ހައްޖާއި އުމްރާގެ އަޅުކަމަށް މީހުން ގެންދިޔުމުގެ ހުއްދަ ބާޠިލްކުރުމަށްފަހު، ޓްރެވެލް އެޖެންސީއަކަށް ނަން ބަދަލުކޮށްގެން މީީހުން ގެންދިޔަ އަލް މަޝްއަރު ޕްރައިވެޓް ލިމިޓެޑާއި އެ ކުންފުންޏާ ގުޅުންހުރި އެހެން ކުންފުނިތަކަށް މަކަރާއި ހީލަތް ހަދައި ފައިސާއަށް ޚިޔާނާތްތެރިވެފައިވާ މައްސަލައިގައި ދަޢުވާކުރުމަށް ފުލުހުން ޕްރޮސެކިއުޓަރ ޖެނެރަލްގެ އޮފީހަށް ފޮނުވައިފިއެވެ.
އަލް މަޝްއަރު ޕްރައިވެޓް ލިމިޓެޑުން ވަނީ 27 މީހެއްގެ އަތުން 500،000 ރުފިޔާއަށްވުރެ ގިނަ ފައިސާ ނަގައި އެމީހުންނަށް އުމުރާ ދަތުރު ނުދީ މީހުންނަށް އޮޅުވާލައި ހީލަތްތެރިވެފައެވެ. މި މައްސަލައިގައި އަލް މަޝްއަރުގެ ވެރިޔާ އަލީ ފާރިޝް، ޓްރިއާ ޕްރައިވެޓް ލިމިޓެޑް އަދި ހާފްޓޯން މޯލްޑިވްސް ޕްރައިވެޓް ލިމިޓެޑްގެ މައްޗަށް ދަޢުވާކުރުމަށް ވަނީ ފޮނުވާފައެވެ.
މީގެ އިތުރުން، އުމްރާގެ ޚިދުމަތް ދިނުމުގައި އުސޫލުތަކާ ޚިލާފުވި ހިޖުރަ ކުންފުނި އެއްލައްކަ ރުފިޔާއިން ޖޫރިމަނާކޮށް، އެ ކުންފުންޏާއި އޭގެ ހިއްސާދާރުންގެ ކުންފުނިތަކަށް އުމްރާގެ ހުއްދަ ނުދިނުމަށް ވެސް ވަނީ ނިންމާފައެވެ.
އުމްރާގެ ޚިދުމަތް ދިނުމުގެ އުސޫލުތަކާ ޚިލާފުވެގެން 19 ކުންފުންޏެއް ވަނީ 5،000 ރުފިޔާއިން ޖޫރިމަނާ ކުރެވިފައެވެ. އަދި ލައިސަންސް ދައްކައިގެން ޑޮލަރު ނަގައި އުމްރާއަށް ނުގެންގޮސް އޮޅުވާލި ކުންފުންޏެއްގެ މައްސަލަ ބަލަމުންދާއިރު، އެ މައްސަލަ ސާބިތުވެއްޖެނަމަ 30،000 ރުފިޔާއިން ޖޫރިމަނާކުރެވޭނެ ކަމަށް ވެސް ވަނީ އަންގާފައެވެ.