ޕްލޭނެއް ނެތި ވަޢުދުތަކެއް ވެވަޑައިގަންނަވަމުންދާކަމަށް ކުރާ ތުހުމަތުތަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްދުދެއްވައިފިއެވެ. ރައީސުލްޖުމްހޫރިއްޔާ ވިދާޅުވީ އެމަނިކުފާނު ވެވަޑައިގެންނެވި ކޮންމެ ވަޢުދަކީ، އެކަމެއް ފުއްދާނެގޮތުގެ ޕްލޭން ކުރެވި، ކުރިއަށްދާނެގޮތް ދެނެގަނެގެން ވެވަޑައިގަންނަވާ ވަޢުދުތަކެއްކަމަށާއި، އެކަންކަން ފުރިހަމަކުރާނެ ތަރުތީބު ސަރުކާރުގައި އެބައޮތްކަމަށެވެ.
މުރައިދޫ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، އެރަށުގެ ތަރައްޤީއަށް ވަޢުދުތަކެއް ވެވަޑައިގެންފައިވާކަން ފާހަގަކުރައްވައި މިދަތުރުފުޅުގެ އެންމެ މުހިންމު ބޭނުމަކީ ރައްޔިތުންގެ ހާލަތު ދެނެގަނެ، ވެވަޑައިގެންފައިވާ ވަޢުދުތައް ފުއްދުމުގައި ބާރު ސްޕީޑުގައި ކުރިއަށް ގެންދާނެގޮތް ރައްޔިތުންނަށް ހާމަކޮށްދެއްވުންކަމަށެވެ.
ރައީސް އިތުރަށް ވިދާޅުވީ، މިދިޔަ އަހަރު މަޝްރޫޢުތައް ކުރިއަށް ނުގެންދެވުނީ އިޤްތިޞާދީ ކަންކަމަށް އިސްކަންދިނުމާއި ބަޖެޓުގެ ތާށިކަން އޮތުމުންކަމަށެވެ. އަދި މިހާރު ދައްކަވާ ވާހަކަފުޅުތަކަކީ ކަންކަން ކުރެވޭނެގޮތް މަޝްވަރާކުރައްވައި، ކުރެވޭނެ ގޮތް ކަނޑައަޅުއްވައިގެން އަދި ތަފްސީލުކޮށް ކުރެވޭނެ ގޮތް ހަމަޖެހިގެން ދައްކަވާ ވާހަކަފުޅުތަކެއްކަމަށް ވިދާޅުވިއެވެ.
“ދެން ފެނިގެންދާނީ އަޅުގަނޑުމެން ފާސްކުރި ބަޖެޓުގެ ތެރެއިން މަޝްރޫޢުތައް ފަށައިގަންނަތަން. ހުއްޓިފައިވާ މަޝްރޫޢުތަކާ އަލަށް ފަށާ މަޝްރޫޢުތައް ހިނގައިގަންނަތަން. މިއަހަރާ އަންނަ އަހަރު ފެންނާނީ މި ދެބާވަތުގެ މަޝްރޫޢުތައް ކުރިއަށްދާތަން.” ރައީސުލްޖުމްހޫރިއްޔާ ވިދާޅުވިއެވެ.
މުރައިދޫގެ ކަންކަމާ ގުޅޭގޮތުން ރައީސް ވިދާޅުވީ، އެރަށަށް އެންމެ މުހިންމީ ބުހިންމީ ބަނދަރުގެ މައްސަލައަށް ރަނގަޅު ހައްލެއް އައުންކަމަށާއި، އެކަން ހައްލުކުރަން ބޭނުންވާގޮތް އިތުރަށް ސާފުވަނީ ކައުންސިލާ ރައްޔިތުންނާ ބައްދަލުވުމުންކަމަށެވެ. އަދި ބަނދަރުގެ މައްސަލައަށް ދާއިމީ ހައްލެއް ގެނެސްދެއްވާނެކަމުގެ ޔަޤީންކަން ރައީސް ދެއްވިއެވެ.
މީގެއިތުރުން، ރައީސް ވިދާޅުވީ ބަނދަރުގެ މައްސަލަ ހައްލުކުރެއްވުމަށްފަހު، އެރަށުގެ މަގުތައް ޒަމާނީ ފެންވަރަށް ތަރައްޤީކުރުމުގެ މަސައްކަތް ފުރިހަމަކޮށްދެއްވާނެކަމަށެވެ. އަދި ސިއްހީ ދާއިރާގައި ހުރި މައްސަލަތައް ހައްލުކޮށްދެއްވާނެކަމުގެ ޔަޤީންކަން ދެއްވަމުން ރައީސް ވިދާޅުވީ ރަށުގެ އާބާދީއާ އެއްވަރަށް ސިއްޙީ ޚިދުމަތުގެ ފެންވަރު މަތިކުރައްވާނެކަމަށެވެ.
ތަޢުލީމީ ދާއިރާއާ ގުޅޭގޮތުން ރައީސް ވިދާޅުވީ، ތަރައްޤީކުރައްވާނެ ޕްލޭނެއް ހެދުމުގެ މަސައްކަތްކުރިއަށްދާކަމަށާއި، ކޮންމެ ސްކޫލަކަށްވެސް ކްލާސްރޫމާއި ލެބޯޓްރީއާއި މަލްޓިޕާޕަސް ހޯލުފަދަ ކަންކަން ބޭނުންވާކަމަށެވެ. އަދި އެކަންކުރުމަށް ތަޢުލީމީ ވުޒާރާއި ސްކޫލްތައް ގުޅިގެން އިސްކަންދޭ ތަރުތީބުގެ ޕްލޭން ހަދާ ނިންމަވާނެކަމަށް ރައީސް ވިދާޅުވިއެވެ.
މީގެއިތުރުން، ރައީސުލްޖުމްހޫރިއްޔާ ވިދާޅުވީ މުރައިދޫގައި ކުޅިވަރުގެ ވަސީލަތްތައްވެސް ޤާއިމްކޮށްދެއްވާނެކަމަށެވެ. އެގޮތުން ފުޓުބޯޅަ ދަނޑާއި ވޮލީ ކޯޓާއި އެނޫންވެސް ކުޅިވަރުގެ ވަސީލަތްތައް ތަރުތީބެއްގެތެރެއިން ކުރައްވާނެކަމަށް ރައީސް ވިދާޅުވިއެވެ.
ރައީސް ވިދާޅުވީ ރައްޔިތުން އެންމެ އެދޭކަންކަމަށް އިސްކަންދެއްވައިގެން ކަންކަންކުރާއިރު މެދުރާސްތާއާއި ދުރުރާސްތާގެ ޕްލޭނާއެކު ކުރިއަށްދާކަމަށާއި، ކޮންމެ ކަމެއްވެސް ކުރައްވަނީ ޕްލޭނަކާއެކުކަމަށެވެ.
“އިރާދަކުރެއްވިއްޔާ ރައްޔިތުން އެދޭގޮތަށް ބޭރު ތޮށީގެ މައްސަލަ ހައްލުކުރާނެ. އެމްޓީސީސީ އެއޮތީ މޮބިލައިޒްކުރެވިފައި. އެމްޓީސީސީ މިރަށުން ފައިބާނީ އެ މައްސަލަ ހައްލުކޮށްފައި.” ރައީސުލްޖުމްހޫރިއްޔާ ވިދާޅުވިއެވެ.
ނިންމާލަމުން ރައީސް ވިދާޅުވީ، ކޮންމެ ރަށެއްގެ ރައްޔިތުން ބޭނުންވާ އަސާސީ ޚިދުމަތާއި އިންސާނީ ވަސީލަތްތައްވެސް ޤާއިމްކޮށްދެއްވާނެކަމަށެވެ. އަދި މި ހުރިހާ ކަމެއްވެސް ކުރިއަށް ގެންދަވާނީ ރޭވިގެން، ޕްލޭނާއެކު، ރައްޔިތުންގެ އެދުންތަކަށް އިޖާބަދެއްވާ ގޮތަށްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.