މާލޭގެ ޝަހީދު އަލީ ހިނގުމުގައި ހުންނަ އޭއެސް ޓްރޭޑާސް ފިހާރައިގެ ސީލިންގް ފަޅައިގެން ވަދެ ވައްކަން ކުރި މައްސަލައެއްގައި ހދ. ކުޅުދުއްފުއްޓަށް ނިސްބަތްވާ 33 އަހަރުގެ ފިރިހެނެއް ވަނީ ހައްޔަރުކޮށްފައެވެ.
ފުލުހުން ދިން މައުލޫމާތުގައިވާ ގޮތުން، މި މީހާގެ އަތުން ދެ ކޮތަޅެއް ފެނުނު އިރު، އޭގެ ތެރެއިން އެއް ކޮތަޅު ވަނީ ޕިކަޕެއްގެ ދަށުގައި ފޮރުވާފައެވެ. މި ކޮތަޅުތަކުން މޯބައިލް ފޯނުތަކާއި، ހެޑްފޯނަކާއި، އެހެން މީހެއްގެ ބީއެމްއެލް ކާޑާއި، ފައިސާގެ އިތުރުން ސުޕަރ ގްލޫ ފުޅިއެއް ފެނިފައިވާ ކަމަށް ފުލުހުން މައުލޫމާތު ދެއެވެ.
މީގެއިތުރުން، މި މީހާގެ ޖިންސުގެ ޖީބުން ވެއްޓުނު ތަކެތީގެ ތެރޭގައި ކަށިގަނޑުތަކަކާއި ރެންޗެއް ހިމެނޭއިރު، ޖީބު ބެލިއިރު އެހެން މީހެއްގެ ވޮލެޓަކާއި އިތުރު ދެ ފޯނު ފެނިފައިވާ ކަމަށް ސީނަށް ދިޔަ ފުލުހުން ބުނެއެވެ. މި ތަކެއްޗަކީ އެ ފިހާރައިން ވައްކަން ކޮށްގެން ނަގާފައިވާ ތަކެތިކަން ފުލުހުންނަށް ވަނީ ކަށަވަރުވެފައެވެ.
ކްރިމިނަލް ކޯޓުގެ ބަންދު އަމުރުގައިވާ ގޮތުން، މި މީހާއަކީ ކުށުގެ ވެށީގައި އުޅޭ މީހެއް ކަމަށާއި، މިހާތަނަށް 48 ފަހަރެއްގެ މަތިން ހައްޔަރުކޮށްފައިވާ އިރު، އޭގެ ތެރެއިން 28 ފަހަރު ވަނީ ބަންދަށް ބަދަލުކޮށްފައެވެ. އަދި މި މީހާއަކީ ވައްކަމުގެ ރެކޯޑް އޮންނަ މީހެއްކަންވެސް ފާހަގަކޮށްފައިވެއެވެ.
މި މައްސަލައިގައި އިތުރަށް ތަހުގީގު ކުރުމަށް ކްރިމިނަލް ކޯޓުން ވަނީ 15 ދުވަހުގެ މުއްދަތަށް އޭނާ ބަންދުގައި ބެހެއްޓުމަށް ނިންމާފައެވެ.