ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ހއ. ފިއްލަދޫގައި މަގޭ ސޯލާ ޕްރޮގްރާމުގެ ދަށުން ގޭބިސީތަކުގައި ސޯލަރ ސިސްޓަމް ހަރުކުރުމުގެ ޢަމަލީ މަސައްކަތް ފައްޓަވައިދެއްވައިފިއެވެ. މި މަސައްކަތް ފެށިގެން ދިޔައީ ރައީސުލްޖުމްހޫރިއްޔާ ހއ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ. ފިއްލަދޫގައި ފުރަތަމަ ސޯލަރ ސިސްޓަމް ހަރުކޮށްފައިވަނީ އެރަށު "ކެތިގެ" ނަމަކަށް ކިޔާ ގޭގައެވެ.
މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤް އިބްރާހިމް ވިދާޅުވި ގޮތުގައި، ގޭގޭގައި ސޯލަރޭގައި ސޯލަރ ހަރުކުރުމަށް ހަމަޖެހިފައިވަނީ އެގެތަކުގެ 6 މަސްދުވަހުގެ ކަރަންޓު ބިލަށް ބެލުމަށްފަހުގައެވެ. އެގޮތުން 3 ނުވަތަ 5 ކިލޯވޮޓުގެ ސޯލަރ ސިސްޓަމް ހަރުކުރެވޭނެއެވެ. ފުރަތަމަ ފިޔަވަހީގެ ދަށުން 750 ސޯލަރ ސިސްޓަމް ގެނެސްފައިވާއިރު، ދެވަނަ ފިޔަވަހީގެ ދަށުން 7 މެގަވޮޓުގެ ސޯލަރ ސިސްޓަމްތައް ގެނައުމަށް މަސައްކަތް ކުރަމުން އަންނަކަމަށް ވަޒީރު ވިދާޅުވިއެވެ.
މަގޭ ސޯލަރ ޕްރޮގްރާމުގެ ދަށުން ގޭބިސީތަކުގައި ސޯލާ ސިސްޓަމް ހަރުކުރުމުގެ ޢަމަލީ މަސައްކަތް ރައީސް ޑރ މުއިއްޒު ފަށްޓަވައި ދެއްވުން/ ފޮޓޯ: ރައީސް އޮފީސް
މި ޕްރޮގްރާމުގެ ދަށުން ދޫކުރާ ސޯލަރގެ އަގުތަކަކީ، 3 ކިލޯވޮޓު ސިސްޓަމެއް 45,000 ރުފިޔާ އަދި 5 ކިލޯވޮޓު ސިސްޓަމެއް 75,000 ރުފިޔާއެވެ. ފައިސާ ދެއްކުމަށް އެއްފަހަރާ ދެއްކުމުގެ ގޮތާއި 5 އަހަރަށް ބަހާލައިގެން ދެއްކުމުގެ ގޮތް ވަނީ ހަމަޖެހިފައެވެ. މި ޕްރޮގްރާމުގެ މަޤްޞަދަކީ އާންމު ރައްޔިތުން ކަރަންޓަށް ކުރާ ހޭދަ ކުޑަކުރުމާއި، ދިވެހިރާއްޖޭގައި ލިބެންހުރި ހަކަތައިގެ ވަސީލަތްތަކުގެ ބޭނުން އިތުރުކުރުމެވެ.
މަގޭ ސޯލަރ ޕްރޮގްރާމަކީ، ރާއްޖޭގައި ބޭނުންކުރާ ކަރަންޓުގެ %33 އަކީ އިއާދަކުރަނިވި ހަކަތައިގެ ވަސީލަތްތައް ބޭނުންކޮށްގެން އުފައްދާ ކަރަންޓަށް ހެދުމަށް ސަރުކާރުން ކަނޑައަޅާފައިވާ ލަނޑުދަނޑިއަށް ވާސިލްވުމަށް އެޅުނު މުހިންމު ފިޔަވަޅެކެވެ.