ތިމާވެއްޓާ ރަށްޓެހި ގޮތްތަކުން ކަރަންޓު އުފެއްދުމަކީ ދިވެހިރާއްޖެ ފަދަ ޖަޒީރާ ޤައުމުތަކާއި އަދި ދުނިޔޭގެ ތިމާވެށި ރައްކާތެރިކޮށް ހިމާޔަތްކުރުމަށް ކުރާ މަސައްކަތުގައި ކޮންމެހެން އަށަގަންނުވަންޖެހޭ ކަމެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މިފަދައިން ވިދާޅުވެފައިވަނީ އިއްޔެ (21 މާރިޗު 2023) ފާހަގަކުރި “އިންޓަރނޭޝަނަލް ޑޭ އޮފް ކްލީން އެނަރޖީ” ދުވަހާ ގުޅިގެން ކުރެއްވި ޕޯސްޓެއްގައެވެ. މި ޕޯސްޓުގައި ރައީސް ވިދާޅުވެފައިވަނީ ތިމާވެއްޓާ ރަށްޓެހި ގޮތްތަކުން ކަރަންޓު އުފެއްދުމުގެ ނިޒާމު ޤާއިމުކުރުމުގައި ދިވެހިރާއްޖެއިން ކުރަމުންދަނީ ނަމޫނާ މަސައްކަތްތަކެއް ކަމަށެވެ.
ރައީސް މުޢިއްޒު އިތުރަށް ވިދާޅުވެފައިވަނީ 2028 ވަނަ އަހަރުގެ ނިޔަލަށް، ރާއްޖޭގައި އުފައްދާ އިއާދަކުރަނިވި ހަކަތައިގެ ނިސްބަތް 33 އިންސައްތައަށް އިތުރުކުރުމަކީ، މި ދާއިރާއިން މަސައްކަތް ކުރަމުންދާ އެންމެ ބޮޑު އަމާޒު ކަމަށެވެ. މި އަމާޒަށް ވާސިލުވުމަށް ރާއްޖެއިން 450 މެގަވޮޓްގެ އިއާދަކުރަނިވި ހަކަތަ ޤާއިމުކުރަންޖެހޭ ކަމަށްވެސް ރައީސް ފާހަގަކުރެއްވިއެވެ.
ރައީސް މުޢިއްޒުގެ ވެރިކަމުގެ ވަޢުދުތަކުގެ ތެރޭގައި ހިމެނޭ، ރާއްޖޭގައި ބޭނުންކުރާ ހަކަތައިގެ 33 އިންސައްތަ 5 އަހަރު ދުވަހުގެ ތެރޭގައި އިޢާދަކުރަނިވި ހަކަތައަށް ބަދަލުކުރުމުގެ މަސައްކަތް ކުރިއަށްދާ ގޮތުގެ މަޢުލޫމާތުވެސް ރައީސް ހިއްސާކުރެއްވިއެވެ. އެމަނިކުފާނު ވެރިކަމާ ހަވާލުވެވަޑައިގެންނެވިއިރު ރާއްޖޭގައި ޤާއިމުކޮށްފައިވަނީ 53 މެގަވޮޓްގެ އިއާދަކުރަނިވި ހަކަތަ ކަމަށާއި، ނަމަވެސް ސަރުކާރަށް 1 އަހަރު ވީއިރު، މިހާރު އެ އަދަދު 70 މެގަވޮޓަށް އިތުރުކޮށްފައިވާ ކަމަށް ރައީސް ވިދާޅުވިއެވެ.
މީގެއިތުރުން، ރާއްޖޭގެ ވަރަށް ގިނަ ރަށްތަކުގައި، ދުވާލު ގަޑީގައި ބޭނުންކުރާ ހަކަތައިގެ އެންމެ މަތީ މިންވަރަށް ކަރަންޓު އުފެއްދޭވަރަށް މިހާރުވެސް އިއާދަކުރަނިވި ހަކަތަ ނިޒާމު ޤާއިމުކޮށްފައިވާ ކަމަށާއި، އަވިން ހަކަތަ އުފައްދާ ނިޒާމުތަކުގެ އިތުރުން، ވަޔާއި ކަނޑުގެ އޮއިވަރު ބޭނުންކޮށްގެން ހަކަތަ އުފެއްދޭތޯ ބެލުމުގެ ތަޙުލީލުތައްވެސް ރާއްޖޭގައި ކުރިއަށްދާ ކަމަށް ރައީސް ފާހަގަކުރެއްވިއެވެ.
ރައީސް މުޢިއްޒު އިތުރަށް ފާހަގަކުރެއްވި ގޮތުގައި، ތިމާވެށީގެ ތަރައްޤީގެ މަސައްކަތްތަކުގައި ރާއްޖޭގެ ތަޖުރިބާ ވަކިވަކި ޤައުމުތަކާއި، އަދި ބައިނަލްއަޤްވާމީ މައިދާނުގައިވެސް އަންނަނީ ހިއްސާކުރަމުންނެވެ. އެގޮތުން އެންމެ ފަހުން ބޭއްވި ކޮޕް ސަމިޓުގައިވެސް، އިއާދަކުރަނިވި ހަކަތަ ޤާއިމުކުރުމަށް ރާއްޖެއިން ކުރަމުން އަންނަ މަސައްކަތްތަކުގެ މަޢުލޫމާތު ކުދި ޖަޒީރާ ޤައުމުތަކާ ހިއްސާކޮށްފައިވާ ކަމަށް ރައީސް ވިދާޅުވިއެވެ
މި ޕޯސްޓުގައި ރައީސް މުޢިއްޒު އަލިއަޅުވާލައްވާފައިވަނީ ތިމާވެއްޓާ ރަށްޓެހި ގޮތްތަކުން ކަރަންޓު އުފެއްދުމުގެ މުހިންމުކަމާއި، މިކަމުގައި ދިވެހިރާއްޖެއިން ކުރަމުންދާ މަސައްކަތްތަކުގެ މައްޗަށެވެ. ޚާއްޞަކޮށް ޖަޒީރާ ޤައުމުތަކަށް މިކަމުގެ މުހިންމުކަން ފާހަގަކުރައްވާފައިވާއިރު، ދުނިޔޭގެ ތިމާވެށި ރައްކާތެރިކުރުމަށް މިފަދަ މަސައްކަތްތަކުގެ މުހިންމުކަންވެސް ރައީސް ފާހަގަކުރައްވާފައިވެއެވެ.