ޓިކެޓު އަގުބޮޑުވީ ކަމަށް ފެންނަނީ ބުކިން ސިސްޓަމްގެ ޓެކްނިކަލް މައްސަލައަކުން ކަމަށާއި ޓިކެޓު ނެގުމަށް މޯލްޑިވިއަންގެ ހޮޓްލައިން އާއި މޯލްޑިވިއަންގެ ރިޒަވޭޝަން އީމެއިލް ޚިޔާރު ކުރުމަށް މޯލްޑިވިއަން އިން އެދެފިއެވެ.
މޯލްޑިވިއަންގެ މޯބައިލް/ވެބް ބުކިން ސިސްޓަމުން ބުކިން ހައްދާއިރު ޓިކެޓުތައް އަގުބޮޑުވެފައިވާކަމަށް ފެންނަނީ ބުކިން ސިސްޓަމަށް ދިމާވެފައިވާ ޓެކްނިކަލް މައްސަލައަކުން ކަމަށް މޯލްޑިވިއަން އިން ވަނީ ބުނެފައެވެ.
މޯލްޑިވިއަންގެ ރަސްމީ "އެކްސް" އެކައުންޓުން ކުރި ޕޯސްޓެއްގައި، ބުކިން ސިސްޓަމުގައި ޓެކްނިކަލް މައްސަލައެއް ދިމާވެގެން އުޅޭކަމަށާއި އަދި މި މައްސަލަ ވީހާވެސް އަވަހަކަށް ހައްލުކުރުމުގެ މަސައްކަތް ކުރަމުންދާ ކަމަށް ބުނެފައިވެއެވެ.
"މިވަގުތު އަޅުގަނޑުމެންގެ ބުކިންގ ސިސްޓަމަށް ޓެކްނިކަލް މައްސަލައެއް ދިމާވެފައިވޭ. މި މައްސަލަ ވީހާވެސް އަވަހަކަށް ހައްލުކުރުމަށް މަސައްކަތްކުރަމުން މި ގެންދަނީ،" މޯލްޑިވިއަން
މި މައްސަލަ ހައްލުވަންދެން ޓިކެޓް ގަތުމަށް ބޭނުންވާ ފަރާތްތަކަށް 1671 ނަންބަރަށް ގުޅައިގެން ނުވަތަ cc@iasl.aero އަށް އީމެއިލް ކޮށްގެން ޓިކެޓް ގަނެވޭނެ ކަމަށް މޯލްޑިވިއަންއިން ވަނީ ބުނެފައެވެ.
ދާދިފަހުން މޯލްޑިވިއަންގެ ވައިޑް ބޯޑު އެއާކްރާފްޓެއް ގެނެސް ޗައިނާއަށް ދަތުރުތައް ފަށާފައިވާއިރު، ކުރިއަށް އޮތްތަނުގައި ޔޫރަޕްގެ ގައުމުތަކަށްވެސް ދަތުރުތައް ފެށުމަށް ގައުމީ އެއާލައިނުން އަމާޒު ހިފާފައިވެއެވެ. އަދި އިތުރު އެއާކްރާފްޓެއްވެސް ގެންނަން ނިންމާފައިވާ ކަމަށް މޯލްޑިވިއަނުން ވަނީ ހާމަކޮށްފައެވެ.
މި މައްސަލައިގެ ސަބަބުން ދަތުރުވެރިންނަށް ދިމާވެފައިވާ ދަތިތަކަށް މޯލްޑިވިއަންއިން ވަނީ މަޢާފަށް އެދިފައެވެ.