ރައީސުލްޖުމްހޫރިއްޔާ ރ. ކިނޮޅަހުގެ ތަރައްޤީއަށް ޔަޤީންކަން ދެއްވައިފި
ރ. ކިނޮޅަހުގެ ތަރައްޤީއަށް ކުރަންހުރި ގިނަ މަސައްކަތްތައް މިއަހަރު ކުރިއަށްގެންދަވާނެކަމަށް ވިދާޅުވެ، އެރަށުގައި ތަރައްޤީގެ ގިނަ މަޝްރޫޢުތަކެއް ހިންގާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ. މި ޔަޤީންކަން ރައީސް ދެއްވީ އިއްޔެ ކިނޮޅަހު ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ކިނޮޅަހު ރައްޔިތުންނާ ބައްދަލުކުރެއްވި ޖަލްސާގައި އެރަށު ކައުންސިލްގެ ރައީސް އަޙްމަދު ޙުސައިން ވަނީ ރަށުގެ ހުރި އެކި މައްސަލަތަކަށް އަލިއަޅުއްވާލައްވާ ކަންބޮޑުވުން ފާޅުކޮށްފައެވެ. މީގެ ތެރޭގައި ފާއިތުވި 12 އަހަރު ކުޅިވަރުގެ ދާއިރާއަށް ސަމާލުކަން ނުދިނުމާއި، ކުޑަކުދިންނާއި އާއިލާތަކަށް ޕާކް ފަދަ ވަސީލަތްތައް ނެތުމާއި، ސްކޫލުގެ ޖާގައިގެ ދަތިކަން ހިމެނެއެވެ.
މި ކަންބޮޑުވުންތަކަށް ޖަވާބު ދެއްވަމުން ރައީސް މުޢިއްޒު ވިދާޅުވީ ކިނޮޅަހުގެ ތަރައްޤީއަށް ކުރަންހުރި ކަންކަން މިއަހަރު ޢަމަލީގޮތުން ކުރިއަށްގެންދަވާނެ ކަމަށެވެ. އެގޮތުން:
– މިއަހަރު ކިނޮޅަހުގައި ޕާކެއް ތަރައްޤީކޮށްދެއްވާނެކަން
– ކުޅިވަރުގެ ވަސީލަތްތައް ޤާއިމްކުރުމަށް މަސައްކަތްކުރައްވާނެކަން
– ފުޓްސަލް ދަނޑާއި ފުޓުބޯޅަ ދަނޑު ތަރައްޤީކުރައްވާނެކަން
– ހޭންޑްބޯލް ކޯޓު ތަރައްޤީކުރުމަށް މަސައްކަތްކުރައްވާނެކަން
– ސްކޫލްގެ ތަރައްޤީއަށް ޕްލޭން ހަދައި، ކްލާސްރޫމާއި، ހޯލާއި، ފާޚާނާތައް ހިމެނޭހެން ހުރިހާ ވަސީލަތެއް ހަމަކޮށްދިނުމަށް އިސްކަންދެއްވާނެކަން
– ސިއްޙީ މަރުކަޒުގެ އެކްސްޓެންޝަން ޢިމާރާތް އަޅުއްވައިދެއްވާނެކަން
– ފުލުހުންގެ ޚިދުމަތް މިއަހަރު ގާއިމްކުރާނެކަން
– ލޯކަލް ޓޫރިޒަމް ކުރިއެރުވުމަށް އެހީތެރިކަން ދެއްވާނެކަން
މީގެ އިތުރުން ރައީސް ވިދާޅުވީ މުޅި ރާއްޖެއަށް ޕަބްލިކް ލައިބްރަރީގެ ޚިދުމަތް ފުޅާކުރާނެ ކަމަށެވެ. ކިނޮޅަހުގެ ތަރައްޤީއަށްހުރި ގިނަ ކަންކަމުގެ ޢަމަލީ މަސައްކަތް މިއަހަރު ފަށައި، ބާކީ މަސައްކަތް އަންނަ އަހަރު ކުރިއަށްދާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވިއެވެ.