މާޅޮސްމަޑުލު އުތުރުބުރީ ހުޅުދުއްފާރުގައި، ބޭންކް އޮފް މޯލްޑިވްސްގެ އޭޓީއެމަކާއި، އިސްލާމިކް ބޭންކްގެ އޭޓީއެމެއް ބެހެއްޓުމުގެ އެއްބަސްވުމުގައި މިއަދު ސޮއިކޮށްފިއެވެ. މި އެއްބަސްވުމުގައި ސޮއިކުރެވުނީ ރައީސުލްޖުމްހޫރިއްޔާ ރ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ހުޅުދުއްފާރު ރައްޔިތުންނާއެކު ބޭއްވެވި ބައްދަލުވުމެއްގައެވެ.
މި އެއްބަސްވުމުގައި ހުޅުދުއްފާރު ކައުންސިލުގެ ފަރާތުން ސޮއިކުރެއްވީ އެ ރަށު ކައުންސިލުގެ ރައީސް މުހައްމަދު އާތިފްއެވެ. ބޭންކް އޮފް މޯލްޑިވްސްގެ ފަރާތުން ސޮއިކުރެއްވީ އެ ބޭންކުގެ ޑިރެކްޓަރ އޮފް ރީޓެއިލް އެންޑް އެސްއެމްއީ ބޭންކިން ބަދުރުއްދީން ހަސަންއެވެ. އަދި އިސްލާމިކް ބޭންކުގެ ފަރާތުން ސޮއިކުރެއްވީ އެ ބޭންކުގެ މެނޭޖިންގް ޑިރެކްޓަރ މުފައްދަލް އިދްރީސް ޚުމްރީއެވެ.
މި އެއްބަސްވުމަކީ މުޅި ރާއްޖޭގެ މީހުން ދިރިއުޅޭ ހުރިހާ ރަށަކަށް ބޭންކިން ޚިދުމަތް ފުޅާކުރުމަށް ސަރުކާރުން ފަށްޓަވާފައިވާ ޚާއްސަ މަޝްރޫޢުގެ ބައެކެވެ. މި މަޝްރޫޢުގެ ދަށުން ރ. ހުޅުދުއްފާރުގައި އޭޓީއެމް ބެހެއްޓުމަށް ވަނީ ހަމަޖެހިފައެވެ.
އިއްޔެ ވަނީ ރ. އަތޮޅުގެ އިތުރު 3 ރަށެއްގައި އޭޓީއެމް ބެހެއްޓުމުގެ އެއްބަސްވުންތަކުގައިވެސް ސޮއިކޮށްފައެވެ. އެއީ ރ. ވާދޫ، ރަސްގެތީމު އަދި އަނގޮޅިތީމެވެ.
ސަރުކާރުގެ މި މަސައްކަތުގެ ދަށުން މިއަހަރުގެ މާރިޗު މަހުގެ ނިޔަލަށް 17 ރަށެއްގައި އޭޓީއެމް ބެހެއްޓުމަށް ދަނީ މަސައްކަތް ކުރަމުންނެވެ. އަދި މިހާރު ޚިދުމަތް ނުދެވޭ ރަށްތަކުގައި މިއަހަރު ނިމުމުގެ ކުރިން އޭޓީއެމް ބެހެއްޓުމަށް ވަނީ ރޭވިފައެވެ. މީގެ އިތުރުން، މޯލްޑިވްސް އިސްލާމިކް ބޭންކުން 19 ރަށެއްގައި މިއަހަރު ނިޔަލަށް އޭޓީއެމް ބެހެއްޓުމަށް ވަނީ ނިންމާފައެވެ.