ރައީސް ޑރ. މުހައްމަދު މުއިއްޒު ވައުދުވެވަޑައިގެންފައިވާ ގޮތަށް ރާއްޖޭގެ 55 ރަށެއްގައި ކައުންސިލް އިމާރާތް އެޅުމުގެ މަޝްރޫޢުގެ ދަށުން ރ. ރަސްމާދޫގައި އަޅާ އިމާރާތުގެ ބިންގާ މިއަދު އަޅައިފިއެވެ.
ރައީސް ޑޮކްޓަރ މުޙައްމަދު މުޢިޒުގެ ޒަޢާމަތުގައި، ކައުންސިލް އިދާރާ ޢިމާރާތްކުރުމަށް ހިންގާ ފުރަތަމަ މަޝްރޫގެ ދަށުން، ޢިމާރާތްކުރުމަށް ބިންގާ އެޅުނު ރަސްމާދޫ ކައުންސިލްގެ އައު ޢިމާރާތުގެ ބިންގާ އަޅުއްވައި ދެއްވީ ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ބައިވެރިވެވަޑައިގެންނެވި މި ރަސްމިއްޔާތުގައި ދައުލަތުގެ ބައެއް ވުޒާރާތަކުގެ ވަޒީރުންނާއި، ރަސްމާދޫ ކައުންސިލްގެ ރައީސާއި، އެ ކައުންސިލާއި، ޑަބްލިޔޫޑީސީގެ އެންމެހައި މެންބަރުންނާއި، ރަސްމާދޫގެ މުއައްސަސާތަކުގެ ވެރިންނާއި، އެ ރަށުގެ ގިނަ ޢަދަދެއްގެ އާންމު ރައްޔިތުން ބައިވެރިވެލެއްވިއެވެ.
ކޮންޓްރެކްޓަރ ފައިނޭންސް އުޞޫލުން ޢިމާރާތްކުރާ 55 ކައުންސިލްގެ ތެރޭގައި ހިމެނޭ ހުރިހައި ރަށެއްގެ ކައުންސިލް އިދާރާގެ، އައު ޢިމާރާތުގެ މަސައްކަތް ކުރަނީ، މެލޭޝިއާގެ ކުންފުންޏެއް ކަމަށްވާ “ހެކްސްޓަރ ގްލޯބަލް” އިންނެވެ.
ލާމަރުކަޒީ ނިޒާމުގެ ދަށުން ކައުންސިލްތައް ބާރުވެރިކުރުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ޚާއްޞަ އިސްކަމެއް ދެއްވައިގެން ކުރިއަށް ގެންދަން ފެށި، ކައުންސިލް އިދާރާގެ އައު ޢިމާރާތް ބިނާކުމުގެ މަޝްރޫޢުގެ ސަބަބުން އެ ކައުންސިލްތައް ހިންގުމަށް އިތުރު ލުއި ފަސޭހަކަން ލިބި، ރަށުގެ ރައްޔިތުންނަށް އުފާ ފާގަތިކަން ލިބިގެން ދާނެއެވެ.