައި ނިންމޭގޮތަށް ކަންކަން މަގުފަހިވެފައިވާކަމަށް ރައީސް ވިދާޅުވިއެވެ.
މަޝްރޫޢުތައް ހުއްޓެން މެދުވެރިވީ އެއް ކުންފުންޏަކަށް ގިނަ ރަށްތަކެއްގެ މަޝްރޫޢުތައް ހަވާލުކުރުމުންކަން ފާހަގަކުރައްވައި، އެކަމުން އަރައިގަތުމަށް މިހާރު ގޮތްތަކެއް ހޯދައި، ދާދި އަވަހަށް އަނގޮޅިތީމާއި، އެނޫންވެސް ރަށްރަށުގައި ދިމާވެފައިވާ ފެނާއި ނަރުދަމާގެ ހުރިހާ މައްސަލައެއް ޙައްލުކޮށް ސަރުކާރުގެ ފުރިހަމަ ބާރު އޮންނަގޮތަށް އެ މަޝްރޫއުތައް ނިންމަވާނެކަމަށް ރައީސް ވިދާޅުވިއެވެ.
މީގެ އިތުރުން، އަނގޮޅިތީމުގެ ތަރައްޤީއަށް ގިނަ މަސައްކަތްތަކެއް ކުރާނެކަމަށާއި، ބަނދަރުގެ މައްސަލަތައް ޙައްލުކޮށް، މޫދަށް އެރޭ ސަރަޙައްދަކާއެކު ބަނދަރާއި ޖެޓީއެއްވެސް ތަރައްޤީ ކޮށްދެއްވާނެކަމަށް ރައީސް ވިދާޅުވިއެވެ. އަދި ސިއްޙީ އަދި ތަޢުލީމީ ދާއިރާގެ މައްސަލަތައް ޙައްލުކުރުމަށާއި، ކުޅިވަރުގެ ވަސީލަތްތައް ޤާއިމްކުރުމަށްވެސް އިސްކަންދެއްވާނެކަމަށް ރައީސް ވިދާޅުވިއެވެ.
ރައީސް ވިދާޅުވީ ރާއްޖޭގެ މާސްޓަރޕްލޭން ހެދުމުގެ މަސައްކަތް ކުރިއަށްގެންދާނީ ރައްޔިތުންގެ ބައިވެރިވުމާއެކުކަމަށާއި، ތަރައްޤީ ކުރިއަށްގެންދާނީ ރައްޔިތުން ބޭނުންވާ މިސްރާބަށްކަމަށެވެ. އެކަމުގައި ރައްޔިތުންގެ އެއްބާރުލުން ދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެދިވަޑައިގަތެވެ.