މިއަދު ހެނދުނު، ޗައިނާގެ ޝަންހާއީއަށް މޯލްޑިވިއަނުން ފެށި ޝެޑިއުލް ދަތުރުތަކުގެ ފުރަތަމަ ފްލައިޓްގައި ރާއްޖެއަށް ގިނަ އަދަދެއްގެ ފަތުރުވެރިން އައިސްފިއެވެ. މި ފްލައިޓްގައި ޖުމްލަ 243 ފަތުރުވެރިން ރާއްޖެއަށް ޒިޔާރަތްކޮށްފައިވާކަމަށް މަޢުލޫމާތު ލިބިފައިވެއެވެ.
މޯލްޑިވިއަންގެ ޝެޑިއުލް ދަތުރުތައް ޗައިނާގެ ޝަންހާއީއަށް ފަށާފައިވަނީ މިމަހުގެ 27 ވަނަ ދުވަހުއެވެ. މި ދަތުރުތަކަކީ ރާއްޖޭގެ ފަތުރުވެރިކަމަށް އިތުރު ކުރިއެރުމެއް ގެނެސްދޭނެ ކަމެއްގެ ގޮތުގައި ސަރުކާރުން ދެކެއެވެ.
ފްލައިޓުން ރާއްޖެ އައި ފަތުރުވެރިންނަށް މަރުޙަބާ ދެންނެވުމަށް ވެލާނާ އިންޓަރނޭޝަނަލް އެއަރޕޯޓްގައި ޚާއްސަ ހަރަކާތެއް ކުރިއަށްގެންގޮސްފައިވެއެވެ. މި ހަރަކާތުގައި ދިވެހި ސަޤާފީ ބޮޑުބެރާއި ރަތް ފިނިފެންމަލުން ފަތުރުވެރިންނަށް މަރުޙަބާ ކިޔާފައިވެއެވެ.
މިހާރު މޯލްޑިވިއަނުން ޗައިނާގެ 3 މަންޒިލަކަށް ސީދާ ދަތުރުތައް ބާއްވަމުން ގެންދެއެވެ. އެއީ ޗެންޑޫ، ބެއިޖިން އަދި ޝެންހާއީއެވެ. ޗައިނާއަކީ ރާއްޖެއަށް އެންމެ ގިނަ ފަތުރުވެރިން އަންނަ ޤައުމުކަން ފާހަގަކޮށްލެވެއެވެ. މިހާތަނަށް ޗައިނާއިން 23,000 އަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާކަމަށް ވަނީ ހާމަކޮށްފައެވެ.
ސަރުކާރުގެ އަންދާޒާތަކުން ދައްކާގޮތުގައި، މޯލްޑިވިއަނުން ޗައިނާއަށް ފަށާފައިވާ މި އައު ދަތުރުތަކާއެކު، އަހަރަކު 40,000 ފަތުރުވެރިން ޗައިނާއިން ރާއްޖެއަށް ގެނެވޭނެއެވެ.