1447 ވަނަ އަހަރުގެ ބަރަކާތްތެރި ރަމަޟާން މަހަށް ތައްޔާރުވުމުގެ ގޮތުން މާލޭ ސިޓީ ކައުންސިލުން މާލެ އާއި ހުޅުމާލޭގެ މިސްކިތްތައް މަރާމާތުކޮށް ޒީނަތްތެރިކުރުމުގެ މަސައްކަތް ފަށައިފިއެވެ.
މާލޭ ސިޓީ ކައުންސިލުން މަޢުލޫމާތު ދެއްވިގޮތުގައި، މިހާރުވެސް ހުޅުމާލޭގެ އަލްޘާނީ މިސްކިތުގައި ގަސް އިންދުމުގެ މަސައްކަތް ދަނީ ކުރިއަށެވެ. އަދި ހުޅުމާލޭގެ މަސްޖިދުލް ޢަޒީޒާ މޫސާ މިސްކިތުގެ ކަތުރު ފަނި އަޅާފައިވާ މިމްބަރު ބަދަލުކުރުމުގެ މަސައްކަތް ވަނީ ނިމިފައެވެ. މީގެ އިތުރުން، ހުޅުމާލޭގައި އެންމެ ފުރަތަމަ ބިނާކުރެވުނު މިސްކިތް ކަމަށްވާ މަސްޖިދުލް އަމާނީ މަރާމާތުކޮށް ސާފުކުރުމުގެ މަސައްކަތް ވެސް ދަނީ ކުރިއަށެވެ.
ފުރުޤާން މިސްކިތާ ގުޅޭގޮތުން ކައުންސިލުން މަޝްވަރާކޮށްފައިވާ ކަމަށާއި، އަމިއްލަ ފަރާތަކުން އެ މިސްކިތުގައި އޭސީ ހަރުކޮށްދޭން ނިންމާފައިވާ ކަމަށް ކައުންސިލުން ހާމަކުރެއްވިއެވެ. އަދި މި މަސައްކަތް ވެސް ރަމަޟާން މަސް ފެށުމުގެ ކުރިން ނިންމާލެވޭނެ ކަމަށް ބެލެވެއެވެ.
މާލެ ސިޓީ ކައުންސިލުން މާރާމާތު ކުރަމުން އަންނަ މިސްކިތެއް.– ފޮޓޯ: ކައުންސިލް
ހުޅުމާލޭ މަސްޖިދުލް ޚައްތާބުގައި ވެސް ބޮޑެތި މަރާމާތުތަކެއް ގެނެވިފައިވާ ކަމަށް ކައުންސިލުން ހާމަކުރެއްވިއެވެ.
މިގޮތުން، ފާހާނާގެ ދޮރުތަކާއި ޓައިލްސް ބަދަލުކޮށް، ވުޟޫކުރާ ސަރަހައްދު މަރާމާތުކޮށް ނިންމާފައިވެއެވެ. މަސްޖިދުލް ތަޤްވާގައި ވެސް ބޮޑެތި ބަދަލުތަކެއް ގެނެވޭނެ ކަމަށް ކައުންސިލުން ބުނެފައިވެއެވެ.
މިގޮތުން، މިސްކިތް ޒީނަތްތެރިކުރުމާއި ނަމާދުކުރާ ސަރަހައްދު ބޮޑުކުރުމުގެ އިތުރުން އިތުރު ފާހާނާއެއް ހެދުމަށް ވަނީ ނިންމާފައެވެ.
މަސްޖިދުލް ތަގުވާގައި މާލޭ ސިޓީ ކައުންސިލުން ހެދި ފާހަނާ.– ފޮޓޯ: ކައުންސިލް
މިސްކިތްތައް މަރާމާތުކުރުމުގެ އިތުރުން، ރަމަޟާން މަހަށް ތައްޔާރުވުމުގެ ގޮތުން މާލޭގެ މަގުތަކުން ޕެލެޓްތައް ނަގައި، ހިނގާބިގާވެ އުޅޭ މީހުންނަށް ފަސޭހަކުރުމުގެ މަސައްކަތްތައް ވެސް މާލޭގެ އެކި ސަރަހައްދުތަކުގައި ދަނީ ކުރިއަށެވެ. އަދި ގޭގެއިން މަގުމަތީގައި ކުނި ބަހައްޓާފައި ހުރޭތޯ ބެލުމާއި، ނެރެފައި ހުންނަ ކުނިތައް އުކުމާއި މާލޭގެ މަގުތައް މިހާރަށްވުރެ ބޮޑަށް ބެލެހެއްޓުމުގެ މަސައްކަތް މުނިސިޕަލް ޑިޕާޓްމަންޓުގެ ކޮމިއުނިޓީ އެންގޭޖްމަންޓް ޔުނިޓުން ވެސް ދަނީ ކުރަމުންނެވެ.
މި 1447 ވަނަ އަހަރުގެ ރަމަޟާން މަހުގެ ފުރަތަމަ ދުވަސް ކަމަށް ކަލަންޑަރުގައި ފާހަގަކޮށްފައި ވަނީ މާރިޗު 1 ވާ ހޮނިހިރު ދުވަސް ކަމަށެެވެ.