ރާއްޖޭގެ ސިއްހީ ހިދުމަތް ފުޅާކޮށް ފެންވަރު ރަނގަޅުކުރުމަށް ސަރުކާރުން މަސައްކަތް ކުރަމުންދާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރ. އަތޮޅަށް ކުރައްވަމުންދާ ދަތުރުފުޅުގެ ތެރެއިން އަނގޮޅިތީމަށް ވަޑައިގެން، އެ ރަށުގެ ރައްޔިތުންނާ ބައްދަލުކުރެއްވުމަށް މިއަދު ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ސިއްހީ ދާއިރާ ހަރުދަނާކުރުމަކީ މި ސަރުކާރުން ހާއްސަ އިސްކަމެއް ދޭ ކަމެއް ކަމަށެވެ.
ރައީސް ވިދާޅުވީ، ރާއްޖޭގެ އެކި ކަންކޮޅުތަކުގައި ހުރި ހޮސްޕިޓަލްތަކާއި ސިއްހީ މަރުކަޒުތައް ޒަމާނީކޮށް، އެ ތަންތަނުގެ ފެންވަރު ރަނގަޅުކުރުމަށް ފެންވަރު ރަނގަޅު، ބްރޭންޑެޑް މެޝިނަރީޒް އާއި އިކުއިޕްމަންޓް ގެނައުމުގެ މަސައްކަތް ކުރަމުން އަންނަ ކަމަށެވެ.
“ރަށްރަށުގެ ހެލްތު ސެންޓަރުތަކާއި ހޮސްޕިޓަލްތަކުގައި ހުންނަ ވަސީލަތްތައް، އިކުއިޕްމަންޓްތަކަކީވެސް ދުނިޔޭގެ އެންމެ ރަނގަޅު ބްރޭންޑްތަކުގެ ވަސީލަތްތަކަށް ހެދުމަށްވެސް އަޅުގަނޑު ވާނީ ނިންމާފައި. އެއީވެސް ހަމަ ބަލްކް ޕްރޮކިއުމަންޓްގެ ތެރެއިން އެކީގައި ގިނަ އަދަދެއްގެ ރަށްރަށަށް ވާ ގޮތަށް ގަނެގެން، ހަރުކޮށް އޭގެ ރީ އެޖެންޓްސް، ހިންގުމަށް ބޭނުންވާ ވަސީލަތްތައް، ހިންގުމަށް ބޭނުންވާނެ ތަކެއްޗަކީވެސް ފަސޭހައިން ލިބޭނެ ތަކެތި އެކަހަލަ ބްރޭންޑްތައް ގެނައީމަ. އެގޮތަށް އެކަން ކުރަން އޮންނާނީ ނިންމާފައި،” ރައީސް ވިދާޅުވިއެވެ.
މީގެ އިތުރުން، ފެންވަރު ރަނގަޅު ބޭސް ބަލްކްކޮށް ގެނެސް ލިބޭނެ ގޮތް ހަމަޖައްސަމުން އަންނަ ކަމަށްވެސް ރައީސް ވިދާޅުވިއެވެ.
ރައީސް ވިދާޅުވީ، ސިއްހީ މަރުކަޒުތަކުގައި މިހާރު ހުރި އިކުއިޕްމަންޓަކުގެ ސްޕެއާ ހޯދަން އުނދަގޫ ކަމަށާއި އެކަމުގެ ސަބަބުން ހިންގުމުގެ ހަރަދު ބޮޑުވާ ކަމަށެވެ. ނަމަވެސް އާ އިކުއިޕްމަންޓްތަކާއެކު، އެއް ފަހަރާ ބޮޑު ހަރަދެއް ދިޔަ ނަމަވެސް އެކަމުގެ ސަބަބުން ހިންގުމުގެ ހަރަދު ކުރިއަށް އޮތް ދުވަސްތަކުގައި ކުޑަވެ، އޭގެ ފައިދާ ކުރާނެ ކަމަށް އެ މަނިކުފާނު ވިދާޅުވިއެވެ.
ރައީސް ޑރ. މުއިއްޒު މިއަދު ފައްޓަވާފައިވާ ރ. އަތޮޅުގެ 11 ރަށަށް ކުރައްވާ ދަތުރުފުޅުގައި އެ އަތޮޅުގެ އެހެން ރަށްރަށަށްވެސް ވަޑައިގަންނަވާނެއެވެ.