ރައީސް ޑޜ. މުޢިއްޒަކީ ފަހި މުސްތަޤުބަލަކަށް އަންނަން އޮތް ޖީލު ބާރުވެރިކުރުމަށް މަސައްކަތް ކުރައްވާ ލީޑަރެއް ކަމަށް ސްޓޭޓް އިލެކްޓްރިކް ކޮމްޕެނީ ލިމިޓެޑްގެ މެނޭޖިން ޑިރެކްޓަރ ހުސައިން ފަހުމީ ވިދާޅުވެއްޖެއެވެ.
ހުސައިން ފަހުމީ މިހެން ވިދާޅުވެފައިވަނީ "އެކްސް" ގައި ކޮށްފައިވާ ޕޯސްޓެއްގައެވެ.
ފަހުމީ އިތުރަށް ވިދާޅުވީ، ރައީސް ޑރ. މުޢިއްޒަކީ ކުރިމަގަށް ވިސްނާ ޤައުމެއް ބިނާކުރައްވަމުން ގެންދަވާ ލީޑަރެއްކަމަށެވެ.
ފަހުމީ ފާހަގަކުރެއްވި ގޮތުގައި ރައީސް މުޢިއްޒަކީ ދިވެހިރާއްޖޭގެ މުސްތަޤްބަލު ބިނާކުރުމުގައި ޒުވާނުންގެ އަގުހުރި ހިއްސާ ފާހަގަކުރައްވާ ބޭފުޅެއްކަމަށެވެ.
"އިންކްލޫސިވް ތަރައްޤީއަށް ފުން އިލްތިޒާމަކާއެކު، އެ ބޭފުޅާ ޒުވާނުންގެ ކަންބޮޑުވުންތަކާއި އުއްމީދުތަކަށް ހަރުދަނާކަމާއެކު އަޑުއައްސަވައި، ޤައުމީ ސިޔާސަތުތަކުގައި އެމީހުންގެ އަޑު ހިމެނިފައިވާކަން ކަށަވަރުކުރައްވައެވެ،" ފަހުމީ ވިދާޅުވިއެވެ.
ސްޓެލްކޯގެ އެމްޑީ އިތުރަށް ފާހަގަކުރެއްވި ގޮތުގައި ރައީސް މުޢިއްޒު ޒުވާނުންނަށް ފުރުސަތުތައް ފަހިކޮށްދެއްވައި، އީޖާދީ، ދެމެހެއްޓެނިވި އަދި ކުރިއެރުމަށް އިސްކަންދޭ ވަރުގަދަ ޤައުމެއް ބިނާކުރެއްވުމަށް މަސައްކަތް ކުރައްވަމުން ގެންދަވައެވެ.
މި ބަސްފުޅުތަކުން ފާހަގަވެގެންދަނީ ރައީސް މުޢިއްޒުގެ ވެރިކަމުގައި ޒުވާނުންނަށް ދެއްވާ ޚާއްސަ އަހައްމިއްޔަތުކަމާއި، ޤައުމުގެ ދެމެހެއްޓެނިވި ތަރައްޤީއަށް ކުރައްވަމުން ގެންދަވާ މަސައްކަތްޕުޅުތަކުގެ މުހިންމުކަމެވެ.