ރ. ރަސްމާދޫގެ ތަރައްޤީއަށް ކަނޑައަޅުއްވާފައިވާ މަޝްރޫޢުތައް މިއަހަރު ކުރިއަށް ގެންގޮސްދެއްވާނެކަމަށާއި، އެކަމުގައި ކަންބޮޑުވުމެއް ނުބޭއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެދިވަޑައިގެންފިއެވެ. އެމަނިކުފާނު މިހެން ވިދާޅުވެފައިވަނީ އިއްޔެ ރަސްމާދޫ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސް މުޢިއްޒު ވިދާޅުވީ ރަސްމާދޫގެ ތަރައްޤީއަށް ވަރަށް ގިނަ ކަންކަން ރޭވިފައިވާ ކަމަށާއި، މިއަހަރާއި އަންނަ އަހަރަކީ ރަސްމާދޫއާއި އެހެނިހެން ރަށްރަށަށް ވެވަޑައިގެންފައިވާ ވަޢުދުތަކަށް އަމަލީ ސިފަ ގެންނާނެ ދެ އަހަރު ކަމަށެވެ.
ރަސްމާދޫގެ ފެނުގެ ނިޒާމު ހުއްޓިފައިވާ މައްސަލައަށް އަލިއަޅުއްވާލައްވަމުން ރައީސް ވިދާޅުވީ އެ މަޝްރޫޢު ކުރިއަށް ގެންދެވޭނެ ގޮތްތަކެއް މިހާރު ހަމަޖެހިފައިވާ ކަމަށާއި، އެ މަޝްރޫޢު ނިންމަވައިދެއްވާނެ ކަމުގެ ޔަޤީންކަން ދެއްވާ ކަމަށެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ،ރަސްމާދޫ ދަތުރުފުޅުގެ ތެރެއިން / ފޮޓޯ: ރައީސްއޮފީސް
ރަސްމާދޫގެ ގިރުމުގެ މައްސަލައަށް ޙައްލު ހޯދައިދެއްވާނެ ކަމަށާއި، މޫދަށް އެރޭނެ ސަރަހައްދެއް ރަށުގައި ތަރައްޤީކޮށްދެއްވާނެ ކަމަށްވެސް ރައީސް ވިދާޅުވިއެވެ. މީގެ އިތުރުން ބޯހިޔާވަހިކަމުގެ މަޝްރޫޢުގެ ދަށުން ރަސްމާދޫގައި ހައުސިންގ ޔުނިޓް އެޅުމުގެ މަޝްރޫޢުއެއް ކުރިއަށް ގެންދަވާނެ ކަމަށްވެސް އެމަނިކުފާނު ވިދާޅުވިއެވެ.
ތަޢުލީމީ ދާއިރާއިން ފަށާފައިވާ 3 ބުރީގެ ކްލާސްރޫމްތަކުގެ މަޝްރޫޢު އަވަހަށް ނިންމަވައިދެއްވާނެ ކަމަށާއި، ސިއްޙީ މަރުކަޒަށް ޖާގަ އިތުރުކޮށްދީ ލެބޯޓްރީއެއްވެސް ތަރައްޤީކޮށްދެއްވާނެ ކަމަށް ރައީސް ވިދާޅުވިއެވެ. އަދި ކުޅިވަރުގެ ދާއިރާއިން ފުޓުބޯޅަ ދަނޑަކާއި، ކުޅިވަރު ކުޅެވޭނެ އިޖުތިމާޢީ މަރުކަޒެއްވެސް ތަރައްޤީކުރުމަށް މިއަހަރު ފަށްޓަވާނެ ކަމަށް ރައީސް ވިދާޅުވިއެވެ.
މީގެ އިތުރުން ރަސްމާދޫގައި ފުލުހުންގެ މަރުކަޒެއް ޤާއިމްކޮށް ޚިދުމަތް ދިނުމަށް މިއަހަރުގެ ކުރީކޮޅު ފަށްޓަވާނެ ކަމަށާއި، ރަސްމާދޫގެ އެންޓަނާ އެހެން ސަރަހައްދަކަށް ބަދަލުކުރުމަށްވެސް މަސައްކަތް ކުރައްވާނެ ކަމަށް ރައީސް ވިދާޅުވިއެވެ.
ރައީސް މުޢިއްޒު ވިދާޅުވީ ރަސްމާދޫގެ ތަރައްޤީއާއެކު ފުރިހަމަ ނަފާ ރައްޔިތުންނަށް ގެނެސްދެއްވުމަކީ އެމަނިކުފާނު ބޭނުންފުޅުވާ ގޮތްކަމަށެވެ.