ރ. އުފުލަންދޫއަކީ މަޑުއްވަރީގެ ބައެއްގެ ގޮތުގައި ހަމަޖައްސަވައި، ދިމާވެފައިވާ ބިމުގެ ދަތިކަމުގެ މައްސަލައަށް ފުރިހަމަ ޙައްލެއް ގެނެސްދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ. ރައީސުލްޖުމްހޫރިއްޔާ މި ޔަޤީންކަން ދެއްވީ މަޑުއްވަރީ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ވިދާޅުވި ގޮތުގައި، ރިޔާސީ އިންތިޚާބުގެ ކެމްޕޭންގައި މަޑުއްވަރީްވަރީ ރައްޔިތުންގެ އުންމީދުތަކުގައި ކުލަ ޖައްސައިދެއްވާނެކަމަށް ވަޢުދުވެވަޑައިގެންފައިވާތީ، އެ ރަށަށް މި ވަޑައިގަތީ ރަށުގެ ތަރައްޤީއަށް ބޭނުންވާ ކަންކަން ފުރިހަމަކޮށްދެއްވާނެކަމުގެ ޔަޤީންކަން ދެއްވުމަށެވެ.
މަޑުއްވަރީއަށް ދިމާވެފައިވާ އެންމެ ބޮޑު މައްސަލައަކީ ބިމުގެ ދަތިކަންކަމަށް ފާހަގަކުރައްވައި، ރައީސުލްޖުމްހޫރިއްޔާ ވިދާޅުވީ އެ ރަށް ހިއްކެން އޮތް މިންވަރަށް ހިއްކަވާނެ ކަމަށެވެ. މިގޮތުން، މިހާރު ހިއްކެން އޮތް 6 ހެކްޓަރުގެ ބިން މި އަހަރުގެ ބަޖެޓުގެ ތެރެއިން ހިއްކަވާނެ ކަމަށާއި، އެ މަޝްރޫޢު މި އަހަރު ފުރިހަމަކުރައްވާނެ ކަމަށްވެސް ވިދާޅުވިއެވެ.
މީގެ އިތުރުން، މަޑުއްވަރީގައި ހުރި އެހެނިހެން މައްސަލަތަކަށްވެސް ރައީސުލްޖުމްހޫރިއްޔާ އަލިއަޅުއްވާލެއްވިއެވެ. މިގޮތުން، ބަނދަރާއި ގިރާ ސަރަހައްދު ހިމާޔަތްކުރުމުގެ މަސައްކަތްތައް ކުރިއަށް ގެންދަވާނެ ކަމަށާއި، ހިއްކާ ސަރަހައްދު ހިމާޔަތްކުރުމާއި، ބަނދަރުގެ ބޭރު ތޮށީގައި އުޅަނދު އެޅޭނެ ގޮތަށް ހުރިހާ ކަމެއް އެކުއެކީގައި ކުރިއަށް ގެންދަވާނެ ކަމަށް ވިދާޅުވިއެވެ.
ރައީސުލްޖުމްހޫރިއްޔާ އިތުރަށް ވިދާޅުވީ، އުފުލަންދޫ މަޑުއްވަރީގެ އިޚްތިޞާޞްގެ ތެރޭގައި ހިމަނުއްވައި، އެކަމުގެ ޤާނޫނީ ލިޔެކިޔުންތައް ހަމަޖައްސަވާނެ ކަމަށެވެ. މިކަމުގެ ސަބަބުން، ބޯހިޔާވަހިކަމާއި އެހެނިހެން މައްސަލަތަކަށް ޙައްލު ލިބިގެންދާނެ ކަމަށް އެމަނިކުފާނު ވިދާޅުވިއެވެ.
އަދި މަޑުއްވަރީގައި 50 ހައުސިންގ ޔުނިޓް އެޅުމަށް ވަޢުދުވެފައިވާ ކަމަށާއި، އެ ރަށް ހިމެނޭހެން ހުރިހާ ރަށެއްގެ ހައުސިންގ މަޝްރޫޢު ހިންގުމަށް މި މަހު އިޢުލާންކުރައްވާނެ ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ ވަނީ މަޑުއްވަރީގެ އެހެނިހެން ތަރައްޤީގެ މަޝްރޫޢުތަކާ ބެހޭ ގޮތުންވެސް މަޢުލޫމާތު ދެއްވާފައެވެ. މިގޮތުން، އެ ރަށުގެ މަގު ހެދުމުގެ މަޝްރޫޢު ކުރިއަށް ގެންދަވާނެ ކަމަވާނެ ކަމަށާއި، ސިއްޙީ މަރުކަޒަށް ޖާގަ އިތުރުކޮށްދެއްވާނެ ކަމުގެ ޔަޤީންކަންވެސް ރައީސް ދެއްވިއެވެ.
ކުޅިވަރުގެ ވަސީލަތްތައް ޤާއިމްކުރުމުގެ މަސައްކަތަށް އަލިއަޅުއްވާލައްވަމުން ރައީސުލްޖުމްހޫރިއްޔާ ވިދާޅުވީ، ލަސްވެގެން އަންނަ މަހުގެ ނިޔަލަށް ފުރިހަމަ ފުޓުބޯޅަ ދަނޑެއް މަޑުއްވަރީގައި ތަރައްޤީކޮށްދެއްވާނެ ކަމަށެވެ.