ރައީސް ޑރ. މުޢިއްޒު އަތޮޅުތަކަށް ކުރައްވަމުން ގެންދަވާ ސިލްސިލާ ދަތުރުތަކުގެ ތެރެއިން މާދަމާ ( 28 ޖަނަވަރީ 2025) ހއ އަތޮޅަށް ވަޑައިގެންނެވުމަށް ވަނީ ހަމަޖެހިފައެވެ.
މައުލޫމާތު ލިބިފައިވާ ގޮތުގައި ހއ އަތޮޅުން ރައީސްގެ އެންމެ ފުރަތަމަ މަންޒިލަކީ ހއ.ދިއްދޫއެވެ.
ހއ. ދިއްދޫ އަށް ކުރައްވާ ދަތުރުފުޅަށް ހުރަސްއެޅޭ ކަމެއް ނުކުރުމަށް އެރަށު ކައުންސިލުން ވަނީ އިދިކޮޅު އެމްޑީޕީ އަށް އަންގާފައެވެ. ދިއްދޫ ކައުންސިލްގެ ރައީސް އަބްދުﷲ ރަޝީދު ސޮއި ކުރައްވައި ވަނީ އެކަމާ ގުޅޭ ގޮތުން ދިއްދޫ ދާއިރާގެ އެމްޑީޕީ ރައީސް އަބްދުﷲ ވަހީދަށް ސިޓީއެއް ފޮނުވާފައެވެ.
އެ ސިޓީގައި ބުނެފައި ވަނީ ރައީސް ދިއްދޫ ރައްޔިތުންނާ ބައްދަލުކުރެއްވުމަށް ބާއްވާ ޖަލްސާއަށް ދަތިވާ ގޮތަށް ލައުޑް ސްޕީކަރު ފަދަ ވަސީލަތްތައް މެދުވެރިކޮށް އެއްވެސް ކަމެއް ނުކުރުމަށް އެދޭކަމަށެވެ.
މިދަތުރުގައި ރައީސްގެ އިތުރުން ސަރުކާރުގެ އިސް ވަފުދެއް ވެސް ބައިވެރިވެވަޑައިގަންނަވާނެއެވެ.
ރައީސް އަތޮޅުތަކަށް ކުރައްވަމުން ގެންދަވާ ސިލްސިލާ ދަތުރުތަކުގެ ތެރެއިން މިދިޔަ ހަފްތާ ރ އަތޮޅުގެ 11 ރަށަކަށް ވަޑައިގެންނެވިއެވެ.