ހުޅުމާލެ ފޭސް 2 ގައި ހިނގި ވައްކަމުގެ ހާދިސާއެއްގައި ގެއްލުނު 2000 ޑޮލަރުގެ ތަކެތި ހޯދައި، އޭގެ ވެރިފަރާތާ ހަވާލުކޮށްފިއެވެ.
މި ވައްކަން ކޮށްފައި ވަނީ ކޮން އިރަކު ކަމެއް ސީދާ އެނގިފައިނުވާކަަން ފާހަގަކޮށް ފޭސްދޭއްގެ އެސަރަހައްދުގައި ދިރިއުޅޭ މީހަކު ބުނި ގޮތުގައި އެ ގެއަކީ އަގުބޮޑު މުދާތައް ހުންނަ ގެއެއްކަމަށާއި އޭނާއަށް އަޑުއިވިފައިވާ ގޮތުގައި އެގެއިން ވައްކަން ކޮށްފައިވަނީ އެގޭގެ މީހުން ގޭގައި ނެތް ވަގުތެެއްގައި ގެއަށް ވަދެގެންނެވެ. އަދި ފުލުހުންނަށް އެގޭގެ މީހުން މައްސަލަ ހުށަހެޅިތާ 24ގަޑިއިރު ނުވަނީސް ފުލުހުން ވަނީ ވަގަށް ނަގާފައިވާ ތަކެތި އާއިލާއާ ހަވާލުކޮށްފައެވެ.
ފުލުހުން ބުނީ މި މައްސަލަ ފުލުހުންގެ ސަމާލުކަމަށް އައީ މި މަހުގެ 22 ވަނަ ދުވަހުގެ ހެނދުނުގެ ވަގުތެއްގައި ކަމަށެވެ. އަދި މައްސަލަ ހުށަހެޅުމާއެކު ފޭސް 2 ޕޮލިސް ސްޓޭޝަނުން ވަނީ އަވަސް ތަހުގީގެއް ފަށާފައި ކަމަށް ފުލުހުން ވަނީ މައުލޫމާތު ދީފއެވެ. މި ތަހުގީގުގެ ތެރެއިން، މައްސަލައިގައި ތުހުމަތުކުރެވޭ ފަރާތް ހޯދައި، އެ ފަރާތާ ސުވާލުކުރުމަށްފަހު ގެއްލުނު ތަކެތި ވަނީ އަނބުރާ ހޯދިފައެވެ.
ފުލުހުން ބުނީ ވަގަށް ނެގުނު ތަކެތީގެ ޖުމްލަ އަގަކީ 2000އެއްހާ ޑޮލަރު ކަމަށެވެ. މީގެ ތެރޭގައި ހިމެނެނީ ސެންޓުފުޅިތަކަކާއި، އަންނައުނާއި، ބޫޓު އަދި އަވިއައިނުއެވެ.
މި މައްސަލައިގައި މިހާތަނަށް އެއްވެސް ފަރާތެއް ހައްޔަރުކޮށްފައި ނުވާ ކަމަށް ފުލުހުން ވަނީ ހާމަކޮށްފައެވެ. އަދި މައްސަލައިގެ ތަހުގީގު މިހާރުވެސް ކުރިއަށްދާ ކަމަށް ފުލުހުން ވަނީ ބުނެފައެވެ.