ކުރީގެ ޓޫރިޒަމް މިނިސްޓަރު އިބްރާހިމް ފައިސަލް ވަނީ ދިވެހިރާއްޖޭގެ ޓޫރިޒަމަށް ޚިދުމަތްކުރުމުގެ ފުރުސަތު ދެއްވިކަމަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުއަށް ޝުކުރު އަދާކުރައްވާފައެވެ.
ޓޫރިޒަމް މިނިސްޓަރުކަމުން ފައިސަލް ވަކިކުރެއްވި ނަމަވެސް މަގާމުން ވަކިކުރެއްވި ސީދާ ސަބަބެއް އަދި މިހާތަނަކަށް ސަރުކާރުން ހާމަކޮށްފައެއް ނުވެއެވެ. ޓޫރިޒަމް މިނިސްޓަރުގެ މަޤާމުން ފައިސަލް ވަކިކުރުމާއެކު އެ މިނިސްޓްރީގެ ހިންގުން ވަގުތީގޮތުން ހަވާލުކުރައްވާފައިވަނީ، އިކޮނޮމިކް މިނިސްޓަރު މުހައްމަދު ސައީދު އާއެވެ.
ފޭސްބުކްގައި ޕޯސްޓްކުރެއްވި ބަޔާނެއްގައި ފައިސަލް ވިދާޅުވެފައިވަނީ، “ޖެނުއަރީ 28 އާ ހަމައަށް މަޤާމުން ވަކިކުރެއްވުމާ ހަމައަށް، ޓޫރިޒަމް މިނިސްޓަރުކަމުގެ މަޤާމުގައި ދިވެހި ޤައުމަށާއި ރައްޔިތުންނަށް ޚިދުމަތްކުރުމުގެ ފުރުސަތު ލިބުމަކީ އަބަދުވެސް ފަޚުރުވެރިވާނެ ކަމެއް” ކަމަށެވެ.
މިނިސްޓަރުކަމުގެ މަޤާމުގައި ހުންނެވި މުއްދަތުގައި ހާސިލުކުރެއްވި އެންމެ ފާހަގަކޮށްލެވޭ އެއް ކާމިޔާބީގެ ގޮތުގައި ފައިސަލް ފާހަގަކުރައްވާފައިވަނީ 2023 ވަނަ އަހަރު 2 މިލިއަން ޓޫރިސްޓުންގެ ލަނޑުދަނޑި ހާސިލުކުރެއްވުން ކަމަށެވެ. މި ކާމިޔާބީ ހޯއްދެވުމުގައި ޓޫރިޒަމް އިންޑަސްޓްރީގެ އަޑުއައްސަވައި، ރައްޔިތުންގެ ފާޑުކިޔުންތަކަށް ރިއާޔަތްކުރައްވައިގެން މަސައްކަތްކުރެއްވިކަމަށް ވިދާޅުވެފައިވެއެވެ.
އަދި ދިވެހި ޓޫރިޒަމް އިތުރަށް ކުރިއެރުވުމަށް ރައީސް މުއިއްޒުގެ ސަރުކާރުން ގެންގުޅުއްވާ ވިސްނުންފުޅުތަކަށް އިޝާރާތްކުރައްވަމުން ފައިސަލް ވިދާޅުވެފައިވަނީ، “ޓޫރިޒަމްގެ ފަހި ފުރުސަތުތައް ޒުވާނުންނަށް ހޯދައިދީ، އިންވެސްޓްކޮށް ޒުވާނުންގެ ބައިވެރިވުމާއެކު ދިވެހި ޓޫރިޒަމް ދިވެހިންގެ އަތްމައްޗަށް ގެނައުމަކީ” މިވަގުތު އަޅަންޖެހޭ އެންމެ މުހިންމު ފިޔަވަޅު ކަމަށެވެ.
ފައިސަލް އިތުރަށް ވިދާޅުވެފައިވަނީ ރައީސުލްޖުމްހޫރިއްޔާ ހަވާލުކުރެއްވި މަސައްކަތް އަދާކުރައްވާފައިވާނީ ޝައުޤުވެރިކަމާއި އިޚްލާޞްތެރިކަމާއެކު، ތެދުވެރިކަމާއެކު، އަދި ޤާބިލިއްޔަތު ތަންދިން އެންމެ މަތީ ދަރަޖައިގައި ކަމަށެވެ.