އެންޓި-ކޮރަޕްޝަން ކޮމިޝަން (އޭސީސީ) އިން ތިނަދޫ ސިޓީ ކައުންސިލާ ގުޅޭގޮތުން ތަޙުޤީޤު ކުރަމުންދާ މައްސަލަތަކަކާ ގުޅިގެން، އެ ކޮމިޝަނުގެ ޓީމަކުން، އިއްޔެ ހެނދުނު ކައުންސިލަށް ދިޔަ ކަމަށާއި އެލިޔުންތައް ހޯދުމާ ގުޅޭގޮތުން ކައުންސިލުން ދައްކަމުންދާ ވާހަކަތަކަކީ ދޮގު ވާހަކަތަކެއް ކަމަށް އޭސީސީން ބުނެފިއެވެ.
ތިނަދޫ ސިޓީ ކައުންސިލުން މިއަދު ހެނދުނު ވަނީ އޭސީސީ ގެ ނަމުގައި އެ ކައުންސިލަށް ވަދެ ބަޔަކު އެތަނުން ވަައްކަން ކޮށްފައިވާ ކަމަށް ބުނެ ސޯޝަލްމީޑިއާގައި ޕޯސްޓެއް ހިއްސާކޮށްފައެވެ. އަދި މައްސަލަ ފުލުހަށް ހުށަހަޅާފައިވާ ކަމަށް ފުލުހުންވެސް ވަނީ ބުނެފައެވެ. އެހެންނަމަވެސް ފުލުހުން ބުނެފައިވަނީ އެފަދަ ކަމެއް، (ވައްކަން ކުރި ކަމުގެ) ހިނގާފައިވާކަން ފާހަގަ ކުރެވިފައި ނުވާ ކަމަށެވެ. ހަމަމިއާއެކު މި ތުހުމަތުތަކާ ގުޅިގެން އޭސީސީ އިން ވަނީ ބަޔާނެއް ނެރެފައެވެެ.
އޭސީސީން ނެރުނު ބަޔާނުގައި ބުނެފައިވާ ގޮތުގައި، ކޮމިޝަނަށް ހުށަހެޅިފައިވާ މައްސަލަތަކާ ގުޅޭގޮތުން ތަޙުޤީޤަށް ބޭނުންވާ ލިޔެކިޔުންތައް ހޯދުމުގެ މަސައްކަތް ކުރިއަށް ގެންގޮސްފައިވަނީ ޤާނޫނުއަސާސީއާއި އެންޓި-ކޮރަޕްޝަން ކޮމިޝަންގެ ޤާނޫނާ އެއްގޮތްވާ ގޮތުގެ މަތިންނެވެ. ނަމަވެސް މި މަސައްކަތުގައި ކައުންސިލްގެ ފުރިހަމަ އެއްބާރުލުން ލިބިފައިނުވާ ކަމަށް އޭސީސީން ފާހަގަކޮށްފައިވެއެވެ.
ތިނަދޫ ސިޓީ ކައުންސިލުން ސޯޝަލް މީޑިއާގައި ޕޯސްޓްކޮށްފައިވާ ގޮތުގައި، “އޭސީސީގެ ނަމުގައި އައި ބަޔަކު ކައުންސިލްގެ ގިނަ ޢަދަދެއްގެ ތަކެތި ވަގަށް ނަގާފައިވާ” ކަމަށާއި، މިކަމުގެ ސަބަބުން ކައުންސިލްގެ ބައެއް ޚިދުމަތްތައް މެދުކެނޑިފައިވާ ކަމަށް ބުނެފައިވެއެވެ. އަދި މި މައްސަލަ ފުލުހުންނަށް ހުށަހަޅާފައިވާ ކަމަށްވެސް ކައުންސިލުން ބުނެފައިވެއެވެ.
މި މައްސަލައާ ގުޅިގެން ދިވެހި ފުލުހުންގެ ޚިދުމަތުން ބުނެފައިވަނީ، ތިނަދޫ ސިޓީ ކައުންސިލުން ހުށަހެޅި މައްސަލަ ބެލިބެލުމުން އެފަދަ ކަމެއް ހިނގާފައިނުވާކަން ކަށަވަރުވެފައިވާ ކަމަށެވެ. އަދި މި މައްސަލައާ ގުޅިގެން އިތުރަށް ބަލަންޖެހޭ ކަންކަން ބަލަމުންދާ ކަމަށްވެސް ފުލުހުން ވަނީ ހާމަކޮށްފައެވެ.
އޭސީސީން ކަންބޮޑުން ފާޅުކުރަމުން ބުނީ، އެ ކޮމިޝަނާ ގުޅޭގޮތުން ފަތުރަމުންދާ ޙަޤީޤަތާ ޚިލާފު މަޢުލޫމާތުތަކަކީ ބަލައިގަނެވޭނެ ކަމެއް ނޫން ކަމަށެވެ.