ކެތްތެރިކަމުގެ ސަބަބުން ރައްކާތެރިކަން ލިބިއްޖެ މީހަކަށް ދުނިޔެއާއި އާޚިރަތުގައި ދަރުމައާއި ޘަވާބު ލިބޭނެކަމަށް މިއަދުގެ ހުތުބާގަައި ބުނެފިއެވެ.
ޤަޟާޤަދަރަށް އިމާންވުމާ ބެހޭ ގޮތުން ގެނައި މިއަދުގެ ހުކުރު ޚުތުބާގައި ބުނީ އީމާންކަމުގެ އަސާސްތަކުގެ ތެރެއިން އެއްވެސް އަސާސަކަށް އިންކާރުކުރާ މީހަކު އީމާންވެގެން ނުވާކަމަށެވެ. އީމާންކަމަކީ ކޮބައިކަން އޮޅުންފިލުވުމަށް ޖިބްރީލުގެފާނު ކީރިތި ރަސޫލާގެ އަރިހުން ސުވާލުކުރެއްވުމުން، އެއީ މާތްﷲ އަށާއި، މަލާއިކަތުންނަށާއި، ފޮތްތަކަށާއި، ރަސޫލުންނަށާއި، އާޚިރަތް ދުވަހަށާއި، ރަނގަޅު މިންވަރާއި ނުބައި މިންވަރަށް އީމާންވުން ކަމުގައި ޙަދީޘްކުރައްވާފައިވެއެވެ.
މިއަދު ހުތުބާގައި ނަސޭހަތްތެރިވުމުގެ ގޮތުން ކިޔައިދީފައިވެއެވެ. އުބާދަތު ބުނުއްސާމިތު ރަޟިޔަﷲ ޢަންހު އެކަލޭގެފާނުގެ ލޯބިވާ ދަރިކަލުންނަށް ދެއްވި ނަސޭހަތެއްގައި ވިދާޅުވިއެވެ. “އޭ އަހަރެންގެ ލޯބިވާ ދަރިފުޅާއެވެ. ތިބާއަށް އެނގެންޖެހޭ މުހިންމު ކަމެއް ވެއެވެ. އެއީ މާތްﷲ ތިބާއަށް މިންވަރު ކުރައްވާފައިވާ ކަމެއް ތިބާއަށް ކުރިމަތިވުމަކީ ކޮންމެހެން ވާނެކަމެކެވެ. އަދި އެކަލާނގެ މިންވަރު ކުރައްވާފައިނުވާ ކަމެއް ތިބާއަށް ނުޖެހޭނެކަން ޔަޤީންކުރަން ޖެހެއެވެ. މިކަން މިގޮތަށް ޤަބޫލުނުކުރެވޭނަމަ، އީމާންކަމުގެ ޙަޤީޤީ ރަހަ ތިބާއަކަށް ނުލިބޭނެއެވެ.”
އަދި ގަޟާގަދަރަށް އިމާންވުމުގެ މުހިންމުކަން ހާމަކޮށް އުބާދަތު ބުނުއްސާމިތު ރަޟިޔަﷲ ޢަންހު އެކަލޭގެފާނުގެ ލޯބިވާ ދަރިކަލުންނަށް ދެއްވި ނަސޭހަތެއް ހުތުބާގައި އިއްވާފައިވެއެވެ.
“އޭ އަހަރެންގެ ލޯބިވާ ދަރިފުޅާއެވެ. ތިބާއަށް އެނގެންޖެހޭ މުހިންމު ކަމެއް ވެއެވެ. އެއީ މާތްﷲ ތިބާއަށް މިންވަރު ކުރައްވާފައިވާ ކަމެއް ތިބާއަށް ކުރިމަތިވުމަކީ ކޮންމެހެން ވާނެކަމެކެވެ. އަދި އެކަލާނގެ މިންވަރު ކުރައްވާފައިނުވާ ކަމެއް ތިބާއަށް ނުޖެހޭނެކަން ޔަޤީންކުރަން ޖެހެއެވެ. މިކަން މިގޮތަށް ޤަބޫލުނުކުރެވޭނަމަ، އީމާންކަމުގެ ޙަޤީޤީ ރަހަ ތިބާއަކަށް ނުލިބޭނެއެވެ”
އަދި ތިމަންކަލޭގެފާނު ﷲގެ ރަސޫލާ ﷺ ގެ އަރިހުން އަޑުއެއްސެވި ޙަދީޘްފުޅެއްގައިވެއެވެ. ހަމަކަށަވަރުން މާތްﷲ އެންމެ ފުރަތަމަ ހެއްދެވީ ޤަލަމެވެ. އެއަށްފަހު އެކަލާނގެ ޤަލަމަށް ލިޔުމަށް އަމުރުކުރެއްވިއެވެ. އޭރު ޤަލަމުން ދެންނެވިއެވެ: “އޭ އަޅުގެ ވެރިރަސްކަލާކޮ! ކޮންއެއްޗެއްތޯ ލިޔަންވީ؟” އެހިނދު އެކަލާނގެ އަމުރުކުރެއްވިއެވެ: “ޤިޔާމަތްދުވަހާ ހަމައަށް ހިނގާނެ ހުރިހާކަމެއް ލިޔާށެވެ.”
އުބާދަތު ބުނުއްސާމިތު ރަޟިޔަﷲ ޢަންހު މި ޙަދީޘްފުޅު ދަރިކަލުންނަށް ކިޔައިދެއްވީ އީމާންކަމުގެ މުހިންމު ރުކުނެއްކަމުގައިވާ ޤަޟާ ޤަދަރަށް އީމާންވުމުގެ މުހިންމުކަން ބަޔާންކޮށްދެއްވުމަށެވެ. މިއީ އީމާންކަމުގެ ހަވަނަ ރުކުނެވެ. އަދި މިކަމަށް އީމާން ނުވާނަމަ، އެމީހެއްގެ އީމާންކަން ފުރިހަމަނުވާނެކަން އަންގަވައިދެއްވުމަށެވެ.
ރާއްޖޭގެ އެކިކަންކޮޅުތަކުގައި އިއްވި ހުތުބާގައި އިތުރަށް ވިދާޅުވެފައިވަނީ، އުޑާއި ބިމާއި އޭގެ ދެމެދުގައިވާ އެންމެހާ ތަކެތި ހެއްދެވުމުގައި އެއްވެސް ބޭކާރު ކަމެއް ނެތްކަން މާތްﷲ އަންގަވާފައިވާ ކަމަށެވެ. އެކަލާނގެއަކީ އެއްވެސް އަޅަކަށް އުފުލޭވަރަށްވުރެ ބޮޑު ބުރައެއް ނުޖައްސަވާ، އެންމެ ޢަދުލުވެރި ރަސްކަލާނގެކަމެވެ. އަދި އެއްވެސް އަޅަކަށް އެއްވެސް އަނިޔާއެއް ނުކުރައްވާނެ ރަސްކަލާނގެކަމެވެ.
“އެންމެ ކުޑަމިނުން ޒައްރެއްގެ މިންވަރުވެސް އެއްވެސް މީހަކަށް އަނިޔާއެއް ނުކުރައްވާނެކަން މާތްﷲ ވަޙީކުރައްވާފައިވެއެވެ. ހެޔޮ ޢަމަލެއް ކޮށްފިނަމަ، އޭގެ ދަރުމަ ގިނަގުނަ ކުރައްވައި، އެކަލާނގެ ޙަޟްރަތުން މަތިވެރި ދަރުމައެއް ދެއްވާނެއެވެ. އަޅުގަނޑުމެންނަށް ދިމާވާ ދަތިތަކުގައި އެންމެ ވަރުގަދަ ބާރަކަށް ވާންޖެހެނީ ޤަޟާ ޤަދަރަށް އީމާންވެ، ކެތްތެރިކަން އިސްކުރުމެވެ.” ހުތުބާގައި ވިދާޅުވެފައިވެއެވެ.
އީމާންކަމާއި ކެތްތެރިކަމުގެ ސަބަބުން ރައްކާތެރިކަން ލިބިއްޖެ މީހަކަށް ދުނިޔެއާއި އާޚިރަތުގައި ނުހަނު ގިނަ ދަރުމައާއި ޘަވާބު ލިބޭނެއެވެ. މާތްﷲ ވަޙީކުރައްވާފައިވާ ފަދައިން، ކެތްތެރިންނަށް އެބައިމީހުންގެ ދަރުމަ ދެއްވާނީ ހިސާބެއްނެތި ގިނައިންނެވެ. މިއަދުގެ ޚުޠުބާ ނިންމާލެވިފައިވަނީ، މާތްﷲ ލޮބުވެތި ނަބިއްޔާ މުޙައްމަދުގެފާނަށް ޞަލަވާތާއި ސަލާމް ލެއްވުން އެދި ދުޢާކުރަމުންނެވެ.