ގައުމީ އެއާލައިން (މޯލްޑިވިއަން) ގެ ބުކިން ސިސްޓަމަށް ދިމާވެފައިވާ ޓެކްނިކަލް މައްސަލަ ހައްލުކޮށްފިއެވެ.
މިއަދު ދިމާވި ޓެކްނިކަލް މައްސަލައެއްގެ ސަބަބުން، ސިސްޓަމުން ދައްކަމުން ދިޔައީ އެއާލައިންގެ ބައެއް ރޫޓްތަކުގެ އަގުތައް އާދަޔާ ޚިލާފަށް ބޮޑުކޮށެވެ. އަދި އެވަގުތު، ޓިކެޓް ބުކިންގްސް ހަދަންއުޅުނު ފަރާތްތަކުން ވަނީ ސިސްޓަމުން ދެއްކި އަގުތައް ބޮޑު ވާހަކަ ސޯޝަލްމީޑިއާގައި ހިއްސާކޮށް ނުރުހުން ފާޅުކޮށްފައެވެ، މޯލްޑިވިއަން ވަނީ އެއީ ކިހިނެއްވީ ކަމެއްކަން ބަޔާންކޮށްދީފަވެ. މޯލްޑިވިއަން އިން ހެނދުނު އެކްސްގައި ހިއްސާކުރި ޕޯސްޓެއްގައި ބުނީ “މޯލްޑިވިއަންގެ ޓިކެޓުތަކުގެ އަގަށް ބަދަލެއް ގެނެސްފައި ނުވާ ކަމަށާއި ނަމަވެސް ކަސްޓަމަރުންނަށް އަގު ބޮޑުކޮށް ފެންނަނީ ބުކިން ސިސްޓަމަށް ދިމާވި ޓެކްނިކަލް މައްސަލައެއްގެ ސަބަބުން ކަމަށެވެ.
މައްސަލަ ހައްލުކޮށްފައިވާ ކަން ހާމަކުރަމުން މޯލްޑިވިއަން އިން އެކްސްގައި ކުރި ޕޯސްޓެއްގައި ބުނެފައިވަނީ، ސިސްޓަމަށް ދިމާވި މައްސަލަ މިހާރު ވަނީ ފުރިހަމައަށް ހައްލުކޮށް، އޮންލައިންކޮށް ޓިކެޓް ބުކްކުރެވޭ ގޮތަށް ހަމަޖެހިފައި ކަމަށެވެ.
އެއާލައިނުން އިތުރަށް ފާހަގަކޮށްފައިވަނީ، މި މައްސަލައިގެ ސަބަބުން އެތެރޭގެ އުދުހުންތަކުގެ އަގުތަކަށް އެއްވެސް ބަދަލެއް އައިސްފައި ނުވާނެ ކަމަށެވެ. އަދި ސިސްޓަމްގެ މައްސަލަ ދިމާވި މުއްދަތުގައި ޓިކެޓް އަގުތައް އާދަޔާ ޚިލާފަށް ބޮޑުކޮށް ދެއްކި ނަމަވެސް، އަގުތަކަށް އެއްވެސް ބަދަލެއް ނާންނަ ކަމަށެވެ
މޯލްޑިވިއަންގެ ބުކިން ސިސްޓަމަށް މިފަދަ މައްސަލައެއް ދިމާވުމަކީ ވަރަށް މަދުން ދިމާވާ ކަމެއް ކަމަށާއި، ކަސްޓަމަރުންނަށް ދިމާވި ދަތިތަކަށް އެއާލައިނުން މަޢާފަށް އެދޭ ކަމަށްވެސް އެ އެއާލައިނުން ބުނެފައިވެއެވެ.