ތަރިކަ ރައްކާތެރިކުރުމުގައި ސަރުކާރުގެ ސިޔާސަތަކީ ތަނުގެ އަސްލުވަންތަކަމާއި ޤުދުރަތީ ރީތިކަމަށް އެއްވެސް އުނިކަމެއް ނާންނާނެ ގޮތަކަށް މާއްދީ ތަރިކައިގެ ދާއިރާ ތަރައްޤީކުރުންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ތިލަދުންމަތީ އުތުރުބުރިއަށް ކުރައްވަމުންދާ ދަތުރުފުޅުގެ ތެރޭގައި ހއ. އުތީމު، ތަކަންދޫ އަދި ބާރަށު ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ. މި ދަތުރުފުޅުގައި އެމަނިކުފާނު ވަނީ ދިވެހި ޤައުމިއްޔަތާއި ތަރިކަ ރައްކާތެރިކޮށް ޙިކޮށް ޙިމާޔަތްކުރުމުގައި ސަރުކާރުގެ މިސްރާބު ހުރިގޮތާ ގުޅޭގޮތުން މުހިންމު ވާހަކަފުޅުތައް ދައްކަވާފައެވެ.
ރައީސުލްޖުމްހޫރިއްޔާ ވިދާޅުވީ ޤައުމިއްޔަތުގެ ފިކުރު ތަރައްޤީކުރެވޭނީ އަޅުގަނޑުމެންނަކީ ކޮން ބައެއްކަން އެނގިގެންކަމަށެވެ. އަދި ޤައުމިއްޔަތު ދިރުވައި އާލާކުރުމަށް ވަކިވަކި ރަށްތަކުގައި ކުރިއަށްގެންދަވަން ސަރުކާރުން ނިންމަވާފައިވާ މަސައްކަތްތަކަކީ، މުޅި ދިވެހި ރާއްޖެއާއި އެންމެހައި ރައްޔިތުންގެ ޙައްޤުގައި ކުރައްވާ މަސައްކަތެއްކަމަށް އެމަނިކުފާނު ވިދާޅުވިއެވެ.
އުތީމުގައި ޖެހިޖެހިގެން ކުރިއަށް އޮތް ދެ އަހަރު ޤައުމީދުވަސް ކުލަގަދަކޮށް ފާހަގަކުރައްވަން ނިންމަވާފައިވާކަމަށާއި، އެ މަސައްކަތްތައް ކުރިއަށް ގެންދާނީ ގިނަ ޕްރޮގްރާމްތަކެއް ހިމެނޭ ޤައުމީ މަޝްރޫޢުއެއްގެ ގޮތުގައިކަމަށް ރައީސް ހާމަކުރެއްވިއެވެ. އަދި އުތީމުގައި ހުރި އާސާރީ ބިނާތައް އަންނަ އޮތް ޖީލުތަކަށް ފެންނާނެގޮތަށް ރައްކާތެރިކޮށް ދެމެހެއްޓުމުގެ މަސައްކަތަށް ބޭރުގެ އެހީވެސް ލިބިފައިވާކަމަށް ވިދާޅުވިއެވެ.
ތަކަންދޫއަކީ ދިވެހި ތާރީޚާގުޅޭ މުހިންމު ބިނާތައް ފެންނަންހުރި މަދު ރަށްރަށުގެ ތެރޭގައި ހިމެނޭ ރަށެއްކަމަށާއި، އެ ރަށުގައި ހުރި އާސާރީ ތަންތަން ޙިމާޔަތްކޮށް އެތަންތަނުގެ ބޭނުން ފުރިހަމަގޮތުގައި ހިފޭނެ ގޮތްތައް ހޯއްދަވައިދެއްވާނެކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި ކަލްޗަރަލް ޓުއަރިޒަމް ކުރިއެރުވުމަށް މަސައްކަތްތަކެއް ކުރިއަށް ގެންދަވާނެކަމަށްވެސް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ މި މަސައްކަތްތަކަށް ސަރުކާރުން ޚާއްސަ ބަޖެޓެއް ހަމަޖައްސަވާނެކަމަށާއި، ކުރިއަށް އޮތް ދެ އަހަރަކީ ތާރީޚީ ބިނާތައް ޙިމާޔަތްކޮށް، ޤައުމިއްޔަތު އާލާކުރުމުގައި ވަރަށް ގިނަ މަސައްކަތްތަކެއް ކުރިއަށްގެންދެވޭނެ އަހަރުތަކަކަށް ވާނެކަމުގެ ޔަގީންކަން ދެއްވިއެވެ.
ރައީސުލްޖުމްހޫރިއްޔާ އިތުރަށް ވިދާޅުވީ، މި މަސައްކަތްތައް ކުރިއަށް ގެންދާނީ ތާރީޚު ދަސްކުރާ ދަރިވަރުންނަށާއި، ތާރީޚީ ދިރާސާތައް ކުރާ ފަރާތްތަކަށް އަދި އާންމު ރައްޔިތުންނަށް ނަފާ ލިބޭނެ ގޮތަށްކަމަށެވެ. އަދި މީގެ އިތުރުން، ރާއްޖޭގެ ތާރީޚު ބަލައިލުމަށް ޝައުޤުވެރިވާ ފަތުރުވެރިން ޒިޔާރަތްކުރާނެފަދަ މަސައްކަތްތަކެއްވެސް ކުރިއަށް ގެންދަވާނެކަމަށް ވިދާޅުވިއެވެ.
“މިކަން ވާނީ މުހިންމު މަޝްރޫޢުއަކަށް. އެކަމަށް ވަކި ބަޖެޓެއް ކަނޑައެޅި ބޭނުންވާ ފުރިހަމަ ވަސީލަތްތަކާއެކު ޤާއިމުކުރާނަން. މި ހުރި އާސާރީ ތަންތަން ބެލެހެއްޓުމުގައިވެސް ރަނގަޅަށް ބަލަހައްޓާ ޓްރީޓްމަންޓްދީ، އޭގެ އަސްލު ގެއްލުވާނުލައި އެކަން ކުރާނީ. މީގެކުރިން އެކަން އެކަށީގެންވާ ގޮތުގައި ކުރެވިފައި ނެތް.” ރައީސް ވިދާޅުވިއެވެ.