ފެށިގެން މި ދިޔަ 2025 ވަނަ އަހަރަކީ، ރިޔާސީ ކެމްޕޭނުގެ ތެރޭގައި ހއ. ހޯރަފުށީގެ ރައްޔިތުންނަށް ވެވަޑައިގެންނެވި ވަޢުދުތަކުގެ ތެރެއިން ގިނަ ކަންތައްތަކެއް، މާތް ﷲ ގެ އިރާދަފުޅާއެކު ޢަމަލީ ސިފައެއްގައި ފެށި، ގިނަ މަސައްކަތްތަކެއް ކުރިއަށް ގެންދެވޭނެ އަހަރަކަށް ވެގެންދާނެ ކަމުގެ ޔަޤީންކަން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދެއްވައިފިއެވެ.
ތިލަދުންމަތީ އުތުރުބުރީގެ ބައެއް ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި އެ އަތޮޅު ހޯރަފުއްޓަށް ވަޑައިގެން، އެ ރަށުގެ ރައްޔިތުންނާ މިރޭ ބައްދަލުކުރައްވަމުން ރައީސުލްޖުމްހޫރިއްޔާ ވަނީ، އުންމީދީ ވާހަކަފުޅުތަކެއް ހިއްސާކުރައްވާފައެވެ.
ވެވަޑައިގެންފައިވާ ވަޢުދުތައް ފުއްދެވުމަށް ވަރަށް ބޮޑަށް ސަމާލުވެވަޑައިގެން ހުންނެވިކަން ފާހަގަކުރައްވައި، ރައީސުލްޖުމްހޫރިއްޔާ ވިދާޅުވީ، އެ ވަޢުދުތަކަކީ ރައްޔިތުންގެ އުންމީދުތަކުގައި ކުލަޖެއްސުމަށްޓަކައި ކޮންމެހެން ކުރައްވަންޖެހޭ ކަމެއް ކަމުގައި ޤަބޫލުފުޅުކުރައްވައިގެން ވެވަޑައިގެންނެވި ވަޢުދުތަކެއް ކަމަށެވެ. އެހެންކަމުން، އެ މަނިކުފާނުގެ ސަރުކާރުގެ މަސައްކަތްތައް ތަރުތީބުކުރައްވާފައި ވާނީ، ރާއްޖޭގެ ކޮންމެ ރަށެއްގައިވެސް އެންމެ ބާރު ދުވެލީގައި އެ ކަންކަން ކުރިއަށް ގެންދެވޭނެ ފަދަ ގޮތަކަށް ރާއްވަވައިގެން ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ހއ. ހޯރަފުށީގެ ތަރައްޤީއާ ގުޅުންހުރި ކަންކަންވެސް، މި ބީދައިން ކުރިއަށްދާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ. އެގޮތުން، މުޅި ޤައުމަށް ދިމާވެފައި އޮތް އެންމެ ބޮޑު މައްސަލަ ކަމުގައި ވާ ބޯހިޔާވަހިކަމުގެ ދަތިކަމުގެ މައްސަލައަށް ޙައްލު ހޯއްދެވުމަށް ސަރުކާރުން ހިންގަވާ ބޯހިޔާވަހިކަމުގެ މަޝްރޫޢުގެ ދަށުން އެކި ރަށްރަށުގައި ތަރައްޤީކުރާ ހައުސިންގް ޔުނިޓްތަކުގެ މަސައްކަތްތައް ކުރިއަށް ގެންގޮސްދޭނެ ކޮންޓްރެކްޓަރުން ހޯދުމަށް ރޭގެ ވަގުތެއްގައި ސަރުކާރުން އިޢުލާންކުރެއްވިކަން ރައީސުލްޖުމްހޫރިއްޔާ ފާހަގަކުރެއްވިއެވެ. ބޯހިޔާވަހިކަމުގެ މަޝްރޫޢަށް މި އަހަރުގެ ބަޖެޓުގައި ހިމަނުއްވައިގެން ތަރައްޤީކުރަން އިޢުލާންކުރެވުނު ހައުސިންގް ޔުނިޓްތަކުގެ ތެރޭގައި، ހއ. ހޯރަފުށީގެ 200 ހައުސިންގް ޔުނިޓްގެ މަސައްކަތް ހިމެނޭކަން ރައީސުލްޖުމްހޫރިއްޔާ ފާހަގަކުރެއްވިއެވެ.
ހަމަ މިއާއެކު ބިން ހިއްކުމުގެ މަޝްރޫޢާއި، ކުނި ނައްތާލުމުގެ ނިޒާމު ތަރައްޤީ ކުރުމާއި، އަދި ހޮސްޕިޓަލުގެ މަސައްކަތް ކުރިއަށް ގެންދަވާނެ ކަމަށް ވެވަޑައިގެންފައިވާ ވަޢުދު އެމަނިކުފާނު ފާހަގަކުރެއްވިއެވެ. އަދި ކުޅިވަރު ކުޅުމަށް ޚާއްޞަ ފެސިލިޓީތަކެއް ތަރައްޤީކޮށްދެއްވާން ވެވަޑައިގެންނެވި ވަޢުދާއި، ބަނދަރުގެ މައްސަލައަށް ޙައްލު ހޯއްދަވައިދެއްވަން ވެވަޑައިގެންނެވި ވަޢުދު ފުއްދެވުމުގެ މަސައްކަތްތައް މިއަހަރުގެ އެކި ހިސާބުގައި ފައްޓަވާނެ ކަމުގެ ޔަޤީންކަން ރައީސުލްޖުމްހޫރިއްޔާ ދެއްވިއެވެ. އެގޮތުން ރިޔާސީ އިންތިޚާބުގައި ހއ. ހޯރަފުއްޓަށް ކޮށްދެއްވާނެ ކަމަށް ވެވަޑައިގެންނެވި ހުރިހާ ވަޢުދެއް މި އަހަރު ތެރޭގައި ކުރިއަށް ގެންގޮސްދެއްވާނެކަމުގެ ޔަޤީންކަން، ރައީސުލްޖުމްހޫރިއްޔާ ވަނީ ތަކުރާރުކުރައްވާފައެވެ.
އިޤްތިޞާދީ ފުރުޞަތުތައް ތަނަވަސް ކުރުމުގެ ގޮތުން ސަރުކާރުން މިހާރުވެސް މުހިންމު މަސައްކަތްތަކެއް ކުރައްވަމުން ގެންދަވާކަން ރައީސުލްޖުމްހޫރިއްޔާ ވަނީ ފާހަގަކުރައްވާފައެވެ. އެގޮތުން މޯލްޑިވްސް އިކޮނިމް ގޭޓްވޭ މަޝްރޫޢުގެ މަސައްކަތްތައް މިހާރުވެސް ކުރިއަށްދާކަމަށާއި، އަންދާޒާ ކުރެވޭ ގޮތުގައި މި އަހަރުގެ މެދަކާ ހިސާބަށް ދެވޭއިރު ޢަމަލީ ސިފައެއްގައި މަސައްކަތްތައް ފެނިގެންދާނެ ކަމަށްވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ. މީގެ އިތުރުންވެސް އިޤްތިޞާދީ ދާއިރާއިން ގިނަ މަސައްކަތްތަކެއް މިދިޔަ 14 މަހެއްހާ ދުވަހުގެ ތެރޭގައި ކުރައްވާފައިވާނެކަން ރައީސުލްޖުމްހޫރިއްޔާ ވަނީ ފާހަގަކުރައްވާފައެވެ.
ރައީސުލްޖުމްހޫރިއްޔާގެ ވާހަކަފުޅު ނިންމަވާލެއްވީ، މާތް ﷲގެ އިރާދާފުޅާއެކު ހއ. ހޯރަފުށީގެ ރައްޔިތުންނަށް ފެނިގެންދާނީ، ފުރިހަމަކަމާއެކު ހަލުވި ދުވެލީގައި ތަރައްޤީގެ ކަންކަން ހާސިލުވެގެންދާ މަންޒަރު ކަމުގައި ވިދާޅުވެ، އެ މަސައްކަތްތަކުގައި ބަރަކާތްލެއްވުން އެދި ދުޢާ ދަންނަވަމުންނެވެ.