އޮޑިދޯނިފަހަރު ބަނުމަށް ވަޑިންނަށް ރަހުނަކާ ނުލައި ލުއި ލޯނު ދޫކުރެވޭނެ އިންތިޒާމު ބޭންކިންގ ނިޒާމުގެ ތެރެއިން ހަމަޖައްސައިދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ރޭ ވިދާޅުވެއްޖެއެވެ.
ރައީސް މިހެން ވިދާޅުވީ ރ. އަތޮޅުގެ ބައެއް ރަށްރަށަށް ކުރައްވަމުން ގެންދަވާ ދަތުރުފުޅުގައި އިންނަމާދޫއަށް ވަޑައިގެން އެރަށު ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
ރައީސް ވިދާޅުވީ ރަށްރަށުގެ ބަޖެޓު ކަނޑައެޅުމުގައި އެރަށަކަށް އެންމެ މުހިންމު ކަންކަމަށް އިސްކަންދެއްވާނެ ކަމަށެވެ. އެގޮތުން އިންނަމާދޫއަކީ ފުޅާުޅާ ދާއިރާއެއްގައި އޮޑިބަނުމުގެ މަސައްކަތް ކުރާ ރަށެއް ކަމަށްވާތީވެ އެ މަސައްކަތް އިތުރަށް ފުޅާކޮށްދިނުމުގެ ގޮތުން ގިނަ ކަންތައްތަކެއް ސަރުކާރުން ރާވާފައިވާ ކަމަށް ވެސް ވިދާޅުވިއެވެ.
“މިއަދު ކުރެވުނު މަޝްވަރާގެ އަލީގައި އަދި މިދެންނެވި ސިޔާސަތުގެ ތެރެއިން އިރާދަކުރެއްވިއްޔާ އެއް ކަމަކަށް މި ދާއިރާގައި މަސައްކަތްކުރައްވާ ބޭފުޅުންނަށް ބޭނުންވާ ކަންކަމުގެ ތެރެއިން ލުއި ގޮތެއްގައި ރަހުނަކާ ނުލައި ލޯނު ނެގޭނެ ގޮތް ބޭންކިން ނިޒާމުގެ ތެރެއިން ހަމަޖައްސައިދޭނަން،” ރައީސް ޑރ މުއިއްޒު
ރައީސް އިތުރަށް ވިދާޅުވީ އޮޑިދޯނިފަހަރު ބަނުމުގެ ދާއިރާގައި ބިދޭސީން ގެންގުޅުމަށް ބޭނުންފުޅުނުވާ ކަމަށާއި، ދިވެހިން ބާރުވެރިކުރުވުމަށް ސަރުކާރުގެ ސިޔާސަތުތައް ބައްޓަންކުރައްވާފައިވާ ކަމަށެވެ. މި ގޮތުން، އިންނަމާދޫގައި ބޯޓުފަހަރު ބަނުމުގެ ފަންނު ކުރިއެރުވުމަށް ތަމްރީނު މަރުކަޒެއް ގާއިމުކުރުމަށް ރޭވިފައިވާ ކަމަށާއި، ސްކިލްސް ޑިވެލޮޕްމަންޓް މިނިސްޓްރީގެ ދަށުން ޒުވާނުންނަށް ތަމްރީނު ފޯރުކޮށްދެވޭނެ މަގު ފަހިކޮށްދެއްވާނެ ކަމަށް ވެސް ވިދާޅުވިއެވެ.
އަދި އޮޑިދޯނިފަހަރު ބަނުމުގެ ދާއިރާއަކީ ހަމައެކަނި ދިވެހިންނަށް ޚާއްސަކުރެވިގެންވާ ދާއިރާއެއްގެ ގޮތުގައި ދެމެހެއްޓުމަށް މަސައްކަތްކުރައްވާނެ ކަމަށާއި، ބޯޓުފަހަރު ބަނުމަށް ދޫކުރާ ބިންތައް ދިގު މުއްދަތަށް ކުއްޔަށް ދެވޭނެ އިންތިޒާމު ކައުންސިލް މެދުވެރިކޮށް ހަމަޖައްސައިދެއްވާނެ ކަމަށް ވެސް ރައީސް ވިދާޅުވިއެވެ.