މި އަހަރުގެ ޝަހީދުންގެ ދުވަސް ފާހަގަކުރުމަށް ޚާއްސަ ހަރަކާތެއް ބޭއްވުމަށް ތައްޔާރުވަމުންދާ ކަމަށް ހެރިޓޭޖް މިނިސްޓަރު އާދަމް ނަސީރު ވިދާޅުވެއްޖެއެވެ.
މިނިސްޓަރު މި މަޢުލޫމާތު ހާމަކުރެއްވީ އިޖުތިމާޢީ މީޑިއާ ޕްލެޓްފޯމް “އެކްސް” ގައި ކުރެއްވި ޕޯސްޓެއްގައެވެ.
1 ޝައުބާން އެއީ ދިވެހިރާއްޖޭގެ ފަޚުރުވެރި ޝަހީދުންގެ ދުވަހެވެ. މި ދުވަސް މީލާދީ ގޮތުން މި އަހަރު ދިމާވަނީ ޖަނަވަރީ މަހުގެ 31 ވަނަ ދުވަހާއެވެ. މި އަހަރުގެ ޝަހީދުންގެ ދުވަހުގެ މުނާސަބަތުގައި ޚާއްސަ ހަރަކާތްތަކެއް ރޭވެމުންދާ ކަމަށް ވަޒީރު ވަނީ ވިދާޅުވެފައެވެ.
ޝަހީދުންގެ ދުވަހަކީ ކޮންމެ އަހަރެއްގެވެސް ޝައުބާން މަހުގެ އެއްވަނަ ދުވަހު ފާހަގަކުރާ ދުވަހެކެވެ. މި ދުވަހަކީ ދިވެހި ޤައުމިއްޔަތާއި މިނިވަންކަމަށްޓަކައި ހަނގުރާމަކޮށް، ފުރާނަ ޤުރުބާންކުރެއްވި އަބްޠާލުންގެ ހަނދާނުގައި ފާހަގަކުރާ ދުވަހެކެވެ.
މި ދުވަހަކީ ދިވެހި ޤައުމިއްޔަތާއި މިނިވަންކަމުގެ މުހިންމުކަން އާކޮށް، ޝަހީދުންގެ ޤުރުބާނީގެ އަގު ވަޒަންކުރުމަށް ލިބޭ މުހިންމު ފުރުސަތެކެވެ. ނަމަވެސް، މި އަހަރު ބޭއްވުމަށް ރޭވިފައިވާ ޚާއްސަ ހަރަކާތުގެ އިތުރު ތަފްސީލެއް ހާމަކޮށްފައި ނެތެވެ.