ށ. ފުނަދޫގެ އުތުރުކޮޅުގައި ހުންނަ ކުޑަމިސްކިތް (މަސްޖިދުލް ގުފްރާން) އިން ގަބުރު ކަށިތަކެއް ފެނުމާ ގުޅިގެން އެ މިސްކިތުގައި ނަމާދުކުރުން ވަގުތީގޮތުން މެދުކަނޑާލައި މިސްކިތް ބަންދުކޮށްފިއެވެ.
ފުނަދޫ ކައުންސިލުން މަޢުލޫމާތު ދެއްވިގޮތުގައި، އެ މިސްކިތުގައި ގަބުރު ކަށިތަކެއް ހުރި ކަމަށް ރައްޔިތުންގެ ހިތްތަކުގައި ޝައްކުތަކެއް އުފެދިގެން އުޅޭތާ ގިނަ ދުވަސްތަކެއް ވެފައިވާތީ، އެކަން ބެލުމަށް ނިންމިއެވެ. މިގޮތުން މިސްކިތުގެ ފެންޑާ ސަރަހައްދު ކޮނެގެން ބެލިއިރު، ތިން ފޫޓާއި ހަ ފޫޓާ ދެމެދުގެ ފުންމިނުން ވަރަށް ގިނަ ދުވަސްވެފައިވާ ކަށިތަކެއް ފެނިފައިވެއެވެ.
މި މައްސަލައާ ގުޅޭގޮތުން ކައުންސިލުން ހާމަކުރެއްވި ގޮތުގައި، ފެނުނު ކަށިތައް މިހާރު ވަނީ ގަބުރުސްތާނަށް ގެންގޮސް ވަޅުލާފައެވެ. އަދި މި މައްސަލައާމެދު ދެން ގޮތެއް ނިންމާނީ އިސްލާމިކް މިނިސްޓްރީން ކަމަށް ވެސް ވިދާޅުވިއެވެ.
ފާހަގަކޮށްލެވޭ ކަމަކީ، މި މިސްކިތުން 2019 ވަނަ އަހަރުވެސް ގަބުރު ކަށިތައް ފެނިފައިވާ ކަމަށާއި، އެއީ ކުރީ ޒަމާނުގައި ގަބުރުސްތާނެއް ހުރި ތަނެއްކަމެވެ. އެފަހަރު އިސްލާމިކް މިނިސްޓްރީން އަންގާފައިވަނީ އުތުރު ފަރާތުގައި އިތުރު މިސްކިތެއް ބިނާކުރެވެންދެން އެ މިސްކިތުގައި ނަމާދު ކުރުމަށެވެ.
ފުނަދޫގައި ޖުމްލަ ތިން މިސްކިތް ހުންނައިރު، އަނެއް ދެ މިސްކިތް ހުންނަނީ ރަށުގެ ދެކުނު ފަރާތުގައެވެ. އުތުރު ފަރާތު ހުންނަ މިސްކިތް ބަންދުކުރުމުން ރައްޔިތުންނަށް ދަތިވާތީ، އެ ސަރަހައްދުގައި ވަގުތީ މިސްކިތެއް ގާއިމުކުރުމަށް ކައުންސިލުން ވަނީ ނިންމާފައެވެ.