ބޭންކް އޮފް މޯލްޑިވްސް (ބީއެމްއެލް) އިން ފަތުރުވެރިކަމުގެ ސިނާޢަތުގެ ވިޔަފާރިތަކަށް ޑޮލަރު މާރުކުރުމަށް ޚާއްޞަ އޮންލައިން ޕޯޓަލެއް ތަޢާރަފުކޮށްފިއެވެ. މި ޕޯޓަލް ތަޢާރަފުކޮށްފައިވަނީ ބޭރު ފައިސާއާބެހޭ ޤާނޫނާއި އޭގެ ދަށުން ޢަމަލުކުރަމުންދާ ޤަވާއިދާ އެއްގޮތްވާ ގޮތުގެ މަތިންނެވެ.
ބީއެމްއެލްއިން މަޢުލޫމާތު ދެއްވާފައިވާ ގޮތުގައި، މި އައު ޚިދުމަތް ލިބޭނީ ރިސޯޓު، ހޮޓެލް، ގެސްޓްހައުސް އަދި ފަތުރުވެރިކަމުގެ ދާއިރާއާ ގުޅުންހުރި އެހެނިހެން ވިޔަފާރިތަކަށެވެ. މި ޕޯޓަލް މެދުވެރިކޮށް، އެ ވިޔަފާރިތަކަށް ބީއެމްއެލްގެ އިންޓަނެޓް ބޭންކިންގ ޕްލެޓްފޯމް ބޭނުންކޮށްގެން ފަސޭހަކަމާއެކު ބޭރު ފައިސާ މާރުކުރެވޭނެއެވެ.
މި އައު ޕްލެޓްފޯމުގެ ސަބަބުން، ވިޔަފާރިތަކަށް ގާނޫނާއި ގަވާއިދުގެ ދަށުން މާރުކުރަންޖެހޭ ހުރިހާ މުޢާމަލާތެއް ފަސޭހަކަމާއެކު ބަލައި ރިވިއުކުރެވޭނެއެވެ. އަދި މާރުކުރަމުންދާ އަދަދުތަކާއި އެކްޓިވިޓީ ރިޕޯޓުތައްވެސް ބެލޭނެ ކަމަށް ބީއެމްއެލްއިން ވިދާޅުވެފައިވެއެވެ.
މި ޕްލެޓްފޯމު މެދުވެރިކޮށް ބޭންކަށް ޑޮލަރު މާރުކުރެވޭނީ 15.42 ރުފިޔާގެ ރޭޓުންނެވެ. މިއީ މިހާރު ރާއްޖޭގައި ބޭންކުތަކުން ޑޮލަރު ގަނެ ވިއްކާ ރަސްމީ ރޭޓެވެ.
ބީއެމްއެލްއިން ވިދާޅުވެފައިވާ ގޮތުގައި، މި އޮންލައިން ޕްލެޓްފޯމް ގާއިމުކުރުމުގެ މައިގަނޑު މަޤްޞަދަކީ ފަތުރުވެރިކަމުގެ ދާއިރާގެ ވިޔަފާރިތަކަށް ލާޒިމްކޮށްފައިވާ ބޭރު ފައިސާ މާރުކުރުމުގެ ޕްރޮސެސް ފަސޭހަކޮށްދިނުމެވެ. މި ޚިދުމަތުގެ ސަބަބުން، ކަމާގުޅޭ ވިޔަފާރިތަކަށް ވީހާވެސް ފަސޭހަކަމާއެކު ބޭރު ފައިސާ މާރުކުރެވޭނެ މަގު ތަނަވަސްވެގެންދާނެއެވެ.
މި އައު ޕޯޓަލްގެ ސަބަބުން، ފަތުރުވެރިކަމުގެ ދާއިރާގެ ވިޔަފާރިތަކަށް ބޭރު ފައިސާ މާރުކުރުމުގެ ޕްރޮސެސް އަވަސްވެ، ފަސޭހަވެގެންދާނެ ކަމަށް އުއްމީދުކުރެވެއެވެ.